◎承擔上帝互咱的使命(以斯帖記四10-17)     賴信頌牧師

    今仔日是聖靈降臨節，是基督教的重要節日，它原本是猶太教的五旬節，是慶祝小麥豐收以及紀念上帝佇西奈山頒布律法的日子。就佇耶穌復活升天後的第10日，門徒聚集作伙，聖靈親像透大風及分開的火舌降臨佇他們身上，佇遐門徒得到能力，開始用各國的方言宣講福音，打破語言隔閡去傳揚上帝的作為，那一日約有三千人信主受洗，所以聖靈降臨節也被稱作「教會的生日」。聖靈降臨的目的就是要咱佇天邊海角為著基督做見證，所以咱要承擔上帝互咱的使命來走向世界。這個聖靈到今猶原佇咱的心中運行，帶互咱有氣力佇逐所在承擔上帝互咱的使命來見證祂。

    今仔日這段聖經提著一個人----就是以斯帖，她佇以色列面對真大危機的時，承擔起上帝互她的使命。那時波斯帝國是亞哈隨魯王統治的時期，猶太人因被掠而分散佇外邦，雖然能夠佇帝國生活，但是身份被看輕，常常成做被政治鬥爭的犧牲品。哈曼因為看著末底改毋對伊跪拜，就滿腹受氣，就策劃全面消滅猶太人。哈曼用亞哈隨魯王的名義，蓋王的手指印頒布詔書，詔書頒布後，末底改撕裂衫而哀哭，來尋以斯帖的幫助。末底改勸以斯帖毋通想講你佇王宮內比其他的猶太人較安全就恬恬，是要看見上帝互她的使命，就對她講：「你會當做王后豈毋是為著今仔日此個危機？」（14）。這是這個事件轉折點，以斯帖看見末底改的態度而感動，就要求全城猶太人三日三眠禁食，自己及宮女也禁食，然後才冒險入去見王。

    這段記載互咱看見，以斯帖佇面對危機的時，她願意勇敢承擔這個使命，她明白自己的位置及機會是上帝所安排的；同時她要大家禁食祈求，就是欲互咱看見，信仰毋是孤軍奮鬥，而是彼此扶持、共同尋求上帝的幫助，這留互咱真媠的見證，咱也應該學習這款的態度來承擔上帝互咱的使命。只要咱願意，就可以實現這個使命，咱可以用三點互相來激勵：

●咱現在的位置，毋是偶然

    以斯帖本來是一個平凡的孤兒，卻佇上帝安排下面成作王后，所以末底改提醒她：「你會當做王后豈毋是為著今仔日此個危機？」（14）當咱欲承擔使命的第一步，就是要意識到咱現在的身份就是咱的使命。上帝將咱囥佇遮的位置上，就是上帝要你佇那個所在發揮的影響力，這是上帝的旨意毋是偶然。

●用現有的資源踏出腳步

    上帝要咱踏出腳步，祂看重的是咱手中的「五餅二魚」，毋是要咱承擔互「五千人吃飽」的責任，當咱願意踏出腳步，上帝超自然的能力才會加入來。面對以色列滅族的危機，以斯帖一開始也真驚惶，畢竟隨便去見國王可能會沒命，但她並無逃避，而是使用她當時的優勢，就是「王后的身份」及「傑出的廚藝」，勇敢來為同胞求情。有時咱認為欲承擔使命要真有資源、真有金錢、真有能力等，但是上帝往往是看咱是毋是「有心」，咱可以用現有的資源來承擔上帝互咱的使命。

●因為疼所以勇敢付出

    人若無「疼」，大概攏是掠自我作中心，別人的事及我無關係。當末底改將滅族的消息傳互以斯帖的時，她想著自己的同胞將欲面臨的慘劇，她被「疼」來叫醒，願意冒著生命危險去承擔，她講出「我若著死，就死」的決心，這是因為疼，所以她願意勇敢來承擔。

    上帝將咱每一個人囥佇無同的位置，無論是家庭、職場或是社會，攏可能是上帝特別安排的使命。佇工作或是社會中，咱常常要面對保持安逸或是承擔責任的選擇。承擔使命毋是要咱去拯救世界，是佇上帝給咱安排的位置上成作光及鹽。