◎行入別人的世界(馬太廿八16-20)            賴信頌牧師

    佇日本北海道的森林及河川之間，住著一群「愛努族」的人，「愛努」佇他們的語言中就是「人」的意思。愛努人相信大自然充滿靈魂，熊是最尊貴的神靈之一。當冬天結束春天來臨的時，他們會舉行「送熊祭」，就是將所抓到熊的靈魂送轉去天界，感謝牠帶互他們有食物及祝福。他們的生活是靠打獵、捕魚維生，愛努人無有文字，卻用歌舞、口傳故事及口簧琴的聲音，將祖先的智慧一代一代傳下來。

    愛努人及台灣原住民的文化及背景真相詳，所以佇2005年，布農族全彩雲牧師佇長老教會及日本基督教團合作下，受派到日本北海道向當地的愛努人宣教。日本的基督徒比例無夠1%，若是愛努人接受福音的人更加少，全彩雲牧師透過及愛努族人共同努力保存文化，並且向政府爭取權利與民族尊嚴等的社會運動，互教會及愛努人站作夥，而來幫助他們認識福音，這是一款「跨文化宣教」，就是行入別人的世界。

    文化背景的差異，互國家之間、族群之間或是生活方式攏無同款，只有當咱願意就是行入別人的世界，願意理解並尊重他們的文化，才會真正認識他們，才會打破這中間的多多隔離。這款跨文化的宣教並呣是去到真遠的所在才算，其實也可能發生佇咱的國家，甚至就佇咱的身邊。 

    耶穌講：「恁著去招萬民來做門徒，給𪜶洗禮，互𪜶歸佇父、子、聖神的名。」(19)欲完成這個使命就是要行入別人的世界，欲行入別人的世界最大的挑戰之一，就是有多多的「無同款」。咱常常掠作自己的答案才是正確的，但是佇無同的文化中，就無一定是按呢，咱若只欲用自己的標準去看代誌，就真容易造成誤解。咱要用生活去見證，呣是用爭辯要人信服，咱要先放下「我欲來改變你」的心態，用「我願意及你同行」的態度，才會行入別人的世界。 

    佇聖經中記載多多耶穌的服事，耶穌本身就是行入別人的世界來幫助人。祂是上帝的聖子，卻願意道成肉體，來進入人的文化中，說人的語言，吃人的食物，體驗人的艱苦。親像耶穌曾佇井邊及撒瑪利亞婦仁人交談，這打破了猶太人及撒瑪利亞人之間的隔閡，祂呣是先責備婦仁人，是先建立關係，最後婦仁人因為祂的話而得著救。耶穌也常常及被社會排斥的人同坐桌，祂的行動挑戰了當時的文化偏見，卻也互遮的人信主來得救。耶穌吩咐門徒「著去招萬民來做門徒」，就是進入別人的世界，這呣只是一個跨文化的呼召，是一種生命的交流。

    欲進入別人的世界呣是靠技巧，是靠真誠的心，當咱的心先被基督的疼充滿，咱就能真自然進入別人的世界，願意用疼來接納這中間的無同款。也就是咱願意謙卑承認自己有限，願意來聽別人生命的故事，用別人的心做心來分享基督的信仰。這種的關係呣是用語言來建立，是用行動來表達。人及人之間的無同未一時就消失，是需要付出閣卡多的疼才會被建立。 

    佇人及人的相處中，咱常常會有一種心態，就是希望別人能夠照咱的想法去作，甚至想欲「改變」對方。咱若是用這款的心態欲行入別人的世界，去接近別人，往往就會造成壓力，甚至互人拒絕。

    親愛的弟兄姊妹，行入別人的世界呣是理論，是一段生命的旅程，當咱願意行入別人的世界，放下偏見，願意去聽，就是佇活出基督的疼。咱要學習耶穌打破文化的界線，去疼每一位不同的人，互上帝的福音佇逐所在攏能被看見。欲行入別人的世界，無需要帶著「改造的計畫」，只需要帶著疼，因為疼能打開人的心，疼能夠醫治傷心的人，互人看見盼望。願咱攏互基督的疼佇咱的內面流動，成作別人生命中的福氣。