◎金錢的黑暗及光明(箴言三十7-9)          賴信頌牧師

    佇現代社會中，金錢是咱生存及實現目標的工具，但是如果咱失去了對金錢的控制權，工具真容易反轉變作掌管咱生活的「主人」，咱要奪回生活的主導權，互金錢成作為咱服務的工具。有一句話講：「金錢毋是萬能，但是無錢萬萬不能」，所以咱常常佇「賺不夠」的煩惱及想欲「賺卡多」的慾望中佇掙扎。今仔日這段經文互咱看見金錢的本質，更加指出了金錢背後的黑暗及光明，這可以幫助咱對金錢有正確的態度。

●金錢的黑暗面

    詩人這段祈禱非常特別，他無求上帝互他成作大好額人，也無求上帝互他變作散赤人，他對佇「太有錢」或是「太無錢」攏感到驚惶，因為他深知無論是過頭好額或是過頭散赤，攏會打開人性的黑暗面。當人踮佇真富足、甚麼攏無欠的時，就真最容易產生一種感覺，這一切攏是靠我自己得來的，互原本是感謝上帝的保守，最後變作誇口自己的成就，然後人就講上主是啥人？金錢最大的黑暗面，毋是在佇金錢本身是邪惡的，是在佇金錢互人慢慢迷失，佇不知不覺中將金錢當作是生命的主宰。

●金錢的光明面

    咱欲怎樣互金錢的黑暗面變作光明？詩人佇遮向咱指出一條明路，詩人向上帝祈禱講：「求你互我無散赤嘛無好額，賜我需要的米糧。」(8)這節經文點出金錢的光明面，就是要互金錢回歸到「工具」的定位，毋是「主人」的位置，就是滿足現在需要的米糧來得著真正的平安。

    佇希伯來原文中，「需要的米糧」就是指「我需要的那份份額」，這是一種滿足現狀的心態。簡單來講，金錢的光明面就是建立佇「知足」的態度上，所以保羅曾講：「敬虔閣知足會互人得著大利益。生不帶來，死不帶去；有通食，有通穿，就著知足。」（提前六6-8）當咱無過頭追求富足，也無為明仔日過頭掛慮的時，咱的心就欲有真正的自由及平安。

●正確的金錢態度

    詩人向上帝求的第一件事是「求你互虛假及白賊離開我遠遠」，這是真重要面對金錢的態度，就是要先求真理，再來求財富。一個活佇虛假及白賊的人，賺閣卡多錢只是包裝自己虛假的外表，若是一個內心真實、知足的人，才能坦然面對真正所需要的。所以咱要提醒自己佇賺錢的過程中，堅持誠實及信用，無賺不義之財。

    佇主耶穌教示咱的祈禱文中也講：「求你今仔日賜阮需要的食物。」(太六11)上帝應允咱欲互咱今仔日需要的食物，所以咱毋免去掛慮一世人的食物，這是上帝要咱要學習的信心功課。咱若願意相信未來的日子，兼採無大富大貴，但是每一步攏會有上帝佇帶領，祂的恩典攏夠額咱用，咱內心的平安自然就會生出。

    咱毋通互金錢成作咱的主人，咱的主人獨獨只有天頂的上帝，所以聖經明確向咱指出講：「無人會當服事兩個主人；伊若毋是怨恨此個，疼彼個，就是看重此個，看輕彼個。恁𣍐當像時服事上帝閣服事錢財。」（馬太六24）所以咱必須要拒絕互金錢掌控咱的心靈及價值觀，當咱願意將上帝囥佇生命的頭位時，金錢自然就會降作次要的。

    今仔日詩人的這段祈禱，就親像一面鏡，照出咱每一個人內心對金錢的渴望及驚惶，真期待閣驚受傷害。咱毋通互散赤剝削咱的尊嚴及軟弱，也毋通互富足麻痺咱的靈魂及信仰，當咱能夠佇每一日的生活中，帶著感恩的心來領受那份需要的恩典時，內心的平安及知足就欲互咱生命滿滿的福氣。