◎感恩中看見上帝的賜福(詩一一八1-4)      賴信頌牧師

    每年十一月份的第四個禮拜四，美國人會迎接一個特別的日子，就是感恩節。佇這一日，厝內的人圍纍聚集，相及享受火雞大餐，來彼此表達感謝。雖莽感恩節是對美國傳來的，但是「感恩」的精神卻是全世界攏需要的生命態度。感恩呣只是一種態度，更加是一種改變生命的氣力。心理學家研究，常常會感恩的人，會互心情愉快、壓力減少，甚至身體更加健康。當咱的生命注神佇「咱所有的」，呣是「咱所無的」，心就會充滿平安及滿足，只要咱願意感謝，呣管甚麼款的環境，咱攏可以找到值得咱感謝的所在。

●感恩的根基----因為祂是至善

    第一節講：「著感謝上主，因為伊至善。」這句話互咱看見，咱要感恩，呣是因為咱事事順利，是因為上帝的本性是至善的。至善的希臘原文是「良善、正直、美好」的意思，當咱講上帝是至善的就是講上帝有「美好的行為」，也就是「美好的安排」。所以咱若相信祂是至善的，就可以幫助咱接受凡事攏有祂美好的安排來感謝。

    上帝的至善未因為人而改變，上帝的至善也未互環境所捆綁，所以佇咱面對挑戰的時，咱若猶原相信有祂美好的旨意，就能夠佇任何境況中講：「主啊，阮感謝祢！」佇聖經中提醒咱，上帝的安排超越咱的眼光，祂看見的是整個生命的藍圖，若是咱只能夠看見眼前的小部分；上帝看見的是永遠，若是咱看見的是現在，這是咱感恩的根基。

●感恩的宣告----祂的慈愛續到永遠！

    咱獻上感謝，呣是因為生活永遠順利，是因為上帝的慈愛續到永遠。祂的愛無親像人的愛會改變，而是永遠不變。詩人佇遮不斷重複講：「伊的慈愛續到永遠！」，這是一種信心的宣告，呣只是口號，是生命的確信，詩人不斷提醒自己，呣通未記的上帝的恩典。詩人相信上帝的慈愛是不變的，是對這時續到永遠，兼採咱現在就佇困境中，祂猶原欲用祂的慈愛扶持咱。當咱願意時時講「感謝主」，就是親像詩人佇宣告，將上帝的慈愛囥佇咱的心內。

    因為上帝的慈愛續到永遠，咱佇生命中就要常常用感謝回應祂。當咱願意用感謝回應上帝，就互咱佇面對困境時無抱怨，而是看見恩典；佇有所成就的時無驕傲，而是承認一切出佇上帝；佇心中饒疑不安的時無離開祂，而是更加抓條祂。

●著同心同聲來感謝上帝 

    詩人佇遮呼籲三類的人攏要感謝上帝，他講：願以色列講、願亞倫祭司的家講、願所有敬畏上主的人講。這就是講感謝上帝呣只是個人及上帝的關係，是眾人對上帝共同的回應。上帝所期待的是整個民族、遮的屬靈領袖以及所有敬畏上帝的人攏同聲來感謝上帝，這是上帝所歡喜的事。今仔日咱的教會也應該按呢來宣告，咱欲因為上帝永遠的慈愛來感謝祂！佇感恩中來彼此激勵、建立信心來感謝祂。當咱同心同聲來感謝上帝，就是承認上帝是賜恩的源頭，這款同心同聲的宣告，就會互世界看見上帝的榮耀。

    佇帖前五18講：「無論什麼境遇攏著感謝；因為這是上帝所意愛，愛恁諸個屬基督耶穌的人按呢做。」這句話呣是要咱忽略困難艱苦，是邀請咱佇每一個處境中來尋找值得感謝的事物，這對基督徒來講，就是對上帝的信靠，相信祂絕對的主權以及祂一切所安排的。當咱用心來尋，就欲看見上帝恩典的痕跡，互咱無互黑暗所吞吃，反轉佇黑暗中看見光。當咱知道感謝，就能夠佇平凡的生活中看見不平凡的恩典，佇感恩中看見上帝的賜福，願咱每一日攏是感恩節。