◎認真活啲(詩篇卅九5-7)

    詩人用「氣」、用「影」來形容人生的有限，他提醒咱呣通將時間浪費佇人無法度掌握的代誌，咱的一生如影，真緊就過去，若只是追求世間的事，到尾是無採工。雖莽生命要面對多多的無奈，但是詩人並無陷入佇絕望中，而是轉向上帝講：「我的向望在佇你」，這是一個最重要的選擇。雖莽生命有限，但是因為有上帝，有限的日子也可以活尬有意義及價值，所以咱要認真活啲，咱應該怎樣認真活啲呢？

●生命有限，要珍惜時間

    生命有限，就親像聖經所講：「你互我的日子實在真短；我的歲壽對你看起來差不多是無；人不過是一個氣。」（5）時間佇咱的手中親像氣互咱抓未條，這互咱看見，人生毋是一條永無停止的路，而是一段有限的旅程。這個有限並毋是欲互人驚惶，而是要咱知道怎樣去珍惜。

    生命有限就是欲提醒咱要認真活啲，毋只是將時間囥佇追求世間的物質，也要將生命投資佇超越物質的事上，互有限的生命活出無限的意義。所以生命的有限毋是欲互咱失志，而是欲提醒咱：要去珍惜、毋通拖沙，把握時間去做「對」的事，互有限的生命成就上帝互咱的使命。

●看透世事，無受迷惑

    世事如煙，表面上看起來真妥當，往往一目暱久就消失，親像人佇追逐金錢、地位、名聲，掠作按呢就可以帶來安全感及滿足，但是遮的事物親像霧氣，早起時猶佇遐，日頭一出來就消失，未久長佇啲。咱若只將心囥佇遮的短暫的事物上，最後必定會失望，因為它們不能真正支持咱的生命，佇死亡面前無有甚麼價值。

    佇世間欲無受迷惑是無簡單的事，當世間人給咱講「甚麼才是成功」、「甚麼才是快樂」、「甚麼才是幸福」的時，你的心兼會受影響，當多多人攏按呢講的時，咱兼猶原可以堅定咱的信仰。只有看透世事，才未互虛假的事所迷惑，咱若只是跟隨潮流佇行，真緊就會失去方向，所以看透世事並毋是要咱消極，是要咱更加積極來選擇有價值的事，只有無受迷惑，才可以佇短暫的人生中活出真正的自由及盼望。

●仰望上帝，找著盼望

    詩人最後講：「我的向望在佇你。」這是佇提醒咱，盼望不在短暫的事物，是在佇永遠的上帝。仰望上帝就是佇有限的人生中找到永遠的盼望，因為這世間的事常常互人失望，咱掠作可以倚靠的事物，最後攏未永遠佇啲。當咱將眼光轉向上帝，就會發現祂才是唯一不變的根基，祂的話語是真實的，祂的疼永遠佇啲，祂的應許是可靠的。

    盼望毋是憑空想像，是因為咱知道有一位掌管生命的主，祂欲互咱佇黑暗中看見光，佇困境中找著出路，佇失望中重新得著氣力，祂必定未放捨咱，這款的上帝當然就是咱人生的向望。人生有限，事事難料，但是上帝的恩典卻是永遠的，當咱選擇仰望祂，就無閣被環境影響，而是活出堅定的信心，這樣的盼望，毋只是安慰自己，更加是咱繼續向前的氣力。

    人生的日子是有限的，咱認為最妥當的時也是充滿空虛。咱認為努力追逐金錢、地位、成就就是認真活啲，卻未記得遮的攏無法度互咱保障。科技再進步、生活再利便，麻無法度互咱所有的永遠佇啲，所以詩人看透這一切，他最後將盼望囥佇上帝的身上，才互他突破生命的無奈。當咱知道仰望祂，就能佇有限的人生中找到氣力及方向，無閣無閒一世人卻是空空，而是活尬有意義、有盼望，這才是認真活啲。當咱願意注神佇上帝的身上，短暫的日子就欲活出永遠的價值。