◎各盡其才(馬太廿五14-30)

    今仔日這段經文咱通常稱它作：「三個僕人的譬喻」，佇遮主人照逐人的才調交代𪜶，一個五千金幣，一個兩千金幣，一個一千金幣，就出外去。希臘原文的聖經呣是用金幣來表示，是用五個、兩個及一個他連得，當時的他連得呣是指錢，是一種重量的單位，那時一他連得約6000銀幣，一個銀幣是等於當時一天的標準工資，所以一個他連得約是十六年五個月又十天的工資，所以五個他連得就超過八十年的工資。

    今仔日這段記載除了互咱看見忠心及懶惰的對比，閣卡重要的是上帝要咱各盡其才，認真佇每一個上帝交代咱的每一件代誌。經文一開始提著，主人按照僕人的「才調」分派金幣：有五千、二千及一千，這是提醒咱，上帝是照個人的才調及特質賜落恩賜，呣是平均分配，也呣是隨意互人。每一個人攏有不同的背景、經歷、性格及能力，遮的攏在佇上帝的計畫中，就是要咱佇逐所在發揮咱的作用。咱呣免羨慕別人的五千金幣，也呣免自卑自己只有一千金幣，重點呣是領多少，是在佇咱是呣是盡心盡力來付出，親像經文中領五千及二千的僕人攏得到同款的謳咾，我相信領一千的若盡力來做，也欲得著同款的謳咾及福氣。上帝對咱的要求，其實呣是在佇數字，是在佇態度，那個領一千的問題不在是賺或是了，是他根本攏無動作，直接就將錢埋起來，他的態度並無欲有任何的改變、任何的成就，安穩就好，他認為若去做就會有風險，乾脆就甚麼攏無做。

    上帝互咱有才調，但是咱卻會常常陷落佇自我矛盾的中間，欲作驚做無好，驚互人笑；無作好親像閣虧欠上帝，呣知欲怎樣，所以最後乾脆攏麥作，掠作按呢上保險，但是上帝認為按呢是最害的，因為就算做呣對，猶有機會改善，若是攏無去做，雖莽未有失敗的機會，但是卻也無可能會成功，所以上帝要咱去做，呣管你領的是五千、兩千或是一千，呣管你的結果是賺或賠攏無要緊，咱只要盡心盡力來作，最後將結果交託互上帝，這是咱的責任。

    「各盡其才」呣是口號，是咱每一個人對上帝領受的使命，佇今仔日這個比喻中，上帝並無要求咱所無的，但是上帝卻要咱各盡其才。咱佇才調上所領的雖莽無平等，但是當咱努力來做，結果的報賞是相等的，換一句話講，人有賴多的才調並無重要，重要的是咱的心志，咱兼願意使用上帝互咱的來榮光上帝，所以盡心盡力來作攏是最媠的。馬丁路德曾講：一位婢女盡心佇掃土腳的服事比一位牧師的講道閣卡得到上帝的歡喜，這句話可以互咱大家得著大大的鼓勵。盡忠的僕人呣若得著謳咾，也被邀請「入來及主人做夥歡喜」，這是何等榮耀的獎賞！上帝呣只是互咱才調，也欲互咱及祂同歡喜。

     耶穌佇結論的時講一句真特別的話，祂講：「因為有的，欲互伊閣較多，甚至有賰；無的，連伊所有的嘛欲給伊搶起來。」（29）。這世間的東西常常是越用越少，只有才調卻是越用越多，越用越老練，所以呣管上帝是互咱五千、兩千、一千，只要咱敢用、肯用，上帝就會互它越增加，越來越多；同款的，有的才調越無用也會越失去。咱的信心也是同款，你敢用一點點的信心來相信上帝，你就會發現你的信心越來越大，越用越多，來得著福氣。

    所疼的兄姐，咱想看麥，上帝有互咱什麼？你肯照上帝所互咱的拿出來使用嗎？上帝曾問摩西講：你手裡有什麼？他講：一根杖仔，因著摩西的順服及信心，這支杖仔成作上帝行神蹟的杖，帶領以色列百姓出埃及。所以咱也要問自己：「上帝佇我手中囥甚麼？」咱兼願意好好來運用遮的才調嗎？