◎對受苦到榮耀(林後四8-10)                賴信頌牧師

    蔡瑞月老師（1921-2005）被稱作「台灣現代舞之母」，她的一生毋若是台灣舞蹈史的縮影，更加是一篇佇政治苦難中堅持藝術及生命的詩篇。蔡瑞月老師是一位基督徒，信仰對她的生命及舞蹈生涯有真大的影響。佇1937年，她說服父母，就自己前往日本東京，進入當時現代舞的先輩「石井漠」及「石井綠」的舞專學習。1946年第二次世界大戰後，她搭著「大邱丸」號轉來台灣，佇船上創作了經典的舞曲----《咱愛咱臺灣》及《印度之歌》，回台後，她就佇台南及台北開設舞蹈教室，開始了台灣現代舞的啟蒙時代。

    蔡瑞月老師經歷二二八事件、丈夫雷石榆被趕出來灣，以及她自己被關佇綠島等的艱苦歲月，她常透過唱詩歌及祈禱來尋求心靈的安慰及氣力。蔡瑞月老師有一個信念，就是「雖莽佇最壞的年代，她猶原繼續跳舞」，雖莽面對當時政府打壓來破碎，她卻親像海燕般勇敢向前。她的生命就親像今仔日這段經文所講：「阮常常抵著逐款困難，毋拘無屈服；抵著絕境，毋拘無絕望；受著窘迫，毋拘無受放拺；受拍倒，毋拘無致到死。」(林後四8-9)雖莽她的一生多多擺被環境「打倒」，但是她內在的信仰及藝術的靈魂對生命的熱情互她無被捆綁。

    今仔日這段經文提醒咱，基督徒的生命毋是無有苦難，是佇苦難中顯出一種「打未倒」的韌性，當咱的生命「對破碎中活過來」，就是對受苦到榮耀，佇每一個「苦楚」後面，攏接續一個「恩典」。

●抵著逐款困難，毋拘無屈服

    困難可能會限制咱的生命，卻不能綑綁咱的心靈，咱可以選擇認輸麻可以選擇無屈服。真多時陣咱要面對生活中多多的壓力，工作、家庭、經濟的負擔互咱喘未過，親像咱互四圍的墻將咱圍佇，但是保羅給咱講，抵著逐款困難，毋拘無屈服，因為咱相信上帝已經為咱打開的「天頂的窗」，祂欲將咱需要的氣力拚互咱，環境閣卡困難也未互咱屈服。

●抵著絕境，毋拘無絕望

    「絕境」在原文中有「走頭無路、無計通施」的意思，代表遇著真大的困境，致到咱看未清頭前的路，甚至毋知道下一步欲怎樣走。雖莽生命中咱有時會饒疑、會無助，但是這並無代表咱就要放棄，因為我們的盼望毋是建立佇「咱所看見的路」，而是建立佇「上帝牽咱行的路」，當咱有這款的看見就無絕望，這個無絕望是咱深信佇上帝內面咱猶原「可能性」，雖莽自己已經用盡了所有的方法，這並無代表上帝已經無有辦法。這是一種謙卑的盼望，願意邀請上帝的氣力來介入。

●受著窘迫，毋拘無受放拺

    有時咱會受著窘迫的時，互咱佇人生的路摔尬鼻青面腫，互咱有一種被棄捨的感覺。但是咱請記佇，受著窘迫不等於失敗，咱要相信兼採全世界攏越身離開咱，若是咱的上帝從未佇咱落魄的時越身離開，咱相信上帝超越的手欲將咱牽條條，祂欲將咱對土糜中抓出來，扶持咱重新站在。支持咱的氣力是那位創造生命的主。

●受拍倒，毋拘無致到死

    這是描述一種毀滅性打擊，這個沉重的打擊，將咱打倒佇土腳，看起來咱已經徹底輸尬脫褲，若是咱生命的中心卻依然無損害的堅固精神。親像佇拳擊場上，被打倒並無代表比賽結束，只有無法度站起來才是失敗。雖莽咱可能會互外在打倒，但是咱拒絕就按呢就結束。第十節互咱看見為什麼咱的生命要經歷世間的苦難，因為遮的苦難攏親像咱帶著耶穌的傷痕，來活出生命的榮耀。