◎毋免驚(馬太十26-31)                     賴信頌牧師

    生命中難免會有不安的時，咱會去想：工作兼會穩定？家庭兼會和睦？健康兼會維持？未來的路兼會順利？遮的問題常常互咱的心中驚惶，但是佇聖經中一再提醒咱：「毋免驚，因為上帝及咱同在。」當咱面對新的開始，常常互人閣期待閣驚受傷害，期待的是盼望新的開始、新的機會，互咱有新的福氣；但是卻也因為要面對未知的挑戰，遮的未知的事可能會互咱受傷害。如果咱一直踮佇驚惶的中間就會互咱毋敢向前，所以咱需要信心來踏出咱的腳步，佇新的一年咱毋免驚，相及用信心來迎接上帝為咱安排的計劃。

●毋免驚人的誤解（26）

    第26節講：「所以，毋免驚𪜶；因為無一項掩蓋的𣍐露現；嘛無一項祕密的𣍐互人知。」這句話的意思就是：真理未永遠被掩蓋，雖莽有時咱佇生活中會被誤解，甚至有人故意抹黑咱，但是耶穌提醒咱，咱毋免驚人的眼光，因為有一日人的計謀攏欲露現出來，真相最後會顯明。新的一年的開始，咱心中帶著期待但是卻也會陷入佇驚惶的中間，因為咱真容易活佇別人的評價中，驚別人不喜歡、驚被誤解、驚被批評，請咱會記得，人的眼光毋是最終的標準，上帝才是。

●毋免驚世上的威脅（28）

    佇28節講：「會害死身軀卻𣍐害死靈魂的，恁毋免驚；顛倒著驚會將靈魂及身軀㧒落地獄毀滅的上帝。」人認為世間最大的威脅就是死亡，但是佇遮對咱講：人能傷害咱的身軀，但是不能奪走咱的靈魂，真正值得敬畏的，是上帝毋是人。人的能力有限，最多只能夠傷害咱的身軀，卻不能奪走咱的靈魂，所以真正掌管永遠的是上帝。

    世間的威脅互咱會驚惶，咱會驚失業，因為失去工作就好親像失去價值，但是耶穌提醒咱，生命的價值不在工作，是在佇上帝的手中。咱會驚病痛，因為若無健康咱就無法度作什麼，但是耶穌提醒咱，靈魂的平安比身軀的健康更加重要。咱麻會驚別人的威脅或是批評，但耶穌提醒咱，人的話語不能決定咱的永遠，咱要學習將焦點囥佇上帝的主權中，毋是屈服佇世間的威脅。

●毋免驚欠缺（29-31）

    佇29-31節講：「兩隻雀鳥仔豈毋是賣一角銀若定？恁的天父若無允准，連一隻都𣍐跋落地。恁咧，連恁的頭毛都攏有算過。所以，毋免驚，恁比歸群雀鳥仔閣較貴重！」佇耶穌那個時代，雀鳥仔是最俗的食物，無人會去看重它，但耶穌講，連雀鳥仔的生死攏佇上帝的掌管之中，何況咱是祂的兒女，祂甚至連咱的頭毛攏數過，表示祂的關心咱到極，所以咱毋免驚咱所欠缺的，只要倚靠祂就夠額。請會記得上帝掌管一切，祂的看顧未漏勾任何的細節。咱要將敬畏的焦點囥佇上帝，毋是囥佇人或是環境。當咱知道上帝看顧一切，咱就能夠勇敢活出信仰，毋免驚別人怎樣講。請會記得上帝連雀鳥仔攏會養活，祂更加會供應咱的需要。

    今仔日這段經文的中心信息就是：「毋免驚，因為上帝看顧咱」。新的一年，咱可能會遇著誤解、威脅、欠缺，但是耶穌提醒咱：真相會顯明，毋免驚人的眼光及誤解，氣力是在佇上帝的手中；毋免驚人的威脅，上帝欲看顧咱；咱毋免驚生活的欠缺，上帝是賞賜一切的源頭。這三個「毋免驚」，欲支持咱的信心，咱要勇敢活出咱的信仰。所以面對新年，咱可以勇敢地宣告講：「面對新年，我毋免驚，因為上帝及我同在！」因為祂的同在欲帶來平安、價值及勇氣，雖莽毋知未來是怎樣，但是上帝的同在是咱生命最真實的保障。