◎上帝所賜的幫贊者(創二18，出二1-8)       賴信頌牧師

    佇創二18主上帝講：「彼個人家己一個住毋好；我欲給伊造一個幫贊者來匹配伊。」這互咱看見，上帝創造查某人有一個重要的任務，就是成作查甫人的幫贊者來匹配伊。「幫贊者」這字的原文字根是真神聖的，因為佇詩篇中多多擺形容上帝是人類的「幫贊者」也是用這字，這互咱看見查某人的幫贊就親像上帝對人的幫贊同款重要。

    夏娃是上帝賜互世間人第一個母親，她是丈夫及子兒真重要的幫贊者，她是上帝派來成作咱生命的同伴，幫贊咱佇生命的欠缺中走向完整，共同彰顯上帝的形像，這是上帝互每一個母親先天的使命。

    佇摩西出世的記載中，有一個真特別的景象，就是摩西可以順利長大，後來成作以色列人的領導者，是因為有多多查某人的幫贊，經文中提著埃及王的查某子、宮女、摩西老母及阿姊，以及無提著的產婆等，雖莽這段經文的前後有提起𪜶的名，但是佇遮卻攏無提起，這互咱看見，遮的查某人攏是上帝賜互摩西的幫贊者。上帝透過這幾位不同身份的查某人來完成祂的旨意。

    佇過去甚至現代的環境中，女性「幫贊者」的身分常常被誤解是附屬或是次要，但是佇遮咱會發現，遮的查某人的「幫贊者」是主動的、也是充滿智慧及拯救的，這款的幫贊咱佇母親的身上也可以經歷著。

●這個幫贊者是「守護」

    當時的法老頒佈種族滅絕的命令，佇這死亡陰影的威脅下，摩西的老母約基別並無屈服及驚惶，經文描述她「看伊真古錐，就給伊藏三月日」，她展現出超凡的勇氣及守護的決心，無顧王的命令，冒著全家生命的危險將他藏起來。後來囝仔漸漸大，無法度閣藏，摩西的老母並無絕望或是放棄，她就提一個蒲草做的籃仔，用打馬膠及柏油糊互伊𣍐洩水，將嬰仔囥佇內面，然後將籃仔囥佇尼羅河邊的蘆葦中間，這顯出這個幫贊者佇絕境中毋是放棄，是猶原佇尋找守護的機會。

●這個幫贊者是「超越」

    上帝也使用埃及的查某人來成就祂的旨意，當法老的查某子看見嬰仔，雖莽知這是希伯來人的後代，應當處死他，若是她卻憐憫他，超越對敵的立場發出幫贊者的光，決定收養他。這個「幫贊者」願意打破種族的仇恨、階級的高低以及王的命令，這是一款超越的氣力。上帝互查某人閣卡多超越的特質，這款的特質佇社會或是家庭中攏是真要緊的，可以幫助人及人之間有超越的結合，來修復破碎及緊張的關係。

●這個幫贊者是「智慧」

    佇這段經文中的查某人攏充滿智慧，對產婆的接生、老母將他藏起來、阿姐的介紹、宮女守秘密、公主的收養以及最後老母成作奶母等，這一連串的過程攏充滿智慧，互摩西的生命佇遮的幫贊者的智慧中得著保護，這款的智慧毋只是個人的領受，是上帝互遮的智慧結連做一夥的結果。遮的查某人的智慧共同創造了接續的故事，成全上帝美好的計畫，毋若救了一個囝仔，也間接拯救了一個民族。

    聖經中用「幫贊者」來形容查某人的重要性，也用「幫贊者」來形容上帝對人類的幫贊，所以這個「幫贊者」毋是隨便的，是上帝特別安排佇咱的身邊的幫贊。咱每一個人攏有上帝所賜的幫贊者，就是咱的老母，她有遮的「幫贊者」的特質，欲用守護、超越及智慧來幫助咱，互咱的生命成就上帝佇咱身上的美好旨意，這是一件辛苦閣需要犧牲的事，欲成作這款的幫贊者實在無容易，咱兼毋免感謝老母為咱所作的？