◎盼望及信仰的根基(林前十五14-17)         賴信頌牧師

    佇整個基督教信仰的中心，無有一個比耶穌基督的復活閣卡重要的事，祂的復活毋若是一個歷史的事件，更加是信徒生命的盼望及信仰的根基。耶穌基督的受死及復活，顯明了上帝對人類的疼，若無復活，基督教的信仰就失去意義，也因為耶穌真正復活，咱才有永遠的盼望。

    保羅講：「基督若無閣活，恁的信就無路用，恁就猶佇罪惡中。」(17)這句話是佇提醒咱，復活毋是一個象徵，是一個真實的事件，耶穌的復活證明祂是上帝的子，祂的應許是真實的，祂的救恩是可靠的。所以復活的主交代咱要去傳福音，咱帶著這個使命佇逐所在為祂作見證，咱毋只是停留佇信心的領受，是要互耶穌的復活影響咱的生命。

●復活帶互咱永遠的盼望

    死亡佇人類歷史中一直是最後的限制，但是耶穌的復活宣告了祂已經贏過死亡，親像林前十五55所宣告的：「死啊，你的勝利佇叨位？死啊，你的毒刺佇叨位？」這提醒咱，這個死亡因為耶穌的復活無閣是結局，而是通往永活的門，耶穌為咱打開一條通往永活的道路。所以保羅講：「若基督無閣活，按呢阮所宣揚的是空空，恁的信嘛是空空。」(14)因為有永遠的盼望，咱的信仰才有意義。

●復活是新生命的開始

    耶穌基督的復活毋若帶互咱永遠的盼望，也是咱今日的氣力，祂的復活欲互咱經歷新的生命，親像對舊人轉變做新人，互咱毋閣互罪惡及死亡捆綁，是佇祂的內面得著更新。所以佇林後五17給咱講：「按呢，無論什麼人，若及基督結連就是新創造的人；舊的已經過去，今攏變做新的。」

    耶穌的復活互咱開始一段全新的生命旅程，這個新生命毋只是外在的改變，是內心的更新，互咱的生命可以活出信心、盼望及疼。新生命毋只是為了自己，是欲成作見證，互閣卡多人因為咱的生命看見基督的真實，親像世間的光及鹽帶互別人福氣。

●復活是咱信仰的根基

    佇基督教信仰中，耶穌的復活是最重要的根基，若無復活，咱的信仰就失去氣力，但是因為祂真實復活，咱的信仰才有堅固的根據。基督的復活是信仰的印證，因為祂毋只是一位有智慧的老師或是殉道者，更加是永活的救主。這個復活顯明耶穌的神性，證明祂所講的每一句話攏是真實通信的，這互咱的信仰無閣建立佇人的理論或是學問上，是建立佇一位活活的主身上。

    耶穌死佇十字架頂，佇第三日復活，這顯明祂的救贖已經完成，祂的復活完成上帝交代祂的工作，互咱得著救恩，咱的罪也得著赦免。有復活的確信，咱的信心無閣是空想，是建立佇一位永遠活啲的救主身上。

    基督的復活是咱信仰的基石，是盼望的泉源。祂的復活互咱有永活的確信、更新的生命、堅固的信心，來活出祂所歡喜的樣式，因為祂真正復活，咱才有真正的盼望與信仰的根基。復活節毋只是教會內的一個慶典，它也欲影響咱的日常生活，當咱相信耶穌復活，就能佇生活中活出盼望。

    復活節提醒咱，信仰毋是靠自己努力，是要靠復活的主，祂已經贏過死亡，祂也欲帶領咱走過人生的挑戰。對每一位信徒來講，復活節是咱信心的記號，互咱知道自己並無孤單，因為耶穌永遠及咱佇啲。願咱因為耶穌的復活，重新得著信心及氣力，堅持走佇這條信仰的道路上。