◎這是一條持續的路(歌羅西書二6-7)         賴信頌牧師

    棕樹主日是基督教信仰中真重要的一日，是耶穌欲進入受難的開始。佇聖經記載，耶穌佇這日騎著驢仔子進入耶路撒冷，群眾拿著棕樹枝喊講「和散那！」，這象徵他們迎接耶穌親像一位國王入城同款。棕樹枝佇猶太文化中代表勝利及榮耀，所以這日是充滿歡喜及盼望的，但是同款遮的群眾，佇幾日後卻喊講「釘祂十字架！」。棕樹主日提醒咱，信仰毋只是表面的呼叫，是要真實跟隨耶穌走上十字架的道路。跟隨耶穌的路毋是一時的感動及謳咾，是一條持續的路，毋是短暫的情緒，是持續的委身，欲持續這條路，有幾個要緊的點：

●要釘根佇基督

    信仰會互咱充滿熱情及盼望，但是有時也會面對饒疑及挑戰，今仔日的經文提醒咱講：「既然恁有接受基督耶穌做主，就著及伊結連來生活，照恁所受的教示，佇伊內面釘根受起造，信心得著堅固，充滿感謝。」（西二6-7）這段經文互咱看見，信仰毋是停留佇表面，是要深深釘根佇基督，因為人的情緒會改變，但是基督永無改變，信仰需要親像植物同款，將根釘互深才能久久長長。當咱將生命的根深深釘佇基督內面，咱就會發現，雖莽外在的環境變化，咱猶原可以有平安及氣力，要釘根佇基督來成長，互咱結出屬靈的果子，來榮耀祂名。

●要用信心來選擇

    當咱釘根佇基督，才會互咱信心得著堅固，有信心才會有正確的選擇。信仰的路需要常常面對選擇，咱要選擇遵守主日或是出外七逃？咱要選擇用自己的意思或是照基督的教示？咱要選擇倚靠人的氣力或是相信上帝的應許？聖經提醒咱講：「因為咱啲活，毋是靠目睭看，是靠信心。」（林後五7）所以真正的選擇毋是依靠環境或是自己，是憑著對上帝的信心。願咱毋是靠目睭看，毋是靠自己的感覺，是靠信心堅定來跟隨基督，當咱按呢行，上帝必定欲佇你的生命中顯出祂美好的旨意。咱要用信心選擇相信祂的信實、用信心選擇依靠祂的恩典、用信心來持續這條路，互咱所選擇的合佇上帝所歡喜。

●要堅決持守所信的

    信仰毋是一時的感動，是一生的旅程，所以希伯來十23：「咱著堅決持守所宣認的向望，因為應允咱的上帝可靠。」這提醒咱，欲堅決持守所信的並毋是一條容易的路，所以咱毋是靠自己的氣力，而是因為咱所信的上帝可靠，所以祂既然應許咱，祂就會成就，咱就通放心來堅決持守所信的來跟隨基督。所以耶穌曾講：「我有將諸個代誌給恁講，是欲互恁佇我內面有平安。佇世間恁有苦難，毋拘著勇敢，我已經較贏世間。」（約翰十六33）這句話互咱極大的安慰，咱所面對的困難毋是結局，而是信心的考驗。 

    咱所信的毋只是理念，是永遠的真理，是真正帶互咱幫助的信仰，無論所經過是甚麼環境，持守到路尾的欲得著福氣，所以聖經講：「信是對所向望的事有把握，對無看見的事會當肯定。」（來十一1）當咱堅持信靠上帝，雖莽眼前看未著結果，祂猶原佇黑暗中著作工。當咱無放棄，上帝的疼欲成作咱的氣力，祂互咱的盼望永無失敗。   

    這群跟隨耶穌的人，一時歡呼，一時背叛，顯出人心是真容易受影響來改變的，這也互咱再次看自己，咱是毋是佇表面上迎接耶穌，私底下卻是行向顛倒的方向？咱欲避免這款的軟弱，就要持續操練咱的信仰，毋是情緒化的反應，是願意謙卑來委身佇基督。咱信仰毋是自己行，是及主同行，是及眾信徒同行，佇彼此扶持、彼此激勵中來向前。咱要釘根佇基督、要用信心來選擇、要堅決持守所信的，互咱生命不斷被起造。