◎無法度明白的鬱卒(詩篇七三1-17)  賴信頌牧師

    詩篇七十三篇是詩人對佇當時「社會無公義」及「歹人亨通」所發出的控告，遮的景況互祂真艱苦閣鬱卒，因為所面對的「不公不義」及他所信仰的「公義報應」完全顛倒頭，這對他的信心有真大的衝擊。遮的現象毋甘單佇當時的社會發生，佇現今的情形好親像也是按呢，咱的心中同款充滿疑問，為什麼歹人及驕傲的人過尬比咱卡好？這是咱無法度明白的事

    詩人佇一開始就講：「上帝實在好款待以色列，好款待許個心清氣的人。」(1)這句話是咱通接受的答案，因為自細漢佇教會的教導中，咱就被教育遵行上帝旨意的人會蒙福，行歹的人會受懲罰，這款的教示聽起來真公平，互咱可以安心接受，這是大家攏可以接受的價值觀。但是詩人接續的話卻毋是按呢，他講：「雖然按呢，我的腳險險踏脫去；我的腳步險險行偏去。」（2）這句話是詩人內心的鬱卒，他原本掠做信仰是一條平坦的大路，但是現實中逐種的無公義，互這條路變作互他險險拔倒的路，甚至互他行偏去，他差一掛就放棄信仰，隨世俗去過投機、不道德的生活阿！這是咱無法度明白的事，大大搖動咱的信仰。

    佇4-12節中詩人將他所看見歹人的日常生活寫落來，這及咱佇新聞或是社會中所看見的同款，歹人的日子是順遂，這互咱不得不懷疑這位上帝怎樣會按呢？這親像一幅「行歹者得享通、驕傲的無人通管、財富向無信上帝的人」的圖，這就是互詩人信心險險拔倒的直接原因。

    佇詩人真鬱卒的時，上帝藉著17節親像光照入他的生命，互他看見一個解決的方式，這節聖經講：「到入去上帝的聖所，我才明白𪜶的結局。」(17)這是詩篇七三篇最關鍵的轉折點，這句話欲解決咱無法度明白的鬱卒，互咱得著解答。

    什麼叫做「入去上帝的聖所」？佇舊約時代，聖所是上帝同在的所在，但是咱現在的「入去上帝的聖所」，毋甘單是指走入禮拜堂，而是一種「眼光的轉變」。當咱用世俗的眼光看問題的時，咱看著的是「人的財富、地位及眼前的安逸」，但是當咱「入去上帝的聖所」，站佇上帝的面前時，咱欲有一個全新的看見，毋只是看見現在而是看見永遠。

●將眼光對「眼前」轉到「全部」

    咱的生命常常是看佇「現在」及「部分」，若是「入去上帝的聖所」就欲看見毋只是眼前是全部。親像佇生活中，當咱看見歹人賺大錢、真鴨霸佇欺侮古意人，咱的心就不平及鬱卒，因為咱將眼前的景況看作這是「人生的結局」。但是進入入去上帝的聖所就是佇提醒咱：人生是一場馬拉松，毋是百米的走鏢，眼前所有的只是過程，上帝的審判及永遠的公義才是最後的結局。

●將眼光對「及人比較」轉到「及上帝結連」

    當咱看著歹人的健康、有財富、有名聲，然後越頭看自己的喪鄉閣病痛，這款的比較互咱感覺善良是愚憨，道德是負擔。但是咱若願意將眼光換作佇上帝，入去上帝的聖所就是「及上帝結連」，原本互咱羨慕的「歹人財富」，就欲變作渺小。為什麼咱欲拿上帝互咱特別的人生去及別人做比較呢？咱要有寬闊的眼光突破咱的心，咱要確信，真正的幸福從來毋是「我比別人卡好」，而是「我有上帝的同在」。

    欲解決咱心中的鬱卒，往往毋是「改變外在環境」，而是「改變看問題的高度」。歹人可能猶原鴨霸，世界可能猶原無公平，但是只要咱知道「入去上帝的聖所」，咱就未閣生氣及鬱卒，也未對善良失望，因為咱知道生命的結局毋是現今，世間所得著的只是暫時，若是佇上帝內面欲永遠佇啲。