◎只看耶穌，以外無人(馬太十七1-8)        賴信頌牧師         
    今仔日這段經文是真特別的記載，耶穌帶著彼得、雅各及約翰𬦰上一座高山。佇𪜶面前，耶穌的形像改變，伊的面親像日頭發光，伊的衫變甲親像光赫呢白。接續舊約中最偉大的兩位人物----摩西及以利亞，忽然顯現及耶穌講話。看見這麼榮光的情景，彼得凍未條講：「主啊，咱佇遮真好！你若欲，我佇遮搭三間寮仔，一間互你，一間互摩西，一間互以利亞。」若是上帝忽然用一片燦爛的雲給𪜶罩咧，有聲對雲出來講：「此個是我所疼的子，伊，我真意愛，恁著聽趁伊。」門徒一下聽著就仆落去，非常驚惶，耶穌就行倚去，給𪜶摸、給𪜶安慰，佇第八節留下一句真深的話講：「一下攑目看，只有看著耶穌，以外無別人。」今仔日咱可以對這段經文中幫助咱怎樣佇這個混亂的世代中注神看耶穌。
●破除生命中的偶像
    當彼得看見摩西及以利亞的時，他的反應是非常的興奮。佇當時摩西是代表以色列的「律法」，他是頒布十誡的偉大領袖，以利亞是代表著「先知」，他行過無數神蹟，是屬靈的英雄，所以佇猶太人的心中，這兩位是信仰的最高的象徵。當彼得看見𪜶同時出現，就提議搭三間寮仔，將耶穌、摩西、以利亞囥作伙，互這個榮耀的情景永遠停佇這所在。
    彼得的提議看起來是真熱心，但是卻犯了一個信仰上的錯誤，就是將耶穌及受造的人（摩西及以利亞）囥佇同等的地位，他佇不知不覺中提升了這兩位屬靈前輩的地位，卻將基督的地位降低及人同等，這是咱也可能發生的代誌。佇現代的生活中，咱也會將敬重的人物、成功的事業、美好的名聲或是特別的價值觀，攏提升到及基督同款的位置，遮的美好的事物若提來及耶穌同等，就會成作生命中的偶像，互咱看無耶穌。
●抓條唯一的真理
    當彼得真興奮講出搭三間寮仔的計畫後，忽然有一片燦爛的雲給𪜶罩咧，有聲對雲出來，講：「此個是我所疼的子，伊，我真意愛，恁著聽趁伊。」（5）這句話是這段經文中真要緊的一段話，上帝親自向學生啟示了耶穌真實的身分，耶穌毋是另一位先知，也毋是另一位律法師，祂是上帝所疼的子。上帝對學生落了一個明確的命令，就是：「恁著聽趁伊。」上帝無叫𪜶聽趁摩西，也無叫𪜶聽趁以利亞，是單單聽趁耶穌，因為耶穌就是唯一的真理，欲將上帝的心意完全彰顯出來。「恁著聽趁伊。」就是要咱將耶穌的話成作咱生命的最高準則。
●耶穌主動的陪伴
    遮的學生聽見上帝佇雲彩中顯現，一下聽著就仆落去，非常驚惶。為怎樣𪜶會非常驚惶呢？這是因為當時猶太人的信仰認知，𪜶認為人若親目看見上帝是一件非常危險的事，因為上帝是至高閣絕對的聖潔，帶有罪性的人若直接看見上帝的榮耀，就會面臨死亡。遮的學生「仆落去，非常驚惶」，並毋是單純的無膽，是𪜶認出這是真實的「上帝顯現」，。
    當遮的學生被驚惶淹沒的時，耶穌做了一個極溫柔的動作，就是：「耶穌行倚去，給𪜶摸，講：「起來，毋免驚！」(7)這互咱看見耶穌主動的陪伴，佇遮的學生猶未開嘴，耶穌就已經行倚，因為祂知咱所面對的重擔、驚惶或是無力感，祂未遠遠佇看，祂會主動行倚互咱溫柔及安慰。
    「只看耶穌，以外無人」毋是一種的孤單，而是一種生命的狀態，當咱明白一切的恩典、氣力及盼望攏是出佇基督的時，咱就未閣怨東怨西。咱無需要依靠外在的儀式來維持信仰的熱度，也無因為失去倚靠來艱苦，願咱舉目的時，永遠「只看耶穌，以外無人」，一生及基督同站起。