◎數算主恩來迎接新年(申命記十一10-12)                                                                   賴信頌牧師

    每擺欲進入新年之前，咱的心中攏會有一種複雜的感受，咱會去想新的一年會按怎，工作兼會順利？家庭兼有平安？身體兼會健康？因為咱毋知未來會遇著甚麼代誌。但是今仔日這段經文給咱講，上帝的看顧毋是一時的，是歸年迵天啲照顧，所以咱就通將新的一年交佇祂的手中，互祂來為咱導路。

●回顧過去

    一目暱久一年又閣欲過去，上帝互咱每一個人攏走過不同的路徑，有歡喜、有挑戰也有目屎。有人經歷了工作上的壓力，有人面對家庭的艱難，有人佇病痛中掙扎，也有人面對生命的生離死別，但是咱同時也是佇經歷上帝佇這中間的作為。兼採所經過的一年並無完美，但上帝的信實是永無改變的。  

    回顧過去並毋是欲互咱陷入後悔或是自責中，而是要用一種謙卑、感恩的心來看待，這款的態度就能幫助咱佇反省中成長，毋是佇後悔中停止。所以保羅佇腓三13講：「兄弟姊妹，我無想講家己已經得著。我只有專心一項，就是𣍐記得後面的事，拍拼追求頭前的事」，咱呣免否定過去，是要用正確的態度面對過去，然後繼續向前來拍拼。

●數算主恩

    咱若可以用數算主恩的態度來看過去，就會幫助咱勇敢踏入新的一年，因為咱有看見過去上帝的看顧，咱就可以相信毋管頭前的路是怎樣，祂的恩典必定夠額咱用。當咱願意將上帝的恩典數算出來，咱就會發現，過去的一年兼採無完美，卻是充滿上帝的恩典，因為上帝的恩典無所不在。

    數算主恩毋只是佇嘴頂講「感謝」，是要對心底真實的回應，是用行為來證明。咱要感謝上帝賜落生命及喘氣，互咱逐日醒起來猶有機會謳咾祂；咱要感謝上帝佇困難中賜咱氣力，互咱無倒下：咱要感謝上帝透過多多人陪伴及幫助，互咱的生命並無孤單。佇詩篇一○三2講：「我的心神啊，著稱讚上主！毋通𣍐記得伊一切的恩惠。」當咱越數算主的恩典，就會發現上帝的疼比咱想像的閣卡多，是超過咱所想所求的。

●迎接新年

    歲末毋只是結束，也是新的開始，佇以賽亞書四三19應許咱講：「我啲欲做一項新的事，此陣已經啲發生，恁豈毋知？我欲佇曠野開道路，佇沙漠開江河。」新的一年上帝欲有祂的作為佇咱的內面，咱會期待又閣不安，期待的是未來將有新的開始；不安的是，我兼有氣力去面對遮的未知的事。今仔日咱要勇敢迎接新年，毋是要咱突然間變強大，是要咱佇日常生活中，相信凡事攏有祂美好的安排。所以當咱欲迎接新年，咱要提醒自己，上帝賜互咱新的一年，就是新的機會，咱要勇敢踏入新的開始。 

    當咱的生命若只注意咱所不足的，就會常常失望，但是當咱所注意的是上帝的恩典，就可以帶著氣力走向新的一年。新的一年一定有挑戰，但是咱要用樂觀的態度去面對，因為面對未來，咱最需要的毋是人的氣力，是上帝的同在及看顧。所以聖經提醒咱：「著專心倚靠上主；毋通倚靠家己的聰明。佇你一切的所做攏著尊重伊，伊會指點你的路。」（箴三5-6）

    佇這個歲末的時刻，也是感恩的時刻，請咱同心對主講：「主啊，阮感謝祢！感謝祢過去的帶領，互阮所經過的日攏得著祢的保守及看顧，阮欲將未來交佇祢的手中，用信心來迎接新年。」今仔日的經文提醒咱，新的一年毋是只靠自己的努力，是要學習依靠上帝的恩典，因為上帝歸年迵天啲照顧，目睭常常啲看顧咱，兼採咱無法度知道未來會發生甚麼代誌，但是咱並無孤單，祂一直佇咱身邊。