◎誠實面對自己(詩五一10-13)                 賴信頌牧師

    佇人生中咱兼有常常誠實面對自己？或是不敢面對自己？人攏是無完美的，而且是真有限、真自私、也有真多的死角自己無看見，所以誠實面對自己，就是願意承認自己是無完全的。這呣是佇自我否定，是一種真實的自我認識，認識自己的軟弱、過錯及內心的渴望。咱若願意誠實看自己，才會互咱更加謙卑、更加成長、也更加願意去親近上帝。

    大衛的人生前半段是上帝所歡喜的，但是當他作王掌權了後，他就漸漸迷失自己，未記得起初的心志，變作自高自滿，失去疼上帝的心，而且犯罪閣呣知回頭，這是大衛人生中的大失敗。每一個人的生命攏無完全，咱攏有失敗的時，佇失敗的時最驚的呣是上帝的管教，是上帝呣管教，因為佇上帝的責備及管教中互咱看見祂致意咱，祂無因為咱的失敗放棄咱。

    詩篇五一篇是大衛犯落嚴重錯誤後的懺悔祈禱，他曾因為私慾犯落姦淫及謀殺的罪，當先知拿單指出他錯誤的時，他無逃閃反轉是誠實面對，就寫落這首詩來表達他的真心悔改。這時的大衛除了懺悔與憂傷以外，無有甚麼通獻互上帝，其實這就是上帝真正所愛的祭物，就是17節所講：「上帝啊，你所愛的祭是痛悔的心靈；憂傷痛悔的心，你歡喜接納。」大衛誠實面對自己來懺悔認罪，互咱看見上帝願意用疼來赦免每一個願意悔改的人，互咱佇祂的內面重新看見盼望。

    誠實面對自己是咱悔改的第一步，所以大衛的祈禱是對「求你為我創造純潔的心；求你賜我新閣忠誠的心靈」(10)來作開始，這是一種誠實的面對自己的心態，無為自己的行為找藉口，是承認自己內心的敗壞，所以悔改呣是宗教行為，是誠實面對自己。無論是對別人的傷害、對上帝的背叛，或是做出互自己後悔的選擇，悔改呣是自責，閣卡重要的是誠實面對自己來改變。

    雖莽大衛無完美，但是他有誠實面對自己的心，當他犯罪了後，拿單當面譴責他，大衛不但無見肖轉生氣，反轉知道自己罪孽深重，他就進入耶和華的聖殿懺悔祈禱，因為他知道上帝未放捨他，他向上帝祈禱講：「毋通趕我離開你的面前；毋通對我收回你聖的神。」（11）大衛並無停留佇後悔中間，他祈求上帝講：「求你互我重新享受你救恩的歡喜，互我的心靈願意順服你。」(12)這是一種積極的態度，呣是停留佇過去的錯誤，是佇尋求生命的更新。

    咱若願意誠實面對自己來悔改，呣若互自己得著幫助，也欲影響別人，所以13節講：「我欲將你的道路指示犯過失的人，互罪人通歸向你。」誠實面對自己來悔改就欲互咱重新起造及上帝的關係，互咱清楚上帝道路，當咱經歷悔改來換新了後，咱也能成作別人的幫助者。這就親像一個曾犯錯的人，當他重新站起來，他的經歷可以鼓勵踮佇罪惡中的人，互他們知道悔改會帶來新的開始，也能夠成作別人生命中的光。今仔日上帝藉著大衛的生命見證，互咱看到誠實面對自己就有改變的可能性，並且可以活出上帝歡喜的樣式。

    悔改不是一時的情緒，是一種持續的選擇，每一日攏可以是重新開始的機會。上帝並無迫咱著怎樣選擇，祂賜咱有自由的意志來面對，但是祂要咱誠實面對自己，無有藉口來面對自己的軟弱，咱需要有勇氣來面對，呣是用自己的私慾來體貼自己，咱可以選擇無互過去的錯誤綑綁，而是用悔改來做新的起點，互咱的生命走向閣卡成熟、閣卡合主心意的生命。

    誠實面對自己來悔改，這呣只是承認錯誤，更加是一種持續轉向上帝的生活態度。親像一篇文章中所講：「悔改呣只是離開罪惡，更加是轉向上帝；呣只是停止錯誤，更加是努力變閣卡好」。當咱將悔改當作一種的生活方式，呣只是偶然的行為，咱的生命就會越來越親像基督，並且帶來真正的自由及喜樂。