◎恩典的記號(創世記卅二22-32)             賴信頌牧師

    今仔日這段記載是雅各生命中最重要的轉捩點，他過去欺騙老父及兄哥，經過多多年的逃亡，也積聚了財富，如今他欲重新面對兄哥以掃。就佇雅博河的渡頭這一眠，雅各孤單一人及上帝相偃到佇天光，上帝透過這場特別的方式，佇雅各的靈魂及身體留落了上帝恩典的記號，遮的記號互他的人生無閣同款。佇咱每一個人的身上攏有遮個記號，咱有感受著無？

●第一個恩典的記號是「上帝主動來尋他」

    雅各的一生，咱可以用「抓」這字來形容，佇出世的時抓兄哥的腳出來；大漢了後抓大子的名分、抓老父的祝福；佇拉班的厝抓財產、抓妻兒。他是一個充滿計謀的人，總是掠作靠著自己的手，凡事就攏妥當，但是就佇今仔日，他面對人生最大的困境。前面是兄哥以掃導四百個人衝過來，後面是早就撕破面的丈人拉班，他進無路退無步，這世人所累積的財富及聰明，面對現今遮的威脅無有作用。

    就佇這個孤單無助的時，有一個人來及他相偃，直到天光。這個情景真特別，毋是雅各去找上帝，是上帝主動化作人來找雅各，這互咱看見這個恩典的本質，就是上帝不愛雅各繼續靠著自己的聰明，祂欲親自介入。上帝毋是直接用祂的刑罰，是及他相偃。過去的雅各掠作靠自己的氣力就可以贏過天、贏過人，若是今仔日上帝親自及他相偃，就是欲互他知：「你的氣力閣卡大，也贏未過生命的掌權者。」

●第二個恩典的記號是「生命的傷痕」

    彼個人看偃𣍐贏雅各，就搧伊的大腿臼；相偃的時，雅各的大腿臼脫輪(25)。這是一個真特別的結果，雅各認為自己真有氣力，甚至及上帝相偃也無卡輸，但是上帝只輕輕摸一下，他的大腿臼就脫輪。上帝搧雅各大腿臼的筋互他跛腳，這看起來親像是傷害，其實是上帝主動留落來的「記號」，因為上帝知道如果雅各這擺閣靠自己的精明度過難關，他就會真緊閣未記得上帝，這道傷痕互雅各以後每走一步，就是佇提醒自己：「我無閣是那個靠自己的雅各，是偃輸上帝的那個人。」

    雅各佇跛腳後才當頭對面見著上帝，這也提醒咱，咱佇順境中只認識上帝的名，卻佇逆境的中當頭對面見著祂。生命的傷痕見證了佇黑暗中上帝無放捨咱，是上帝曾及咱同行的榮光記號，傷痕毋是證明咱被打敗，是證明咱曾佇軟弱中互上帝的手保護過。

●第三個恩典的記號是「新的名及生命」

    佇天欲光的時，那人欲走，雅各卻抓條他講：「你若無給我祝福，我毋放你去。」這時上帝問了他一個關鍵問題：「你號做什麼名？」上帝兼毋知他叫雅各嗎？當然知道，這句話是佇問他：「雅各，你認識自己是誰嗎？」當雅各報出他的名那時，就是他向上帝承認：「我就是那個一世人只想欲贏、一世人攏佇騙人的雅各。」接續上帝互他一個新的名----「以色列」，代表他及上帝及人拼輸贏攏較贏。這場勝利毋是雅各打贏上帝，是雅各「得著了上帝的祝福」。

    後來雅各就給彼個所在叫做比努伊勒，意思是「上帝之面」，所以他講：「我當頭對面見著上帝，我猶無死。」(30)佇過去的觀念中，罪人若見到上帝的面是必死無疑的，所以互雅各最著驚的是：「我猶無死」。照著雅各過去種種的欺騙、搶奪的行為，他是不配得上帝的祝福，若是上帝賞賜他一個新的生命，這個新生命毋只是肉體猶包誇靈魂。

    故事最後提到：「雅各離開比努伊勒的時，日頭照著伊。雅各跛腳，因為大腿已經脫臼。」(31)「日頭照著伊」，表示他心中已經無閣黑暗，雖莽已經跛腳卻是他蒙福的開始。