◎義人的祈禱有大功效(雅五13-20)           賴信頌牧師

    佇信仰的路途中，咱常常會出現一個疑問，就是上帝兼有聽我祈禱？我兼欲繼續祈禱嗎？有時咱真認真佇祈禱，相信上帝會幫助咱，但是最後的結果，卻毋是照咱所期待的來完成，兼採病無得著醫好、關係無得著恢復、經濟無得著改善等，咱就會去懷疑是自己的信心無夠嗎？抑是上帝根本無佇聽？

    佇聖經中有多多屬靈的人物，也攏經歷過祈禱的試煉。親像保羅曾三次求主挪去身上的刺，結果上帝並無照他的期待醫治，而是對他講：「我的恩典有夠通滿足你的需要；因為你軟弱的時，我的氣力才會當完全發揮。」(林後十二9)。耶穌佇客西馬尼園祈禱的時講：「父啊，你若肯，求你將此個杯給我提開！總是毋通照我的意思，著照你的旨意實現。」(路廿二42)但是最後十字架猶原無提開。對遮的事互咱看見，祈禱毋是命令上帝，毋是咱有信心來開嘴，上帝就要照咱所講的來成。真正的祈禱毋是佇控制上帝，是將自己交佇上帝的面前。

    佇今仔日這段聖經中有一句真特別的話，就是「義人的祈禱有大功效」(16)，這個義人是甚麼意思？佇舊約中所指的義人，毋是指從無犯錯的聖人，而是指「佇及上帝及人的關係中盡本分、守信用」的人。若是新約中的義人，是指「因著信靠耶穌基督，而被上帝稱作義的人」。

    佇遮提著：「義人的祈禱有大功效」，這個義人就是將舊約及新約中義人的觀念囥作伙，咱可以將這句話翻譯作：一個願意面對自己的軟弱，也願意及上帝及人保持親密的關係，並且佇生活中活出信仰的人，他們的祈禱一定毋是出佇自私的慾望，是貼近上帝的心意，這種帶著真實、信心及正直的祈禱，會帶來正面的氣力及改變。

    「義人的祈禱有大功效」這句話，對佇咱來講一定有真大的吸引力，如果祈禱來祈禱去攏無效果，咱大概就真容易放棄。佇遮講的義人毋是超人、毋是有特別功能的人，而是願意倚靠上帝的人。雅各佇遮提到一個人，大家攏感覺這個人真厲害，就是先知以利亞，但是如果要咱每一個人攏及以利亞同款，咱的祈禱才會有大功效，按呢可能真多人攏會放棄，但是雅各講：「以利亞及咱平平是人」（17）。雅各講以利亞及咱是同性情的人，所以雅各佇遮強調的義人毋是指超人那款真厲害的人，是知道自己是罪人，知道自己軟弱，而且願意倚靠上帝的人，若是按呢咱就有機會互咱的祈禱有大功效。

    佇路加福音十五章中所記載浪子的故事，那個浪子是什麼時候知道回轉？就是他佇替人飼豬的時，那時他才真正的知道自己敗壞，而且知道他的老父是賴呢阿好。咱要真正知道自己軟弱，真正知道上帝有賴呢好，這兩個要素攏要有，咱才會回轉歸向上帝。真多時陣當咱佇絕望中仰望上帝，咱就會看見上帝的幫助，毋只是破病的時，是佇多多代誌上也是按呢。咱要會記得，咱是要倚靠上帝的恩典，毋是倚靠自己的努力，願意倚靠主的人就會看見祂氣力的彰顯。

    佇雅各書一6講：「不過，恁著靠信心祈求，毋通憢疑；憢疑的人親像海湧互風掃，起起落落。」雅各講憢疑的人就親像海湧互風掃，風往叨位吹，水就往叨位流。今仔日咱感覺家庭和睦、事業順利、子兒有孝、凡事平安，咱就感覺「一定是上帝聽咱的祈禱」，若是明仔日咱的生命開始發生變化，咱的心情就開始受影響，咱就馬上感覺「是毋是上帝無聽我的祈禱？」信心毋是一種「凡事攏非常安逸閣順利」的特別感覺，信心是「我相信上帝佇我生命中的帶領」。咱的祈禱就是一款的交託，只要單純相信上帝疼祢、相信祂講話算話，咱將凡事交託祂，一切就通安心放手。