◎平凡中活出不平凡(馬太廿五37-40)      賴信頌牧師

    這個月的月曆欲及咱分享一位互人真欽佩的人物----德雷莎修女。她常常講一句話：「咱無法度佇這世間做什麼偉大的事，咱只能夠用偉大的愛，去做微小的事。」今早起咱欲透過德雷莎修女生命中的故事，相及學習佇平凡中活出不平凡。

    德雷莎修女本名叫阿格尼絲（Agnes），出世佇阿爾巴尼亞，18歲就獻身成作修女，後來被派到印度加爾各答的一間天主教女子中學教書。那間學校環境真好，學生攏是有錢人的大小姐，德雷莎佇遐擔任校長，生活穩定、受人尊敬。但是佇1946年的某一天，當她佇坐火車的途中，透過車窗看見加爾各答貧民窟的景象。那毋是美麗的風景，而是滿街的病患、么餓在地的喪鄉人以及互人棄捨佇垃圾堆的老人，還有身上爬滿螞蟻蒼蠅的孤兒。就佇那時，上帝互她看見一個真大的負擔，她聽見上帝的呼召，要她走出高牆的舒適學校。

    當她一個人走入加爾各答的街邊時，她手中沒有大筆金錢，她的背後無有財團佇支持，她的口袋只有五個盧比及對上帝的信靠。她佇那個所在第一件做的代誌是什麼？她並無成立一個大的慈善基金會，她只是蹲落來，抱起一個倒佇路邊、身上真臭、傷口爛去的老人。這互咱看見，上帝並無要咱去拯救全世界，上帝只要你愛你眼前的那個人。德雷莎修女就是佇回應耶穌佇太廿五40所講：「我實在給恁講，恁有按呢對待我兄弟姊妹上微細的一個，就是好款待我。」所以咱毋免賴大的異象才來做好事，只要咱看見眼前這個人的需要，並且願意為他停落腳步來幫助他，就是好款待基督。

    德雷莎修女建立了「垂死之家」，專門收留遐的被醫院拒絕、被厝內人棄捨、倒佇街頭等死的人。佇遐無高科技的醫療設備，遮的修女能夠做的，只是替他們洗清氣身軀，換上清氣的衫褲，牽著他們的手，陪他們走完人生最後一段路。佇德雷莎修女的眼中，世上最可怕的毋是艱苦病痛，是感覺自己無人要、無人疼，互人未記得的人。

    佇德雷莎修女得著諾貝爾和平獎的時，她佇頒獎典禮上講了一段真刺激人的話。當時頒獎互她的長官問講：「修女，咱應該做什麼，才能促進世界和平呢？」大家掠作她會提出甚麼大理論，結果德雷莎修女只是笑笑講：「轉去你的厝，好好愛你厝內的人。」這句話聽起來是毋是真簡單？其實這是咱真容易疏忽的代誌。其實德雷莎修女這段話是佇提醒咱，疼如果不能對厝內開始，就不可能會延伸到外面。

    德雷莎修女的一生互咱看見平凡中活出不平凡的生命，她的一生無有崇高的地位、無有萬貫的家財，甚至大部分時間攏佇印度加爾各答最胎哥、最喪鄉的貧民窟中度過，但是她卻用無數個極其平凡的舉動，震撼了整個世界，用平凡的生命互人看見上帝的疼。咱兼採掠做欲活出偉大的信仰或是不平凡的人生，必須要做出驚天動地的行為，或是站佇金光閃閃的舞台上。若是咱的主卻是要咱彰顯佇兄弟姊妹上微細的一個。咱無需要刻意追求世間人眼中的偉大，只需要帶著疼去面對每一個平凡的日子，每一擺出佇疼人的付出，攏是一次及主的相遇，每一份溫柔的關懷，攏是佇為基督穿上衣裳。

    雖莽德雷莎修女過身已經真久阿，但她留互這世界的遺產，猶原猶佇發光。她並無建立軍隊，並無掌握政治大權，也無有億萬財產，但是她卻用一生的歲月，向世界顯出耶穌基督那個無條件的疼。今仔日上帝並無呼召咱每一個人去印度的加爾各答的貧民窟，上帝將咱囥佇你的公司，將咱囥佇你的家庭，將咱囥佇你的學校，將咱囥佇你的社區，這就是咱的「加爾各答」，只要咱願意，就欲佇平凡中活出不平凡。