◎怎樣領受福音(以弗所書二8-10)            賴信頌牧師

    「福音」這字希臘原文的意思是「好消息」，佇基督教信仰中就是指上帝藉著耶穌基督帶互全人類的救贖好消息。若是用卡白話來講，就是：「雖莽咱攏無完美及罪性，但是耶穌已經為咱付清了代價，咱只要願意相信，就能夠免費得著靈魂的拯救及永恆的盼望。」這就是上帝互咱最媠的好消息。

    福音毋只是互信主的人，是互世間的每一個人，若是按呢咱欲怎樣來領受福音呢？就是完全憑著信心！加拉太書中不斷強調，接受了福音，一定會有好行為，因為脫離了罪及罪的咒詛、脫離了對敵及對敵的白賊，咱自然會行好。但是得救是白白的恩典，是靠著信心，毋是靠咱的好行為。佇今仔日這段經文中，互咱三個重要的態度，可以幫助咱正確來領受福音。

●謙卑承認這是全然是恩典（8）

    第八節講：「因為恁是靠上帝的恩典對信得著救；毋是靠恁家己，是靠上帝的恩賜。」欲領受福音的第一個態度就是謙卑承認這是「全然是恩典」，是靠上帝的恩賜，親像上帝白白互咱的禮物，毋是咱自己賺來的，也毋是咱應該得著的。當咱意識到自己原本是無法度救自己，但是上帝互願意無條件來拯救咱的時，咱的心中才會生出這毋是理所當然的，所以領受福音就是雙手空空來接受這份天頂來的禮物。

●單純信靠，𣍐當誇口（9）

    第九節講：「既然毋是靠行為，什麼人都𣍐當誇口。」可以領受福音並毋是人的敖，麻毋是咱有甚麼才調，所以人𣍐當誇口，既然無法度誇口，咱只可以單純來信靠。福音毋是靠咱的頭殼來想像，或是靠高深的修行來得著，咱需要親像囝仔同款單純信靠，相信耶穌佇十字架頂所成就的救贖已經夠額。保羅佇遮特別提到「什麼人都𣍐當誇口」，就是提醒咱佇福音面前，無論咱佇世間人眼中賴有成就、賴有善良、賴有能力，遮的好行為攏不能用來換救恩。所以咱只能將所有的榮耀及謳咾攏歸互上帝，毋是歸佇自己的好所行。

●通做上帝早就準備愛咱做的好事。（10）

    前面咱有講到領受福音要謙卑領受，單純信靠，毋是靠咱的行為，但是到了第十節接續給咱講，領受福音之後，咱也有上帝交代咱的責任。佇第十節講：「因為咱是上帝創造的；伊通過基督耶穌創造咱，互咱通做伊早就準備愛咱做的好事。」「咱是上帝創造的」這個觀點，就是要咱領受福音之後，咱的生命就親像被上帝重新「再造」一擺。既然咱成作新造的人，咱的思想、言行及價值觀就要徹底翻新，不能親像過去同款自私、順趁歹習慣，而是要活出這個勘得的新身分、有基督生命的新生活。

    佇遮提著的「好事」佇希臘文中有「傑作、藝術品」的意思，咱親像土照捏土的師傅照他的心意來成作一件媠的作品。咱雖莽毋是靠著做好事來得救，但咱得救是為了做上帝愛咱做的好事。遮的好事毋是照咱自己歡喜來定義，毋是用來向人誇口的功德，是上帝佇咱生命中早就量身訂造，要咱去完成的計畫。如果「領受福音」是上帝白白互咱的一顆珍貴的種子，按呢咱的責任就是好好來灌溉它，互它結出滿滿的美好果子。

    佇基督教的信仰中，「福音」毋是一個靜態的知識，是一個動態 的生命改變。福音佇咱用信心來承接開始，這個領受毋只是為了自己，更加是為了傳揚。所以福音毋是一個終點，是一條恩典的管道。咱領受福音是起頭，活出見證是過程，傳揚福音是使命，願聖靈幫助咱對心領受，用疼傳揚，互領受福音成作你我的使命！