◎疼的記號(路加廿二18-20)                 賴信頌牧師         
    十字架原本是羅馬時代互人驚惶的刑具，但是因為耶穌基督的犧牲及救贖，互它有了全新的意義，藉著基督付出生命的代價，重新恢復上帝及人之間破碎的關係。這份特別的疼毋是建立佇人的頂面，乃是出佇上帝的恩典，是上帝主動願意互人有再次回轉的機會，今仔日十字架無閣是見肖的記號，是象徵超越死亡、互人盼望及永遠活命的記號。
    主耶穌被釘十字架的前一個暗眠，祂設立了一個真簡單卻也真意義的儀式----聖餐。耶穌並無起一座紀念碑，也無要求咱逐年舉行鬧熱的慶典，祂只是拿起咱生活中最平凡的食物：一塊餅、一杯葡萄汁，對咱講：恁著做此個來記念我。」(林前十一24)這塊餅，這杯葡萄汁，就是耶穌留互咱「疼的記號」。今仔日咱欲領受聖餐之前，互咱同齊打開這份疼的禮物，來看這個記號背後長闊高深的恩典。
●被擘開的餅
    佇最後的晚餐的時，耶穌提餅，感謝了後擘開，提互𪜶，講：「此個是我的身軀，是為著恁獻的。恁著做此個來記念我。」（19）佇當時的中東社會，餅是最基本、是未通欠缺的日常主食，耶穌選擇餅就是欲給咱講：祂的疼毋是奢華品，是咱生命的必需品。這就親像咱的肉體逐日需要食物來維持體力同款，咱的靈魂逐日也需要耶穌的恩典來維持生命，所以祂曾講：「我就是互人得著活命的餅；來我遮的人一定𣍐枵，信我的人一定𣍐嘴焦。」（約翰六35）
    聖餐的餅有一個非常重要的動作，就是「擘開」，這個「擘開」就是欲給咱講，耶穌本是天上榮耀的君王，卻為了疼咱甘願謙卑成作人，佇十字架頂受鞭打、凌辱、刺鑿，祂為著咱，自己的身軀被「擘開」了。
●寶貴的葡萄汁
    食了後伊閣照按呢捧杯，講：「此個杯是新的約，用我為著恁流出的血設立的。」（20）佇聖經中的觀念，「血」是代表著生命，佇舊約時代，當人犯了罪，破壞了及上帝的關係時，必須要藉著牛羊的血來贖罪，因為罪的代價就是死，要用生命換來赦免，但是牛羊的血只不過是暫時的掩遮，直到佇耶穌被釘佇十字架，祂就成作那隻完美的「代罪羊羔」。這杯紅色的葡萄汁，象徵著耶穌佇十字架頂為咱流出的寶血，祂將自己的生命完全倒出來，沒有保留，這份疼之所以貴重，因為它是基督付上生命的代價。
    耶穌講此個杯是新的約，「約」就是合約、承諾的意思。人及人之間的承諾是真脆弱的，咱講欲永遠相疼，卻可能因為一場冤家而分開；咱訂了合約，卻因為利益的衝突而毀約。若是上帝及咱立下的「新約」，毋是建立佇咱有賴好、賴完美，是建立佇耶穌基督流出的寶血。
●這個記號是對過去、現在到未來
    林前十一26講：「恁逐擺食此個餅，飲此個杯，是啲宣告主的死，直到伊來臨。」聖餐毋只是一個吃飲的儀式，它更加是一座橋樑，連接了咱的過去、現在到未來。當咱領受這個「疼的記號」，就是佇經歷上帝為咱所安排永遠的恩典。
1.過去的意義----記念祂的恩典
2.現在的意義----宣告咱的信仰
3.未來的意義----未知中有盼望
    每一擺咱領受聖餐，咱攏是佇宣告：耶穌猶會再臨！咱現在佇地上所經歷的攏是暫時，這個「疼的記號」，是咱佇黑暗的世代中最光明的盼望。領受聖餐是咱信仰生活的充電站，當咱踏出禮拜堂的那一刻，就是見證「疼的記號」的使命。