◎直到伊來臨(林前十一23-26)               賴信頌牧師

    今仔日咱閣聚集佇主的施恩座前，也欲再次來領受主的聖餐，佇教會法規中，有要求逐間教會至少兩個月要舉行一擺聖餐，因為聖餐及咱得救有真要緊的關係，也是咱信仰真重要的中心。但是有時陣咱過頭熟悉，就容易將它當成一個「例行的公事」。聖餐絕對毋只是一個宗教儀式，更加是上帝互咱的邀請函，藉著耶穌基督親自擺設這個筵席，邀請咱每一個人來到聖餐桌前，毋是欲看咱表現有賴好、有賴完美，是要咱重新來思想：「此時咱及主耶穌的關係是怎樣？」

    佇聖經中特別記載，耶穌設立聖餐的時間，是「主耶穌互人出賣彼暝」，那是耶穌最痛苦、最孤單、被背叛的時刻。祂知道門徒會逃走、猶大會出賣祂，祂知道閣無賴久祂就欲被釘佇殘忍的十字架頂。佇那個充滿黑暗及痛苦的暗暝，耶穌心內所想的毋是自己是咱，是為著咱犧牲的，所以祂講：「此個是我的身軀，為著恁犧牲的；恁著做此個來記念我。」(24)

    毋知咱兼曾想過，為怎樣耶穌無用「看」及「聽」來紀念祂，是要咱用「吃」及「飲」的方式來記念祂呢？因為佇咱的生活中，當咱吃落物件、飲落飲料，遮的食物就進入咱的胃，被消化、被吸收，最後成作咱身軀的一部分，變作咱的血、咱的肉、咱的氣力。所以當咱吃主的餅、飲主的杯，就是代表咱欲將耶穌的生命吃入咱的生命，成作咱生命的一部分。耶穌佇約六56講：「食我的肉，飲我的血的人，𫢶佇我內面，我嘛𫢶佇伊內面。」這是一種「你內面有我，我內面有你」的親密關係。當咱佇領受聖餐的時，咱要去想「此時咱及主耶穌的關係是怎樣？」是停留佇「表面的交陪」或是「親密的關係」，咱的態度是怎樣，就決定咱及祂的關係是怎樣，每擺領受聖餐的時，也是咱要反省咱及祂關係的時。

    耶穌期待咱的毋是「外在的宗教活動」，是「內在的生命連結」，耶穌要咱的生命及祂結連，親像葡萄樹及樹枝的關係，樹枝若及葡萄樹失去的連結，就失去得著營養的機會。當咱備辦心領受聖餐的時，也要誠實面對自己，咱是靠自己的氣力佇硬撐，還是逐日倚靠主的恩典及氣力？

    第26節按呢講：「恁逐擺食此個餅，飲此個杯，是啲宣告主的死，直到伊來臨。」這節聖經中有一句真重要的話，就是「直到伊來臨」，意思就是基督的救恩是對這時到未來，直到伊來臨，是及永遠結連作伙的。既然咱每一擺領受聖餐就是啲宣告主的死，直到伊來臨，按呢咱現在佇世間所領受的每一擺聖餐，就可能是那場最後、最榮耀的天頂的筵席的來臨。所以咱每擺吃這個餅、飲這個杯攏是佇向未來發出信心的宣告。

    當時保羅佇哥林多教會設立聖餐的時，教會中間猶有多多的問題，有的好額人已經吃飽飲足，若是喪鄉的人卻是么巴度，彼此中間分別無合一。既然咱佇遮領受聖餐就要打破人之間的隔離，咱雖莽來自無同的家庭、有無同的背景、無同的年齡，甚至有無同的政治立場或是生活習慣，但是咱因著桌頂的餅及杯，咱攏成作耶穌身體的一部分。聖餐打破了人及人之間的圍牆，當咱及耶穌有好的關係，咱及兄弟姊妹也應該要有好的關係，這才是合一。今仔日佇咱的心中兼猶有無法度原諒的人？咱兼願意藉著聖餐放落遮的綑綁？

    感謝上帝，聖餐的恩典已經賞賜互咱，主耶穌並無要求咱要表現尬真完美才可以來領受，反轉是講，祂是欲為著咱遮的無完美、滿身傷痕、時常軟芷的人擺設這個筵席。今仔日咱來到聖餐台前，咱感謝耶穌為咱捨命，成作咱的救主，互咱的生命得著永遠的生命。咱也欲放落自己來領受這個餅及杯，互咱的生命及主深深結連，同心來行這條屬天的道路直到伊來臨。