◎教𪜶行合宜的路(箴廿二6，申六6-7)         賴信頌牧師        
    格洛斯特是位佇英國西南部的一座歷史城市，充滿歷史的足跡，它建城的歷史是佇第一世紀的羅馬帝國的時期，是英國歷史最悠久的城市之一，市區內到今猶保留著多多中世紀的建築及街道的規劃。當地的格洛斯特大教堂是有代表性的地標，它有真莊嚴的哥德式建築及真有特色的「扇形拱頂走廊」，電影《哈利波特》中魔法學校走廊就是佇遮拍攝。
    英國佇十七世紀的時遇當工業革命的時代，有多多喪鄉的家庭，𪜶的囝仔攏要去工廠作童工，每禮拜作六天，只有星期日才有放假，遮的囝仔攏欠缺教育，致到常常佇街頭流浪甚至犯罪。英國人羅伯特‧雷克斯就佇1780年佇格洛斯特創辦了主日學，為遮的囝仔提供教育的機會。
    雷克斯一開始就聘請四個女教師，佇禮拜日免費聚集遮的囝仔學習讀寫及基督教教理問答，主要培養𪜶的信仰及道德觀念。他自編教材，並且頒發獎品鼓勵學生，雷克斯的主日學教育真緊佇英國傳開，佇七年內約有25萬個囝仔參加主日學教育，大概佔當時英國人口的3%。雷克斯的努力也得到了約翰•衛斯理等的宗教領袖的支持，主日學就超越教派，成作普世教會推動基督教教育的重要方式。主日學的事工毋若互教育普及，也推動了教育的平民化，互多多人有機會接受教育。
    箴言廿二6講：「教導囝仔行合宜的路，伊到老攏𣍐歪斜。」這句充滿智慧的話，佇變化萬千的社會中，毋若未過時，反轉互現代的父母及教育者提供了真重要的提醒，因為面對資訊及價值觀快速變化的時代，教導囝仔行合宜的路是真要緊的基礎及品格，能幫助𪜶看見正確的方向。
    教會的延續及信仰的傳承是離未開兒童的宗教教育，但是將真理及信仰價值觀傳互下一代是父母無法度逃避的責任。教會透過推動主日學、兒童事工來幫助囝仔來行「合宜的路」，才𣍐互信仰佇世代交替中斷層。教導囝仔行合宜的路的代價，就是「到老攏𣍐歪斜」，這互教會及父母極大的安慰及盼望，越早將生命的真理囥佇囝仔的心，欲互𪜶到老攏𣍐歪斜。
    佇申命記六6-7記載：「我今仔日命令恁諸個話著記佇心內，嘛著殷勤教示恁的子兒。無論佇厝內坐，佇路裡行，倒啲抑是起來，攏著唸互𪜶聽。」佇遮上帝命令咱要將祂的話記佇心內，「記佇心內」就是佇提醒父母及教育者，佇教導囝仔之前，必須要先將上帝的話刻佇咱的內心，真實活出正確的價值觀。咱無法度互別人咱自己無的東西，當咱佇要求下一代要有某種品格或是價值觀之前，父母必須要先將遮的真理刻佇自己的心內，獨獨自己先被改變，才能帶出真正的影響力。
    佇遮也講：「嘛著殷勤教示恁的子兒」，就是佇提醒咱教育的主權毋是交佇別人的手，父母才是囝仔生命品格及信仰要負責的人。父母親自的引導及陪伴，比任何專業機構的影響力閣卡大。這個「殷勤」代表要持續的付出，因為囝仔未佇自然中成長，所以父母要主動創造對話的機會，反覆教導，這是需要極大耐心、時間及心力來投入，是需要付出代價的。
    「教𪜶行合宜的路」是為了囝仔的品格及價值觀下落重要的基礎。當囝仔自細漢佇疼及正確的引導中學習合宜的路，兼采日後遇著挫折或是誘惑，猶會堅守原則，無偏離正路。主日學是教會信仰教育的基礎，對佇信徒生命的成長及信仰的延續有真關鍵的作用。主日學的時透過聖經故事及真理的教導，提供了明確的道德價值觀，幫助囝仔建立健全的人格及正向的人生觀。咱要把握孩童及青少年的時期，將信仰轉化作生活準則及道德引導，幫助𪜶面對外在價值觀衝擊的時，猶原有堅定的信仰引導。