大使命的腳跡(馬太廿八16-20) 

    砂拉越位佇馬來西亞東部的婆羅洲北部，是馬來西亞面積最大的州，屬熱帶雨林氣候，三分之二土地為原始森林。有真豐富的自然資源，包括石油、天然氣、木材及胡椒（砂拉越胡椒產量占全馬90%）。佇遐的宗教信仰是多元，包括基督教、伊斯蘭教、佛教及原住民信仰，現代是信仰基督教卡多。這個所在也是多多族群的所在，其中有一族叫作伊班族。

    佇1967年，美國宣教師孫理蓮成立「焚棘海外傳道會」，選派八位原住民宣教師前往馬來西亞砂拉越向伊班族人傳福音，開始為期10年的宣教事工，成作原住民海外宣教的起點，其中布農族牧師全所哲亦是受派的其中一名。10年的事工結束後，全所哲牧師猶原常常掛慮伊班族的信徒，就佇1987年台灣解嚴了後，就自己重回砂拉越去短宣，並且呼籲中布中會的教會同齊來參與。1995年起，中布中會陸續有其他的教會以及淡水國語禮拜堂同齊認捐起教堂。全所哲牧師過身了後，中布中會看見伊班族宣教事工需要延續及傳承，就佇2004年佇當地起宣教中心。盼望砂拉越伊班族的宣教事工，可以親像過去宣教師來到台灣同款，開花結果子，來實踐大使命的腳跡。

    今仔日這段經文對基督徒來講是非常重要的教示，這就是咱對上帝領受的「大使命」。這段話是佇耶穌復活了後升天之前，祂對門徒的吩咐及交代，也是祂對教會的託付，今仔日砂拉越伊班族的宣教就是佇實踐這個大使命。咱兼曾致意這段大使命？或是認為這及我有甚麼關係？過去耶穌及遮的門徒是怎樣行出大使命的腳跡，只要咱願意，咱也可以行出大使命的腳跡。

●耶穌的腳跡是對加利利到萬民

    這段經文一開始按呢講：「十一個門徒去加利利，到耶穌指定𪜶去彼座山頂。」(16)加利利是耶穌宣教事工的開始，是祂呼召門徒的所在，也是祂行神蹟、教示群眾的所在。如今，祂復活了後閣將門徒導轉去加利利，好親像佇講：「恁要對遮重新出發。」耶穌的腳跡，呣是停留佇聖殿內，也呣是只佇會堂中，乃是走進人群，走進討魚人的船頂、抽稅人的厝內、破病人的床邊。祂的腳跡是走向萬民的，是超越文化、階級及背景。

●門徒的腳跡是對敬拜到差派

    17節講：「𪜶見著耶穌就給伊拜，不過有人猶啲憢疑。」這句話講出人的軟弱，遮的門徒雖莽看見復活的主，有人馬上拜祂，不過猶是有人憢疑。這互咱看見同款信仰的道路，有人敬拜，也有憢疑，這就是人軟芷的所在，若是咱的態度是甚麼？

    耶穌並呣是去尋信心最強的人，或是最有能力的人，耶穌只是對那十一個門徒講：「恁著去」，這表示祂欲使用的，是願意回應的人，呣是完美的人。後來門徒的腳跡，是對山頂的敬拜，走向世界的服事。𪜶的腳步帶著耶穌的權柄，也帶著耶穌的同在，呣是靠自己是靠那位及𪜶同在的主。

●咱的腳跡是對日常到世界

    今仔日咱攏領受同款的大使命，咱的腳跡是呣是願意來跟隨耶穌？咱兼願意對日常生活中開始走向祂要咱去的所在？可能有人會掠作「大使命」是宣教師的事，是牧師的責任，其實這是上帝對每一位信徒的呼召。咱無需要出國宣教，咱也可以佇咱的家庭、職場或是社區中行出大使命的腳跡。

    佇生活中行出大使命的腳跡，就是佇見證咱的信仰，咱無需要講真多的道理，只要活出真實的信仰，人就會互咱吸引。當人看見咱的生命充滿盼望？就是咱分享信仰的機會；當人看見咱是有疼心的人，𪜶會想欲知道咱背後的動力是什麼？就是咱分享基督的機會。咱兼願意行上這條路？咱兼願意互咱的腳步跟隨耶穌的腳步？咱兼願意佇日常生活中行出大使命的腳跡？咱只需要講：「主啊，我願意。」咱就可以充滿氣力。