◎用咱的生命來謳咾上帝(羅馬書十二1-2)        賴信頌牧師

    若是講著「謳咾上帝」，多多人心中所出現的畫面常常是佇主日的禮拜中，講台前敬拜團導著大家來吟詩，兄弟姊妹高舉雙手來謳咾，司琴用琴聲互咱安靜心，司禮的同工讀聖經也帶領咱祈禱，聖歌隊及團契用歌聲獻互上帝等，遮的攏是對上帝的謳咾，但是咱若對謳咾的理解只停留佇禮拜中，卻未記得要用咱的生命來謳咾上帝，這款的謳咾就無完全。

    謳咾就是咱承認上帝是絕對的主權，以及咱對基督無限的恩典及祂的救贖的回應。真實的謳咾是一種公開的見證，向世間人傳達上帝的美善、疼及盼望，毋只是用嘴，是用咱的生命來謳咾祂。「用咱的生命來謳咾上帝」聽起來很抽象，甚至有淡薄嚴肅，但是咱若仔細看這兩節經文，咱就會發現保羅所互咱的，是一份非常接近日常生活的要求。保羅並無要求咱用複雜的宗教儀式來謳咾祂，是要咱佇生活中，用咱生命的所行來謳咾祂，這是實際的行動毋是口號。

●做活活的祭來謳咾祂

    保羅講：「所以，兄弟姊妹，因為上帝的憐憫，我勸恁著將家己的身軀獻互上帝做活活的祭，是聖潔，伊所歡喜的；這是恁合宜的敬拜。」(1)什麼是「將身軀獻互上帝做活活的祭」？簡單來講，就是將上帝請入咱逐日的生活中。佇舊約時代，人帶著牛羊來到祭壇前，將祭物殺死後用火燒盡，發出香香的氣味來獻給上帝，但是保羅佇遮卻是要咱「將身軀獻互上帝做活活的祭」。上帝無要咱死的時才獻互祂，祂要咱身軀猶活佇的時就獻互祂，也就是佇咱的生活中行出有香味的基督徒。咱可以用咱的時間、精力、工作、名利、掌聲獻互祂，遮的攏是咱日常生活中的一部分，也就是「活活的祭」。當咱佇生活中選擇體貼上帝、順服上帝，咱的生命就會發出信仰的香氣，這款的生命就成作一首謳咾的歌。

●毋通互世俗同化來謳咾祂

    毋通互世俗同化就是要咱毋是用世間的價值觀來謳咾上帝。「同化」佇原文的意思，是指「被擠入某一個現成的模子內」，咱若及世俗同化，就被擠入世俗的模子內，會互世俗影響咱的價值觀。世俗要咱追求自己的利益贏過其他，要咱得著越多才會越幸福，要咱及別人同款才未受排斥，遮的話聽起來也有道哩，但是咱若無留意，就容易被世界牽佇行。保羅提醒咱，毋通互世俗同化，顛倒著互上帝給咱改造。毋通互世俗同化毋是要咱脫離這個社會，是要咱佇世俗的環境中，願意互上帝來改造咱，互咱有不同款看見，來活出一種新的價值觀。

●心志得著更新來謳咾祂

    無欲互世俗同化，若只是靠自己的意志力是不夠的，咱要閣加上心志得著更新，就是要對看重自己轉換做順服上帝，就通辨別什麼是上帝所歡喜，看做好，閣完全的旨意。當咱心志得著更新，咱的生命就欲產生變化，這個變化無只是外在的變化，是歸個生命的變化。親像刺毛蟲變作蝴蝶同款，不是外表的偽裝，是對內在發生的改變。當咱的心志著上帝更新，咱就會行出實踐上帝旨意的生活，互人看見咱的更新來謳咾祂。當咱的思想無被世俗同化而更新的時，咱的生命就會充滿上帝的真理及智慧，咱的言行舉止就會發出及世界不同的香味。

    所疼的兄弟姊妹，上帝無需要咱做出什麼驚天動地的事才能謳咾祂。祂所愛的就是要咱將家己的身軀獻互祂做活活的祭，互咱的生命成就上帝所歡喜的旨意。咱要常常提醒自己，謳咾毋是只佇教會中，是佇咱所站起的所在，是佇咱的日常生活中，是佇咱所信的道理中來謳咾祂。願咱佇猶有活命的每一日，攏會成作一首謳咾的詩歌，用咱的生命來謳咾上帝！