阿根廷冰川國家公園是南美洲最媠的自然奇觀之一，位佇阿根廷南部的聖克魯斯省，是阿根廷第二大的國家公園，佇1981年被聯合國教科文組織列為世界自然遺產。阿根廷這個國家真特別，它是掠移民及其後代為主的國家，所以真容易就感受到多元的文化。佇遮可以看見真多不同的民族、不同的風俗、不同國家風格的餐廳、不同國家的名產、不同國家的商店等，這攏反應了日常生活中的多元文化。佇遐有一句諺語講：「阿根廷人的祖先是來自船上。」這句話表示大部分的阿根廷人攏呣是當地原住民的後代，是坐船來的移民。

    第一批移民至阿根廷的台灣人，背後是一段充滿勇氣及掙扎的歷史，因為當時台灣是戒嚴時期及台美斷交而造成政治不安，多多人就為了尋求安穩生活及自由，勇敢踏出18,000公里的路程，開始一個新的生活，這是需要極大的勇氣及堅持。佇遮的移民中也有一群基督徒，雖莽要面對大環境的變動及生活中的多多挑戰，他們猶原持守信仰。這款的精神也激勵咱，要持守咱的信仰，佇逐所在持續實踐上帝要咱行的信仰行動。

    佇1978年，阿根廷的台灣移民成立第一間的台灣教會----「台灣基督長老教會阿根廷教會」，迄今一共有四間台灣教會，遮的教會攏是信徒奉獻金錢購買土地來起造的禮拜堂，這實在呣是一件容易的事。遮的移民佇社會中傳承台灣文化，也及當地有閣卡深的連結。今仔日藉著遮的移民的精神，也互咱相及來學習勇敢壯膽這個功課。

    今仔日這段經文是上帝親自互咱的批，欲勉勵每一個面對生命中挑戰的咱對上帝來得著勇敢壯膽的心。這段經文呣只是古代的歷史記錄，也是咱現在需要的氣力，所以值得咱佇生活中常常來思想，互咱勇敢壯膽來面對頭前路。

    這段話是上帝親自對約書亞講的，是佇他準備欲接摩西帶領以色列百姓進入應許之地的關鍵時刻。佇第七節及第九節攏提著「著勇敢壯膽」，這呣是偶然的，是上帝知道約書亞的心，也知道咱的心，因為勇敢壯膽是咱突破困境真重要的態度。欲有勇敢壯膽的心呣是倚靠自己，是要咱倚靠上帝。

    佇遮互咱看見欲有勇敢壯膽的心，遵行上帝的律法是真重要的關鍵，所以佇第七節上帝神約書亞講：「你一定著勇敢壯膽，遵行我的僕人摩西所命令你一切的律法，毋通偏左偏右。按呢，你無論去叨位攏會事事順利。」上帝呣是只叫約書亞去相戰、去領導，是要他先注神佇上帝的話語頂面。

    佇咱的生活中常常會有多多的聲音，但是上帝要咱「毋通偏左偏右」，意思就是要咱注神佇祂的話語上，無互其他的聲音拉走。所以上帝進一步講：「你著常常讀此個律法的冊，暝日亦讀亦想，互你遵行此本冊所記一切的話；按呢你的路就會平坦，事事亨通。」(8)咱若渴望人生的路事事亨通，這個秘訣就是互上帝的話語成咱生命的根基。

    最後上帝對約書亞講：「我命令你：著勇敢壯膽，毋通驚，毋通懍；因為你無論去叨位，上主 — 你的上帝一定及你同在。」(9)這句話是這段經文的中心。上帝並無保證約書亞未遇到困難，也無講他相戰一定贏，但是上帝保證的是：「我及你同在」，上帝的同在才是咱真正的氣力的源頭。

    佇聖經中互咱看見，有上帝的同在就會帶來改變，摩西能夠分開紅海，是因為上帝及他同在；大衛能夠打敗歌利亞，是因為上帝及他同在；以斯帖能夠拯救猶太人，是因為上帝及他同在。有上帝的同在就會帶來改變，過去是按呢，現在也是按呢，咱也可以經歷上帝的同在。願咱攏親像約書亞同款，勇敢壯膽來行向上帝所應許之地，呣是倚靠自己，是靠那位及咱同在的上帝。