◎盼望中的等待(以賽亞書九6-7) 

    今仔日是待降節的第一主日，就是欲準備迎接耶穌的降生，若是對佇基督徒來講聖誕節是一個有關人類救贖的故事，咱要佇盼望中來等待耶穌的誕生，因為有一位救主欲來，祂欲帶來平安、疼及新的開始，這個等待欲互咱的生命得著改變。咱相信這個美好的未來一定會來，互咱的等待有價值。

●等待上帝計畫的成就

    佇人生的旅程中，等待是一個無法度避免的功課，親像囝仔等待大漢，學生等待放假，上班等待下班，病人等待康復，有人等待夢想的實現，有人等待愛情的臨到，遮的等待有的會實現，有的無有把握，有的等待也會落空，因為咱無法度掌控所有等待的結果。但是如果咱對佇所等待有確信，堅定相信這個美好必定會發生，這時的等待就變作盼望。

    耶穌的降生是一個等待的故事，佇舊約先知的時代就開始佇等待，那時以賽亞先知就講：「因為有一個嬰仔已經為著咱出世，有一個子賜互咱。伊欲負擔國政；伊的名欲稱做：賢明的導師，全能的上帝，永在的天父，和平的君王。」(6)這提醒咱，等待呣是空空，是上帝早就已經安排的計畫，今仔日咱呣只是佇等待嬰仔的出生，是佇等待上帝救恩計畫的成就。

●等待基督的掌權

    第七節講：「伊的主權無窮；伊的和平無盡。伊欲坐大闢的寶座，繼承伊的王國。伊欲用公平正義互國穩固堅立，對此時直到永遠。上主萬軍的統帥的熱誠一定會成全此個事。」這段話是咱迎接基督的確信，耶穌的降生代表上帝的國度已經開始，祂欲帶來永遠的和平、公義及盼望。所以聖誕除了是佇宣告耶穌救恩的臨到，也是佇提醒咱等待祂完全掌權的盼望。

    以賽亞指出耶穌的出世是代表一個新的國度開始，祂欲掌管這個世界，祂欲成做真正的王，伊的主權無窮永遠未消失，因為按呢咱的信仰就有保障，咱是跟隨一位永遠不變的王。佇遮也講伊的和平無盡，就是講主耶穌互人的平安欲不斷加添，呣管外在環境有賴混亂，咱的心中攏可以因為基督來安穩。另外猶有一個真要緊的觀念，就是耶穌的掌權呣是靠武力是靠公義，因為祂的國度就是公義的國度，伊欲用公平正義互國穩固堅立，他的公義互人不得不降服佇祂，這提醒咱要活出正直。 

●等待以馬內利的實現

    耶穌的名就是「以馬內利」，意思就是上帝及咱同在，這是上帝永遠的應許。上帝若及咱同在咱就無孤單，上帝若及咱同在咱的痛苦祂攏明白，上帝若及咱同在無論面對啥款環境祂攏及咱同行。上帝及咱同在就是講祂佇陪伴咱，祂呣是離咱遠遠的上帝，是佇咱生命中實實在在的安慰，祂呣是高高在上的上帝，是願意走入人群、走入咱生命的朋友。

    以馬內利呣是一個想像的概念，是佇咱每一日中攏欲經歷的真理。當咱佇喜樂中感謝祂，佇困難中呼求祂，佇平凡生活中依靠祂，就能夠一步一步體會上帝及咱同在，這就是以馬內利的生命。等待以馬內利的實現是一種生命的操練，因為這呣只是用時間來等待，是用整個生命去等待祂，互人看見咱是真心相信祂及咱同在。 

    聖誕節的盼望呣是空想，是有一位救主真正臨到，祂的名叫做是耶穌。今仔日咱佇等待聖誕，是佇等待那份真實的盼望，親像黑夜等候天光，知道天光一定會來；親像旅客等候轉去厝，因為他知道有人佇等候他。聖誕的等待，就是相信耶穌若到就能改變咱的生命，這就是聖誕的中心，因為有這款的盼望所以值得咱來等待。願咱佇等待中無失去信心，佇黑暗中無失去盼望，用盼望的心迎接聖誕的光佇咱的生命中。