對放棄到蒙福(創世記十二1-4) 

       一般人卡愛「得到」贏過「放棄」，因為得到互人感覺自己有能力、有價值，若是放棄是一種的失去及失敗，所以咱常常放未落。心理學家指出：人對佇失去的痛苦大過得著的歡喜，致到當咱需要放棄的時，咱就會猶豫不安。但是佇信仰的旅程中，常常是先要放棄然後才蒙福，真正的得到是當咱願意放棄的時。今仔日咱就欲藉著亞伯拉罕的生命來學習這個重要的功課。

       咱呣只是佇信仰上要學習放棄，其實佇生活中咱也需要「放棄某部分的東西」才能「得到閣卡重要的福分」，親像咱要放棄宵夜，才可以得到閣卡健康的身軀；放棄滑手機的時間，才會及人有好的人際關係；放棄自我作中心 才會互咱看見別人的需要等。今仔日這段經文可以講是亞伯拉罕人生的轉捩點，更加是一段對「放棄」到「蒙福」的屬靈旅程。

       亞伯拉罕七十五歲時，上帝的呼召臨到他，這個呼召包含了兩個命令。第一個命令就是叫他放棄過去，行向未知，上帝就應許他多子多孫，成作大國，上帝也欲賜福互他，互亞伯拉罕大有名望。第二個命令就是欲藉著他成作別人的福氣，上帝就應許：祝福他的，我欲賜福互𪜶；咒詛他的，我欲咒詛伊；地上萬族欲因為他得著福氣。佇以後的日子，雖莽亞伯拉罕有多次懷疑上帝，但是上帝用疼來鍛鍊他，當他通過獻以撒的考驗之後，亞伯拉罕終於學習了完全的信靠。

      第一節上主對亞伯蘭講：「你著離開本地、本族，恁老父的家，去我欲指示你的地。」這句話是上帝對亞伯蘭的呼召，上帝並無先給他講目的地佇叨位，只講「去我欲指示你的地。」所以亞伯蘭若願意順趁，就要必須要先放棄三項代誌：

●離開本地：

●離開本族：

●離開老父的家：

       對亞伯蘭來講，這呣只是搬厝，是放棄一切熟悉的依靠，踏上信心之路，這是需要勇氣的。「放棄」是信仰的第一步，這呣只是信仰的追求，而是信仰的行動。亞伯蘭的順服是咱的模樣，呣是因為他是完美的，而是因為他願意聽趁。上帝的呼召往往呣是互咱踮佇舒適的環境，而是要咱放棄自我，來進入祂的計畫，這是基督徒必須要經歷的經驗。

      「放棄」是咱信仰生活中真要緊的功課，真多時候咱需要「放棄」才能領受上帝閣卡的賜福。親像當咱願意放落自我，才能得到上帝的引導及平安，咱若只用自己的想法呣願放，反轉互咱加添多多掛慮，咱要學習將自己的意念放落，然後交代互上帝，就欲經歷上帝佇做工。「放棄」呣是失去，是為了清出閣卡闊的空間，互上帝的賜福進來，帶互咱生命的滿足。

       當亞伯蘭願意放棄本地、本族，老父的家，去上帝指示的地，上帝就應允欲賜福互他，上帝講：「我欲互你成做大國，欲賜福你，互你的名受敬重，你嘛欲互人得著福氣。」（2）當咱放棄來蒙福，這個蒙福呣只是個人的福氣，而是延伸到萬族萬民。上帝講：「祝福你的，我欲賜福互𪜶；咒詛你的，我欲咒詛伊；地上萬族欲因為你得著福氣。」(3)每一個願意信靠上帝的人，攏可以成作別人的福氣，這是一種「被呼召→被祝福→成為祝福」的生命旅程。

       今仔日這段聖經親像一面鏡，咱可以來問自己，咱兼願意放棄熟悉的環境，順服上帝的呼召？兼願意放棄自我的意念，佇猶未完全明白的時就順服？咱兼願意相信上帝的賜福呣只是互我，也欲透過我來祝福別人？咱兼願意佇困難中仍然敬拜上帝，堅持咱的信心佇生活中？這是一條信心的路，也是蒙福的路，願咱親像亞伯蘭同款，對放棄到蒙福，佇生命中經歷祂的同在及恩典。