◎生命的方向與價值(馬太廿二34-39)      賴信頌牧師
    佇今仔日的經文中，耶穌將複雜的律法總結作兩大誡命，就是疼上帝及疼人，就是欲重新調整咱生命的方向與價值。因為當時法利賽人所注重的是外在的規條，若是耶穌是看重信仰的實質，就是「疼」，就是欲提醒咱無應該將信仰教條化來自我滿足，是要佇生活中選擇用「疼」成作咱最高指導原則。
    生命的方向及價值就親像海邊的「燈塔」，互大海中的船隻有正確的方向，佇黑暗的暗眠成作重要的引導。同款的，咱若有明確的方向及價值，咱的生活就有明確的目標，就算是天色暗、起大霧，猶原清楚知道欲往叨位去，無閣隨著風浪佇漂流，這是咱應該要學習的功課。今仔日這段聖經講：「你著全心、全情、全意疼主----你的上帝。這是上大閣第一的誡命。第二的嘛像款：著疼厝邊親像疼家己。」(37-39)這段話互咱看見基督教信仰的中心，就是疼上帝及疼人。這兩條誡命毋若是信仰的基石，更加是咱生命的引導，透過疼上帝，互咱可以找到生命的方向，透過疼人，互咱可以活出生命的價值，這就是上帝對咱的期待。
●疼上帝→→生命的方向
    「疼上帝」若只是用想的，可能會感覺真抽象，因為疼上帝毋只是用嘴來宣告，是及上帝建立一種深的關係，當咱認識祂的性情、祂的旨意及祂的疼，咱的生命就會看見方向，無閣迷失佇自己的世界中。所以疼上帝毋只是情感上的表達，更加是一種的生活方式，就是活出祂的旨意，將祂囥佇咱生命的第一位，祂自然就成作咱生命的方向。
    欲疼上帝就要先認識祂的心意，並且相信祂既然創造咱，就有祂美好的計畫，所以咱通藉著尋求祂的旨意來看見生命的方向。這個方向就是羅十二2所講：「毋通互世俗同化，顛倒著互上帝給恁改造，心志得著更新，互恁通辨別什麼是上帝所歡喜，看做好，閣完全的旨意。」當咱疼上帝的時，咱就要調整咱的眼光來看生命，無閣是用世俗的眼光來看生命。
●疼人→→生命的價值
    基督教信仰強調「疼人」，這呣甘單是一種道德的教示，而是生命的價值，透過疼人，來成作別人的福氣，因為主耶穌給咱講：「恁有按呢對待我兄弟姊妹上微細的一個，就是好款待我。」(太廿五40)所以疼人就是疼主，當咱選擇去疼別人、關懷弱勢，咱就是佇實踐上帝的疼，並且活出祂的旨意，當咱活出祂的旨意就是佇見證咱生命的價值。
    耶穌來到世間，呣甘單教示咱相疼，也親自示範怎樣疼人。祂曾醫治病人、關心喪鄉人、接納互社會排斥的人，甚至為人的罪犧牲自己。當咱願意疼人的時，咱就是佇效法基督，活出祂的樣式，互咱的生命充滿價值。疼人呣只是上帝交代的責任，也是咱信仰的見證，當咱願意去疼人，就會互人看見上帝的疼。疼人毋只是關心及幫助，猶包括赦免及包容，因為耶穌就是用按呢來疼咱，所以耶穌也要咱按呢去行。疼人毋只是基督徒的責任，更加是咱生命價值的所在，透過疼人，咱能夠活出基督的樣式，成作人的祝福。疼人無需要偉大的行動，而是對日常生活中的小事開始。
    疼上帝互咱找著生命的方向，無閣迷失佇自我中間；疼人互咱活出生命的價值，互咱的信仰毋只是理論，是具體的行動。疼上帝及疼人共同造成基督徒的生命，互咱能夠佇世間成為光及鹽，來影響人並且榮光上帝。疼上帝及疼人是一體的，只強調對上帝的疼及敬拜，卻冷淡對待身邊的人，這就失去上帝設立誡命的意義。願咱攏能夠佇疼上帝及疼人的道路上不斷成長，互咱的生命有正確的方向與價值。