◎持守信仰到路尾(提後四7-8)             賴信頌牧師

    神學家潘霍華佇1906年出世佇德國布雷斯勞，出身佇知識分子的家庭，老父是精神科教授，老母是敬虔的基督徒，他自細漢就開始接受聖經的教育。他後來佇柏林大學研讀神學，受著瑞士神學家卡爾‧巴特的影響真大，他的神學強調基督的中心性。佇1930年代，面對納粹政權操控教會，他就積極參與「認信教會」，就是一個基督徒抵抗運動，目的就是反抗納粹政權對教會的操控，堅持教會只屬佇基督，不受政治支配。

    後來他因為參與抵抗運動及反希特勒計畫而受逮捕。佇1945年4月9日，在弗洛森比格集中營被處吊死，那時只有39歲，他受刑之前猶原用祈禱及平安見證信仰。潘霍華的一生提醒基督徒的信仰毋是抽象的理念，是要佇黑暗的世代中付出代價來跟隨。他用生命見證「作門徒的代價」，佇納粹壓迫下猶原堅持真理，最終殉道，他佇苦難中持守信仰到路尾。

●信仰要付出代價

    咱毋通認為信仰真初俗，只是停留佇嘴唇頂面，毋免實踐佇生活，也毋免付出代價，其實信仰是要佇黑暗的世代中勇敢行動。親像咱佇談戀愛，毋是只是講「我愛你」，而是要付出時間、心力及情感來交陪，咱的信仰也是按呢，毋只是佇口頭上講「我信耶穌」，是要佇生活中真實跟隨祂。信仰是要付出代價，親像耶穌呼召咱走上十字架的道路，耶穌講：「欲隨我的人，著否定家己，逐日夯家己的十字架來隨我。」（路加九23）保羅也見證講：「那美好的仗我已經打過了，當跑的路我已經跑盡了…」（提後四7）

    潘霍華佇納粹時代，因為堅持信仰而被抓，最後殉道，他的一生提醒咱：信仰毋是初俗的，是寶貴的恩典，需要付出代價。信仰要付出代價，就是要學習放落自我、拒絕不合上帝心意的事，甚至願意承受損失。雖莽這條路不容易，卻是真正通往生命及賜福的道路。

●教會要成作時代的良心

    佇日常生活中，咱常常會聽見「良心」這字，良心就是佇提醒咱什麼是對、什麼是毋對。當一個人做毋對代誌，良心會互他感到不安；當他做對的代誌，良心就會帶來平安，所以教會佇社會中，也應該扮演「良心」的角色，站佇對的這旁。因為當人佇追求利益、權力及享樂的時，可能做出無公義的事，這時教會的存在，就要親像交通號誌提醒人要停落來或是進前，教會的聲音佇社會中要互人行佇正路。

    教會毋只佇禮拜中謳咾感謝，是要佇生活中成作模樣，互人看見上帝的疼是真實的。教會要成作時代的良心，互信仰毋只是理論，是佇生活中的呼召，當咱活出信仰，教會才能成作這世代的光及鹽，互人看見上帝的美善。

●信仰的盼望欲超越死亡

    佇咱的生活中，死亡常常被看作是最後的結局，所以人會驚死亡，因為人認為死亡就會互咱失去所有的一切。有人因為失去親人而感到絕望，但是聖經給咱講，信仰帶來的盼望是超越死亡的。對基督徒來講，死亡毋是生命的終止，是進入永遠的開始。耶穌講：「我是閣活，是活命；信我的人雖然死，猶久會活。」（約翰十一25）這句話提醒咱，死亡是通向永遠活命的一扇門。

    潘霍華因為信仰被處死，他欲接受吊死之前講：「這是終局，卻是生命的開始。」他的話就是佇表明信仰的盼望，就是死亡毋是失敗，是進入永遠的得勝，這款的盼望，互咱能夠佇今生中勇敢活出疼及真理，並且得著上帝所應許永遠的生命。死亡毋是最後的句點，是通向永遠的門。