◎追求真理或是掌聲(馬太六5-8)  賴信頌牧師

    佇基督徒信仰中，常常會面對外在環境所帶來的爭戰，佇追求真理或是掌聲中選擇？這是咱必然要去面對的事。當咱選擇跟隨耶穌，就代表咱選擇了一條及世界不同的路，世界的路充滿迷惑，當人的掌聲誘惑咱的時，就會互咱搖動。願上帝賞賜咱有智慧，常常來檢驗咱，互咱清楚欲追求叨一條路。

●「世界的掌聲」

    耶穌佇世間常常嚴厲責備的一群人，就是當時的宗教領袖——法利賽人。法利賽人並毋是無虔誠，反轉是真認真遵守律法、照時奉獻、大聲祈禱的人，問題是出佇𪜶的信仰心態。耶穌佇太六5就直接指出𪜶問題講：「恁祈禱的時，毋通親像假好的人，因為𪜶愛互人看，故意徛佇會堂抑是路口祈禱。我實在給恁講，𪜶已經得著報賞啦。」法利賽人所追求的就是「世界的掌聲」，𪜶期待佇十字路口祈禱的時，過路的人看見會謳咾講：「看啊！這個人賴呢虔誠！」𪜶將信仰當作是表演的舞台，將敬畏上帝當作是得著掌聲的管道，對現代基督徒來講，遮的掌聲的誘惑也是無所不在。

●「掌聲的代價」

    咱用多多時間佇追求世界的掌聲，為了證明人存在的價值

，但是耶穌對佇遐的追求掌聲贏過真理的人講：「𪜶已經得著報賞啦」，這個意思就是講當世間人互你掌聲，你佇天父遐的獎賞就已經結清了。這個掌聲的代價只留佇地上，卻互咱失去天頂永遠的獎賞，這實在是真可惜。

    人當然需要得著人的肯定及掌聲來鼓勵自己，重點是毋通「過頭」這字。當「追求真理」及「追求掌聲」發生衝突的時

，咱優先考慮的是叨一個？咱要常常問自己，我的動機是為了互人歡喜，或是為了行出上帝的旨意？無同的動機就欲有無同的結果。

●「掌聲會變，真理不變」

    第六節耶穌講：「你祈禱的時，著入去房間內，關門，對你恬恬仔啲看的父求，按呢恬恬仔啲看的你的父會給你報賞。

」耶穌勸咱「入去房間內，關門」來建立咱及天父真實的連結

。天父無需要咱用虛無的言詞或是外在的方式來吸引祂，因為佇咱猶未開嘴口之前，祂就已經知道咱的需要。人所看的是外在的表現，天父所看的卻是真實的心靈。

    世間的掌聲是會變的，若是上帝的真理是不變的，咱要趁著咱猶少年的時就尋著真理的生命，互咱的生命有上帝的引導。佇以賽亞書四十8就給咱講：「草會焦，花會謝，毋拘咱的上帝的話永遠存在！」現代的社會變化真緊，親像「草及花」同款，開的時雖莽好看，但是也真緊就會過去，所以咱毋通將自我的價值攏建立佇遮的容易改變的事頂面。

    咱要學習將生命的焦點對「外在的舞台」轉回「心靈的世界」，毋免用心計較去互別人歡喜，只需要安心活佇疼咱的天父面前。「外在的舞台」互咱的喜怒哀樂全掌握佇別人手中，為著人的掌聲卻互自己活尬未自在。若是「心靈的世界」就是放落咱所有的偽裝，親像咱轉去自己的房間，脫下西裝外套、高跟鞋及化妝，換上最輕鬆的衫，佇房間內無有觀眾、無有攝影機、無需要擺Pose，也不需要證明自己有賴厲害。咱可以佇上帝面前坦然講：「阿父，我今仔日真累」、「我真煩惱」、「我真驚惶」，咱無需用真媠的話來吸引上帝，當咱來到上帝面前，就無需要閣演戲互別人看，這時咱的心才能真正安靜。「外在的舞台」是演互人看的，若是「心靈的世界」是活互自己及上帝看的，當咱無閣靠外在的掌聲來證明自己的價值，咱就能夠對「心靈的世界」中得著真正的自由及平靜。