◎佇黑暗中迎接真光(約翰一1-5) 

    聖誕節若到，咱就會看著多多美麗的裝飾、聽見聖誕的詩歌、感受著節日的鬧熱。若是聖經互咱看見的聖誕主要的目的並呣是按呢，基督的出世是人類的光，這個光欲照佇黑暗的世代而帶來光明，互咱佇黑暗中迎接真光。佇人生的路充滿多多的黑暗，咱需要有光照佇咱的內面，互咱的生命無踮佇黑暗中來迎接真光。

    佇日常生活中，壓力及厭倦往往親像黑暗一樣，遮蓋咱的心靈及肉體，互咱感到無助及無奈。它不一定是驚天動地的大事，閣卡多的是來自生活中的點點滴滴，有時是工作的責任、家庭的經濟、人際的問題，或是對未來的掛慮，遮的壓力親像黑暗來臨，遮蓋咱的目周，互咱難分辨前面的路。

    面對生命的黑暗咱著怎樣面對，咱需要停落腳步，互自己有休息的空間，咱也需要承認自己的有限，因為人攏無完美，咱呣是逐項代誌攏可以照自己的意思，這是咱要勇敢面對的事。最重要的就是需要尋找光的源頭，互光照佇咱的黑暗，這個黑暗就會無去。感謝上帝，祂藉著基督的降生成作人類的光，咱通將一切的黑暗帶來祂的面前，互祂的光照佇咱的內面，無閣踮佇黑暗中。

    耶穌的誕生呣是否認黑暗的存在，而是宣告咱需要光來看見盼望。生活的黑暗雖莽是真實的，但是它不能奪走咱對光的渴望，兼採壓力及厭倦成作咱生命中的重擔，但是只要咱願意渴慕上帝的光，基督就成作咱黑暗中最光的那顆星，咱要迎接真光佇咱的生命中，就通領受上帝佇創世以前就為咱備辦的禮物。

    佇聖誕節的時多多人攏會參加交換禮物的活動，咱會期待所得著的禮物是咱所意愛的，但是卻也常常失望。佇網路曾做調查，互人感到最無愛的禮物，第一是馬克杯，這是每一個家庭攏有的，無甚麼新鮮感；第二是真初俗的四獸阿，感到是臨時包包的，無有誠意；第三是一大箱的衛生紙，雖然真實用，卻無甚麼驚喜，欲怎樣搬也真麻煩……等，每一個人所期待的禮物攏無同款，致到所收著的並呣是咱所尬意的。今仔日上帝將基督送互咱作禮物，這個禮物最媠的所在，就是祂及咱同在，因為祂的名就叫作以馬內利。

    上帝藉著基督的出世互咱有祂及咱同在的保證，所以無論環境賴呢黑暗或是艱難，上帝攏無離開咱，反轉是及咱同行。呣管咱所面對的景況是怎樣，有祂的同在咱就無孤單。上帝將基督送互咱做禮物，這是祂疼世間人的具體表現，祂呣是高高在上的旁觀者，是願意走入咱生命的主，佇生活的壓力及黑暗中，聖誕的光提醒咱，祂就佇咱的身邊，祂的同在欲帶來救恩與及平安。

    耶穌來到世間，並呣是只為了照光咱，祂也要咱成作光，來照光別人，光無需要真大，只要咱願意做光，就能夠改變咱的四周圍。佇這個聖誕節期的時，牧師要咱再次來想，咱佇家庭中有作光嗎？咱佇工作中有作光嗎？咱及人到陣的中間有作光嗎？咱若願意互自己成作光來照佇黑暗，就會越明白聖誕的意義。

    聖誕節呣是一年一次的慶祝節日，是上帝持續對咱的邀請，邀請咱佇黑暗中來迎接真光，互基督成作咱生命的光。願咱的厭倦佇基督內面得著安息、願咱的猶豫佇基督內面得著方向、願咱所受的傷佇基督內面得著醫治、願咱的孤單佇基督內面得著陪伴、願咱的軟弱佇基督內面得著盼望。願主的平安、喜樂及光照亮咱的心，也照亮咱前面的道路。祝大家聖誕快樂，主恩滿滿。