◎著互信仰進入生活(羅馬書十二1-3)       賴信頌牧師

       寧斯基主教（Grgur Ninski）是克羅埃西亞佇中世紀最代表性的宗教人物之一，他佇十世紀的時是克羅埃西亞王國時期的主教。他因為推動佇彌撒中使用克羅埃西亞語而出名，因為當時羅馬教皇規定要用拉丁語來主持彌撒，但是大多數的人攏聽呣識拉丁語，彌撒變成「看呣識的儀式」。寧斯基主教堅持用母語，幫助普通人能夠聽識聖經，互信仰無閣只是神職人員的專利。他使用克羅埃西亞語的舉動，互普通民眾也能夠直接理解信仰，增加了民族的認同感，他的努力幫助了克羅埃西亞教會的獨立精神，並且佇文化上推動了本土語言的地位。佇他的身上咱可以看見，著互信仰進入生活，這款的信仰才未只是儀式，是真正的行動，佇遮可以藉著他的精神來思考幾個重要的信仰功課：

●信仰要進入人的生活

       寧斯基主教堅持用百姓聽識的語言來傳講福音，這提醒咱，信仰呣是高高在上的理論，而是要進入人的生活。有的人將信仰看作是一種「屬靈的事」，好親像只存在佇禮拜堂、佇祈禱的時或是佇宗教活動中。但是聖經提醒咱，真正的信仰呣是離開生活的理論，是能夠進入人的日常生活中，來影響咱的思想、言語及行動。所以咱呣通將信仰包裝尬互人真難理解，應該用簡單、真實的方式互人可以領受。

       保羅佇羅十二2講：「毋通互世俗同化，顛倒著互上帝給恁改造，心志得著更新，互恁通辨別什麼是上帝所歡喜，看做好，閣完全的旨意。」這段經文指出，信仰的中心是在佇更新咱的心思意念，互咱佇生活中能夠辨別什麼是上帝所歡喜，看做好，閣完全的旨意。

●信仰需要勇氣

       寧斯基主教的改革挑戰了羅馬教廷的權威，這是需要真大的勇氣。佇咱的生活中，信仰常常被誤解作一種「心靈的安慰」或是「屬靈的理論」，若是聖經給咱講，真正的信仰呣只是思想上的認同，更加是勇敢活出來，因為欲將信仰行出行動，是需要有勇氣的。咱需要有勇敢堅持信仰的氣力，呣管踮佇任何的環境中，猶原選擇誠實、公義及疼。 

       佇書一9講：「我命令你：著勇敢壯膽，毋通驚，毋通懍；因為你無論去叨位，上主你的上帝一定及你同在。」這句話是提醒咱，勇氣呣是憑自己的氣力硬撐，是要相信是有上帝及咱同在來有勇氣。當咱面對挑戰或是壓力的時，信仰的勇氣就是相信上帝未離開咱，祂的同在互咱能夠踏出咱的腳步。

●信仰欲帶來更新

       寧斯基主教的行動象徵一個「更新」，他互人能夠用自己的語言來謳咾上帝，經驗信仰的自由。佇咱的生命中，常常會遇到厭倦、失望或是無力的時，這時咱若可以有更新的改變，就會幫助咱突破所面對的環境。更新呣是外在的裝飾，而是心思意念的轉化，當咱的思想願意被上帝的話更新，咱的眼光、選擇及行動就會改變。佇賽四三19：「我啲欲做一項新的事，此陣已經啲發生，恁豈毋知？」咱兼願意互上帝佇咱的生命中做新事，來突破過去的自我。 

       寧斯基主教提醒咱，信仰呣是綑綁人的制度，是要用人能夠理解的語言，進入咱的生活中，互咱有勇氣及更新的氣力，藉著咱帶互人上帝的疼及盼望。其實咱的時間、心思、行為攏可以成作咱對上帝的敬拜，當咱佇工作、家庭及人之間，選擇活出上帝所教示，就是佇敬拜上帝。咱要常常提醒自己，咱呣只是佇聽道，更加是要行道，互信仰進入咱的生活中，才會互咱佇生活中見證上帝的美好。