◎適合無適合攏著傳 (提後四1-5) 

    緬甸佇1948年脫離英國獨立，成立緬甸聯邦。佇1962年軍事政變後，長期由軍政府掌權，實行極權主義及鎖國政策，無欲及其他的國家往來，到佇2011年慢慢開放，佇2015年舉行自由選舉，但是佇2021年再度發生軍事政變，局勢動盪，互多多家庭失去安穩，人民活佇驚惶及不安中。這款局勢動盪的國家，一般經濟攏呣是真好。

    這款軍事統治的國家無自由閣有多多限制，經濟及生活攏無真好，所以佇這款的所在欲傳福音是困難閣危險的，但是保羅卻勉勵咱講：「著傳道理，無論時機適合無適合攏著堅持去傳；著用最大的耐心及教導來勸勉，督責，鼓勵。」(2) 雖莽緬甸是軍事獨裁、政治不安、經濟喪鄉、生活辛苦、醫療落伍的所在，但是感謝主，現在台灣已經有多多教會及團體開始差派宣教師到緬甸宣教，因為咱照聖經所教示咱的，呣管適合無適合攏著堅持去傳。今仔日咱所讀的這段經文，保羅特別向咱強調傳福音的責任，佇這段經文中互咱看見有三個重點：

●傳福音是上帝要求的使命，呣是人的選擇

    佇提後四1講：「佇上帝及啲欲審判所有活人及死人的基督耶穌面前，閣因為基督欲顯現來作王，我慎重吩咐你。」保羅一開始就強調這個使命是真慎重的，是佇上帝及基督耶穌面前來「吩咐」提摩太，所以這互咱看見，傳福音呣是有也好無也無要緊的代誌，是上帝所託付咱的責任。

    既然傳福音是上帝要求的使命，咱呣是向人交帳，是向上帝交帳，因為祂知咱是呣是有忠心佇這件事。欲有傳福音的動力，呣是來自環境或是人的掌聲，是因為咱知道有一日咱攏要佇上帝面前交帳。兼採環境艱難、聽眾冷淡，咱猶原要忠心，因為傳福音是上帝要求咱的使命。

●傳福音是「不分時機」攏要堅持落去

    提後四2講：「著傳道理，無論時機適合無適合攏著堅持傳；著用最大的耐心及教導來勸勉，督責，鼓勵。」咱作代誌的時會去分辨時機，時機是呣是有適合是真重要的條件。保羅知道傳福音呣是容易的，有時候人願意聽，有時候人無願意聽；有時候人真熱情，有時卻也真冷淡，但是保羅講：「無論時機適合無適合攏著堅持傳」，所以傳福音是「不分時機」攏要堅持落去。傳福音卡呣是佇「講一篇道理」，是進入人的生命，所以傳福音是長期的陪伴，呣是一擺性的行動，呣是用話來壓人，是用疼心來引導人。

●呣管環境怎樣變化，咱攏要堅守使命

    佇3-5節講：「因為時機啲欲到，彼時人聽𣍐落健全的教示，掩耳孔毋聽真理，反轉趁家己的私慾，耳孔癢，聘請一個閣一個教師來講合意聽、無影跡的傳說。總是你凡事著謹慎，忍受苦難，做傳道者的工作，盡你做上帝差用的本分。」保羅佇遮提著一個現象，就是人對佇真理無興趣，只轉向自己所歡喜的話語，這款的環境及咱現今的世代真同款。現代的人卡愛聽好聽的話、聽肯定自己的話，若是叫人悔改、順趁上帝教示的話無有興趣。

    傳福音要面對一個現實的挑戰，就是人兼願意來聽真理，當人拒絕真理，咱兼願意猶原堅持講純正的道理，咱呣是為了配合人就改變應該講的話，是要忠心佇上帝的話語。所以保羅最後勉勵提摩太講：「盡你做上帝差用的本分。」這是一生的呼召，是咱對上帝領受的差用，呣只是階段性的任務。在這個變化真緊的世代，福音的真理常常被忽略、扭曲、甚至拒絕，但是上帝呼召咱佇任何時機攏要忠心來傳。