◎同心愛基督，團結顧台灣(來十22-24)        賴信頌牧師

    總會2026-2027年的主題就是：「同心愛基督．團結顧台灣」，咱呣通只將它看作一句口號，這更加是一個呼召，一個方向，一個行動。佇來十24講：「咱著互相關心通激勵相疼及做好事。」這句話是欲提醒咱，信仰不是抽象的理念，是具體的生活。當咱講「愛基督」，就是願意互相關心來相激勵，互咱可以疼主及疼人，並且將焦點囥佇耶穌基督的身上，呣是自己行自己的路，是彼此扶持、彼此鼓勵，同心跟隨主。當咱講「顧台灣」就是提醒咱教會呣只是信仰的團體，也是社會的一部分，佇咱的心中對台灣要有責任感，願意用疼及行動來守護，互這塊土地領受閣卡多對上帝來的福氣。

◎同心愛基督

    馬可十二30-31講：「你著全心、全情、全意、全力疼主----你的上帝。第二是：著疼厝邊親像疼家己。」這就是耶穌交代咱疼的誡命，這個誡命就是要咱佇生活中行出疼上帝及疼人的信仰，這兩個是不能分開的，咱若講我疼上帝卻無疼人，這個疼就是虛假，若是講我疼人卻無愛上帝，這就是違反聖經的教示。咱不能互信仰只停留佇口頭上，卻無有實際的行動，按呢就失去信仰的氣力。既然是講「同心愛基督」，就是欲提醒咱，這呣是個人的信仰歷程，是大家共同的目標。 

    為什麼需要「同心」呢？因為佇現代的社會中，有真多不同的立場而造成對立，大家只抓條自己所愛，卻無去尊重別人的所看，致到多多衝突就按呢來形成，這款的代誌佇教會中也會發生。同心呣是要大家意見完全同款，而是要咱將焦點囥佇基督的身上，咱若只看自己的意見，就容易爭吵，若是願意改變咱的焦點，用基督的角度來看代誌，兼採答案也是無同，卻未分裂，要互基督成做咱共同的中心。

    「愛基督」呣是口號，是要將它落實佇日常生活中，呣只是停留佇理念上，是看會著、行會出的行動。簡單來講，愛基督就是佇在日常生活中選擇祂的方式來生活，親像用疼回應人，用盼望面對代誌，用誠實來做事等，這三個結合起來，就是佇日常生活中活出「愛基督」的精神。因為疼會互人感受到基督的心腸，盼望會互人佇困境中看見光，誠實會帶互人信任及尊重。

◎團結顧台灣

    團結顧台灣這句話好親像選舉的口號，互人聽起來真激勵、真衝動，但是選舉後好親像就結束。上帝將台灣這片美麗的土地賞賜互咱，互咱有多元的文化、族群及信仰，但是卻也面臨多多的挑戰，親像：政治的色彩、世代的差異、經濟的壓力、國際的局勢等等，面對遮的挑戰若無團結，就可能成作分裂的氣力。 

    咱無需要逐個人攏想法相同，但是咱需要佇顧台灣的價值觀上彼此支持。無同的聲音呣是威脅，是佇提醒咱需要更加謙卑、更加去聽、更加互相來包容。當咱講「團結顧台灣」，就是要掠信仰的疼作基礎，超越族群、超越世代、超越差異，為共同的家園來努力。佇傳道書四12提醒咱講：「受攻擊的時，干焦一個人拍𣍐贏，若有兩個就會當抵抗。三股的索無赫好擦斷。」人若自己一個人佇拚，無有靠山，就真容易厭倦或是跌倒。若是彼此扶持，就會更加堅強，團結不是口號，是共同來承擔。

    「同心愛基督．團結顧台灣」無需要複雜的理論，只要咱願意親像今仔日的經文提醒咱的，願意真誠親近上帝、持守盼望、互相激勵來相疼，就會幫助咱行出行動。當咱同心愛基督

，就能彼此扶持，當咱團結顧台灣，就能互社會更加有盼望。