◎順服上帝或是順服人(徒五27-32)            賴信頌牧師

     今仔日的月曆寫著一個「敘利亞教會的誓約運動」，這是一場發生佇1653年1月3日的重大宗教及反殖民的運動，地點是佇印度南部的喀拉拉邦，這是印度基督教歷史中真重要的一個事件。那時當地有一群「敘利亞教會的基督徒」，𪜶為著欲堅持自身的信仰及文化主權，而發起反抗葡萄牙殖民者及羅馬天主教會的抗爭運動。

    這場運動是印度基督教歷史真重要的轉折點，它徹底粉碎了葡萄牙人企圖完全併吞當地教會的野心。這場抗爭運動佇本質上是一場保護古老文化及信仰自主權的宗教革命，也是一場反抗歐洲殖民者高壓統治的本土意識覺醒。它向世界證明了，印度的敘利亞基督徒寧可拒絕及西方主流教會的體制聯繫，也絕對未放棄自己傳承千年的文化尊嚴，這實在是一間永無屈服的教會。佇這個「多元文化主義」的現代，「敘利亞教會的誓約運動」雖莽是一段早期反抗「文化帝國主義」的歷史，但是它證明了信仰或是思想的傳達，無應該掠「消滅本土文化」做代價。猶原可以做一個虔誠的基督徒。

    佇基督教的教界中，常會去強調「合一及對話」，但當咱再次來看「敘利亞教會的誓約運動」，互咱必須要再次來重新思考「合一」的定義？合一毋是「攏同款」，而是佇「多樣性中的合一」，雖莽有不同的文化、語言、傳統，猶原可以佇基督內面合一。咱要尊重別人的傳統及自主權，毋通互當年的宗教迫害再次發生。

    今仔日這段聖經的背景及敘利亞教會所面對的困境真相詳，當時的宗教領袖恐嚇使徒，嚴格禁止𪜶閣傳講耶穌，但佇之前，復活的耶穌才吩咐使徒要往普天下去傳福音，如今使徒面臨了選擇的難題，就是順服上帝或是順服人？順服人就可以保住性命，免受肉體的艱苦，但是卻違背了上帝。若是順服上帝，就要面臨逼迫、坐監，但是卻得著永遠的生命及真理，所以彼得講：「阮著順服上帝，毋是順服人。」（徒五29）

    這句話毋是叫咱佇生活中一定要反抗政府或是法律，重要的是當世間的權柄逼你做違背上帝心意的事，那時基督徒的最高指導原則就是：「上帝的權柄永遠大過人的權柄」，因為生命、真理及審判攏在佇上帝，毋是在佇人。所以順服上帝無順服人，毋是為了及人冤家，是要看清「上帝才是咱生命中最大的倚靠」，當兩個價值觀衝突的時，要選擇順服那位疼咱、拯救咱的上帝，這才是最安全、也是最有智慧的決定。

    佇咱的人生中，總是有多多聲音佇對咱下命令，互咱佇不知不覺中，妥協了咱內心的堅持。選擇聽上帝的話，有時候可能會互咱被排擠、被誤解，甚至會失去一些眼前的利益，但是咱要相信，上帝絕對未虧待遐的聽趁祂的人。人會改變，人的權力會過去，但是上帝的疼及應許永遠未改變。

    眾使徒之所以這麼勇敢，是因為𪜶親目看見了耶穌的復活，而且上帝也賜落聖靈互順服伊的人。這互咱看著，順服上帝雖莽有時不容易，但是咱絕對毋是孤單面對，因為上帝會賜落聖靈成作咱的氣力、勇氣及智慧，互咱佇面對壓力及選擇的時，能夠站穩咱的腳步，當咱願意順服上帝無順服人，也欲經歷咱想未到的結果。所以聖經卻記錄了一個奇妙的結果，就是「使徒離開議會，滿心歡喜，因為𪜶互人看做會堪得為著主的名受凌辱。」(41)這款的結果就是順服上帝奇妙的所在。

    當咱面對生活的選擇、人際關係的壓力、或是價值觀的衝突時，請咱先安靜落來，問自己是欲順服上帝或是順服人？求主賜咱有敘利亞教會的基督徒及眾使徒的勇氣，願意選擇順服上帝，互咱毋是追求世界的好，是追求那條最安全的道路。