著稱讚謳咾上主(詩篇一五○1-6) 

    今仔日是聖樂主日，禮拜中聖歌隊及其他團契用一連串的歌聲來謳咾上帝，就是欲互上帝的名得著榮光。謳咾不只是用嘴唇來唱歌，謳咾也是咱及上帝心靈的交流，當咱佇謳咾上帝的時，呣若表達感恩及敬畏，也是佇及上帝建立閣卡深的關係。佇謳咾中咱承認祂是咱的主，是創造者，也是救贖者，咱放落自我，仰望祂的榮耀，互咱的心歸向上帝來得著氣力，

    詩篇一五○篇是一首謳咾的詩，這首詩篇只有六節，卻親像一首豐富的音樂，它對每一個角度來謳咾上帝。這首詩中無講苦難、無講懇求、無講鬱卒，只是純粹的謳咾，它要每一個會喘氣的攏著稱讚上主，咱若常常謳咾就會咱及上帝有親密的關係。

●謳咾的地點：

    佇第一節就講：「哈利路亞，稱讚上主！著佇上帝的聖所稱讚伊；著佇顯出伊權能的穹蒼謳咾伊。」這句話互咱看見，謳咾是無被限制佇某一個空間。上帝的聖所可解釋作祂站起的所在，敬拜祂的所在，也可以講是咱的身軀，咱的生活，因為咱的身軀就是上帝的殿，所以咱要佇每一個祂所創造的所在謳咾祂。 今仔日咱呣只是佇禮拜堂來謳咾祂，是要佇每一日，佇每一個所在攏可以謳咾祂。咱可以佇煮飯炒菜的時謳咾祂，佇上班的路中謳咾祂，佇暗眠更深的時謳咾祂，因為上帝是無所不在，祂的榮耀也是無所不在，咱的的謳咾也應該無所不在。

●謳咾的理由：

    接續詩人講：「著因為伊大權能的作為稱讚伊，因為伊的至尊至大謳咾伊。」(2)佇遮指出兩個謳咾的理由：一是上帝大權能的作為，二是伊的至尊至大。上帝的大權能是咱可以看見的，咱可以看見祂的創造、祂的拯救、祂的供應、祂的醫治等等，上帝的每一個恩典、幫助及保守攏是咱謳咾祂的理由。

    祂的「至尊至大」是指祂的性情及本質，佇聖經中互咱看見祂是慈愛的、是公義的、是信實的也是憐憫的。雖莽咱的目周看未見祂的形象，但是祂的本性是刊得咱謳咾的。今仔日咱謳咾上帝，呣是因為咱對上帝得著利益才謳咾，是因為祂本是至尊至大咱來謳咾祂，呣是因為祂互咱一切順利才謳咾祂，是因為祂勘得受人謳咾。

●謳咾的方式：

    佇這段經文中列出了一連串的樂器：有哨角、瑟、琴、拍鼓、跳舞、絲弦的樂器、簫、聲大的鈸、音高的鈸等等，遮的樂器代表非常豐富的情境，象徵著謳咾是可以非常鬧熱的、多元的、有創意的。上帝呣只是接受咱安靜的祈禱禱，也歡喜咱熱情的敬拜。

    佇遮特別提著跳舞，就是表示謳咾呣只是用嘴唱歌若定，是全人的投入，是包誇咱的身體、情感、意志攏參與佇其中。所以咱可以佇敬拜中流目屎、歡喜、舉手、甚至跪落，攏是佇回應上帝的謳咾，是信仰的表達。謳咾呣是外在的方式，是心靈的服事，所以約四24講：「上帝是神，敬拜伊的人著用心靈及真誠敬拜。」

    最後一節講：「所有會喘氣的攏著稱讚上主。哈利路亞，稱讚上主！」(6)這是上帝對咱的呼召，只要有喘氣的攏著稱讚上主。今仔日呣是只有牧師長執、會長委員或是服事同工才要謳咾，而是每一個人，只要你猶有喘氣就應該謳咾。所以這句話提醒咱，謳咾是一種生命的態度，當咱猶有活命就應該謳咾，雖莽咱有軟弱、困境、挑戰，只要咱猶有喘氣就可以謳咾。

    謳咾是佇現實中選擇信靠上帝，當咱謳咾上帝，咱的心就被提升，咱的眼光就轉向上帝，咱的氣力就被更新。謳咾呣是理論是生活，呣只是用歌聲謳咾上帝，是用整個生命來謳咾。願咱佇教會中謳咾，佇厝也謳咾；佇順境中謳咾，佇逆境也謳咾；咱用聲音來謳咾，也用行動來謳咾，願咱的謳咾攏得著上帝的賜福。