◎持守所信的道理(提後三10-17)             賴信頌牧師

    曾聽人講信基督教卡容易，因為只要相信耶穌是救主，就能夠得著永活，若是其他宗教需要去修行、積功德，是要付出閣卡多的時間；另外基督教的禮拜或是聚會通常也必較卡單純，呣免有複雜的儀式或是供品，這款的形式比較容易做。若是照外在的形式來看，真正是信基督教卡單純，但是若照保羅的標準來看作基督的精兵呣是那麼容易，是要為福音受苦、犧牲奉獻也要付出代價，這款的標準就呣是那麼簡單，作一個真正的基督徒若只有外在的形式，無有真正佇實踐，就會變成無燒無冷的基督徒。

    提摩太後書是保羅書信中的最後一封批，是保羅寫互提摩太的最後遺言。提摩太的老父雖莽是希臘人，若是老母是猶太人，佇猶太人的宗教教育中，佇囝仔細漢的時就教示𪜶要學習律法、認識上帝，所以提摩太佇外嬤羅以及老母友尼基的教示下認識聖經。雖莽是按呢，保羅猶原勉勵他要持守所信的道理呣只是認識，因為此個聖經會當互人有智慧通通過信基督耶穌得著拯救(15)。

    面對這世間的誘惑，欲持守所信的道理，是無簡單的代誌。咱呣是求上帝互咱無遇著試煉，是要求透過信靠耶穌基督，互咱的內心有氣力來贏過遮的是試煉。贏過試煉呣是講咱自己有賴敖，咱可以贏過試煉是因為咱相信上帝欲幫助軟弱中呼叫祂的人，當咱願意依靠上帝來行每一步，就欲對這中間來經歷這位活活的上帝、體驗祂所賜的氣力。保羅佇這段經文中互咱幾個重要的原則，來幫助咱持守所信的道理的原則：

●效法屬靈的生命（10-11）

    信仰呣是一個無形的理念，是可以互人看見的生命樣式。今仔日提摩太之所以能夠持守道理，是因為他看見保羅怎樣學習基督來活出所信的道理，互他雖莽踮佇逼迫及苦難中猶原堅定無搖泏。基督徒生命是一種雙重呼召：一方面咱要跟隨基督來學習，另外一方面咱也被呼召成作別人的模樣，互人佇咱的身上看見基督的樣式。

●有受迫害的心理準備（12-13）

    這段話好親像一幅圖，互咱看見持守信仰不代表一帆風順，反轉可能會帶來衝突及拒絕。保羅提醒提摩太，敬虔的生活會及世界的價值觀衝突，這是咱無法度避免的事實，但是卻是有永遠價值的福氣，所以逼害是信仰旅程的一部分，但是持守所信的道理會幫助咱站在無失志，互咱有信心來面對。

●堅持所深信的道理（14-15）

    相信上帝的道理對咱來講並無困難，困難的是咱欲怎樣堅持。佇世間咱會面對多多的挑戰及困難，當遮的臨到咱身上的時，咱就真容易來搖動，咱若願意堅持所深信的道理，雖莽佇困境中也欲有氣力。咱要會記得，上帝的話語是有能力改變人的生命，欲引導人走向救恩及真理的道路，雖莽環境的變遷超過咱所想像，但是堅持所深信的道理是咱得救的盼望。

●互聖經的話成作信仰的根基（16-17）

    聖經親像一本信仰的說明書，互咱的生命突破多多的限制來看見上帝的旨意，幫助咱來行佇上帝的正路，互咱生命得著利益，佇迷失及混亂的世代中站在。咱若欲持守所信的道理就是要深信上帝的話，藉著聖經的話養飼咱屬靈的生命。上帝的話呣只是讀過若定，是要親像食物吃入巴肚內，經過消化吸收，互上帝的話成作咱生命的一部分，通來面對生命中各樣的挑戰，讀聖經的目的就是欲互服事上帝的人裝備好勢，通做逐項好事。

    佇這個多元的世代，欲持守所信的道理確實不容易，但是也因為按呢，咱閣卡要意識活出信仰的重要性。持守所信的道理呣是講咱要達到完美，重要的是凡事轉來上帝面前重新出發，互咱呣是倚靠自己是倚靠賞賜智慧的上帝。咱的生命若有上帝的話作根基，無論這世代怎樣變遷，咱也未因為按呢來受搖動。