◎好管家(創世記一26-28)                   賴信頌牧師
    咱欲成作一位「好管家」，就要認識世界一切攏是屬佇上帝，咱只是受託去管理及運用遮的資源。簡單來講，好管家就是將上帝交佇咱手中的每一份禮物攏活出最大的價值，藉著咱所管理的來榮光上帝並且帶福氣互這個世界。佇今仔日這段經文中互咱看見，上帝佇創造天地的時，互人類及動物之間有一種特別的關係，就是賜互人管理逐種動物的權力，所以咱怎樣對待動物是咱做管家的責任，要成作「好管家」是咱對上帝領受重要的責任。
●人是受託的管家，毋是主人
    佇聖經中記載，上帝照祂自己的款式造人，互人管理海裡的魚、天裡的鳥、地上的牲生及野獸，以及佇地上啲爬的動物。」上帝的意思是要咱人來管理遮的逐種動物，這個管理並毋是指咱就可以隨意欺壓或濫散用，是要做一個負責任的管家，代替上帝來照顧、保護遮的動物。管家重要的工作就是「使用及管理」，毋是掠遮一切做自己的，人只有管理權無有所有權。當人無閣看自己是萬物掌控者時，人才會放落貪婪及自私，用正確的態度來面對上帝要咱管理的動物，所以咱要常常提醒自己是管理者毋是所有者，是奴僕毋是主人。
●動物是上帝美好的創造，要被尊重
    雖莽上帝互人類有管理動物的權柄，但是動物同款是上帝親手創造的，聖經記載上帝創造牠們的時攏看作是好，這代表動物本身就有上帝互牠們的價值及尊嚴。所以當人類佇管理的時，必須尊重遮的生命，因為動物的生命價值是上帝神聖的創造，牠們的存在有上帝美好的旨意，人毋通隨意來踐踏。
    大自然中的動物真豐富閣多樣性，每一種動物攏有無同的形象、特色及生命力，這互咱看見上帝對佇遮的動物的創造，是真用心閣看重的，遮的動物攏是偉大設計者的作品。尊重動物、保護牠們是忠心管家的重要表現，人若好款待上帝所創造的動物，這也是佇尊重創造這一切的上帝，人對待動物的態度，真實反映出人內心的良善態度以及尊重生命的品格。
●人要好好維護上帝互咱這個地球
    上帝將地上萬物賞賜互咱，祂講「著生湠，加添真多，充滿全地，閣治理全地，嘛著管理海裡的魚、天裡的鳥，及地上所有會振動的生物。」(創一28)上帝要咱治理全地，這份治理的使命包含整個大自然的生態。人類及動物攏是地球的居民，所以咱有責任好好愛護自然環境，遮的動物也能夠佇在這個上帝所賜福的世界中，安然站起，生湠多多。人要好好維護上帝互咱的這個地球，這是信仰的一部分，是咱所領受的使命。
    地球有真豐盛的自然資源，這是造物主用心設計並且欲賜互人類的家園，這份禮物毋是欲互人懶散用的資源，而是上帝互人一項神聖的託付，人就是受託的管家，咱要去「修理及顧守」，用智慧及良善的方式來管理，毋是為了眼前的利益就過頭去使用遮的資源，致到環境受破壞，造成多多極端氣候帶來的災害。咱要常常提醒自己，地球毋只是人類佇站起，也是所有生命共同的站起的所在。咱要好好維護自然環境、保護森林、海洋及動物，才能勘得被稱作好管家。
    上帝互人攏有「上帝的形像」，這也是提醒咱佇地面是上帝的代表，既然上帝是慈愛的，並且看祂所創造的一切攏是「好」，按呢人對待動物的方式，也應該反映出上帝的慈愛及憐憫，毋是貪婪及自私。所以維護上帝互咱的地球，是一種負責任的行動，咱要學習怎樣及大自然共同生存，互上帝賞賜互咱的地球可以平安繼續傳承佇咱的世世代代，大家相及來做一個好管家。