攏是為著主做(歌羅西三23-25)             賴信頌牧師

    有一齣真感動人的電影----《火戰車》（1981）是改編自真實的故事，這個故事是發生佇1924年巴黎奧運會，是一名選手佇金牌及信仰中間的選擇。這名選手叫作：埃里克·利德爾，他是一位虔誠的蘇格蘭基督徒，上帝互他有走鏢的恩賜，他認為走標是為了榮光上帝。他原本是100公尺走鏢的金牌人選，但是佇前往巴黎奧運會的船上，他發現100公尺預賽被安排佇星期日（主日）舉行，他因為堅定的宗教信仰，認為星期日應該是敬拜上帝的日子，所以就決定退出自己最專長100公尺的項目，但是這個決定引起眾人的議論以及國家榮譽的爭議。最後他改參加毋是他最專長400公尺的比賽。佇大家攏無看好的情況下，他憑著意志力及信念打破了當時的世界紀錄，並且得著金牌。這個故事之所以感動人，毋若是因為那塊奧運金牌，是因為他佇個人信仰及國家榮譽之間的選擇攏完成任務。

    這齣電影中有一句重要的台詞，就是利德爾對他的阿姐講：「我相信上帝造我必有目的，祂同時讓我跑得飛快。當我跑步時，我可以感受祂的喜悅。」這句話互咱看見，上帝互每一個人不同的恩賜，只要咱好好來發揮，攏會互上帝歡喜，親像歌羅西書三23-24所講：「恁無論做什麼，著盡心做，毋是為著人，是為著主做。著知，主會給恁報賞，互恁對伊得著產業；恁啲服事的是主基督。」當咱心存無論做什麼，攏是為著主做的時，咱就會發現咱的所作及信仰並無衝突，利德爾的每一擺走鏢攏是發自內心「為著主來走」。今仔日咱相及來學習「攏是為著主做」的功課。

●改變做代誌的眼光

    23節講：「恁無論做什麼，著盡心做，毋是為著人，是為著主做。」保羅一起頭就用「無論做什麼」開始，「無論做什麼」可以講是每一件事的意思，保羅要咱要掠做每一件事攏是為著主做的態度來做，按呢才會互咱的生活及信仰結連作伙。保羅講：「毋是為著人，是為著主做。」這句話徹底改變咱的價值觀。當咱將所做對「為著生活」改變到「是為著主做」，相信咱所看見的就欲無同款。

●改變做代誌的態度

    當咱知道攏是為著主做，就會直接影響咱的態度，既然是為著主做，咱就著盡心做，「盡心」就是認真來做，毋是為著交差若定，保羅提醒咱：「恁啲服事的是主基督。」(24)「著盡心做」毋是用講的，是用做的。這是佇回應上帝佇咱身上的作為，咱若盡心做，上帝會報賞咱，所以保羅講：「主會給恁報賞，互恁對伊得著產業。」(24)「薪水」，但是主耶穌互咱的叫產業，薪水會花了，但天國的產業是永未無去。

●改變心中的情緒

    佇生活中互咱真容易產生的負面情緒，就是「不平」，咱會感到受著無同款的對待，咱要改變心中的情緒，才未互咱陷入鬱卒的艱苦中，若是想欲解決這個情慾，保羅互咱一個觀念，他講：「作歹的人會受歹的報應，因為上帝𣍐偏待人。」(25)就是將你心中不平的情緒交互上帝。保羅提醒咱，上帝無睛眠，也無憨，祂是公義的，祂未漏勾任何一個不公不義的行為，祂也未虧待一個誠實良善的人。

    咱的信仰從來毋是只佇主日早時的禮拜，咱的上帝毋只住佇禮拜堂中，祂是充滿宇宙、萬有，並且願意參與佇咱逐日生活中的主。咱要改變做代誌的眼光，就欲看見上帝才是咱的頭家；咱要改變做代誌的態度，盡心來做來得著天頂的產業；咱要改變咱心中的情緒，祂欲互咱活出滿足的平安。當咱願意凡事攏是為著主做，就會充滿歡喜及滿足。