◎行上帝的話(帖前二9-13)

    保羅那個時代，帖撒羅尼迦教會有人佇鬨送耶穌再臨的信息，所以有人為了迎接基督再臨就停止工作，專心等待基督，這種現象佇逐世代攏有，致到有人就開始貧憚懶爛。另外也有人風聲講保羅、西拉、提摩太等是貪婪的人，保羅佇遮解釋他傳福音並無增加教會財務的負擔，是𪜶暝日啲做工，並且對待信徒也是照上帝交代的款式，所行也是符合上帝的旨意。佇遮保羅對帖撒羅尼迦教會所講的，呣只是一種的觀念，是要遮的信徒看𪜶所作的來認識這位上帝，也就是保羅呣只是講上帝的話，是行上帝的話。

    行上帝的話就是將聖經所教示的落實佇生活中，互信仰不甘單是知識，更加是行動。真正的信仰呣是強迫的，是歡喜行出上帝的話，這也是每一個基督徒要學習的功課。欲行上帝的話無需要等到特別的時機，是對日常的小事就可以開始，互信仰及生活是連作伙。兼採只是小小的事，就是佇實踐上帝的話，並且影響周圍的人，互人感受上帝的作為。親像保羅對帖撒羅尼迦信徒講：「恁對阮聽著上帝的話的時，無給伊看做是人的話，顛倒看做確確實實是上帝的話。」(13)

◎用言語來行上帝的話

    言語是咱每日用最多的工具，它可以帶來祝福，也可能傷害人，但是咱可以透過言語來行上帝的話，互人及人中間閣卡多的疼及溫暖，親像歌羅西四6所講：「講話不時著溫和，親像用鹽調味，知影著按怎應答逐個人。」溫和的言語可以化解爭執，避免彼此的傷害，這個溫和呣只是指態度，更加是言語的內容，有人小小聲講，卻是帶來大大的殺傷力，咱要互言語親像鹽來調和，發出閣卡好的氣味。

    佇馬太五37也提醒咱：「恁講話，是，就講是，毋是，就講毋是；其他加講的是對邪惡者出來的。」意思是講咱佇言語上要誠實，佇生活中，咱應該誠實面對自己的承諾，清楚表達自己的決定；佇工作中，坦誠溝通，呣是隨便應應卻無法度實行。正確的言語會建立彼此的信任，互人際關係更加和諧，成作別人的祝福，所以咱可以用言語來行上帝的話。

◎用疼來行上帝的話

    佇馬可十二30-31講：「你著全心、全情、全意、全力疼主 — 你的上帝。第二是：著疼厝邊親像疼家己。無別個誡命比諸個閣較重要。」佇遮互咱看見疼上帝及疼人是信仰最重要的誡命，這也咱信仰的中心。耶穌強調咱要用全心、全情、全意、全力來疼上帝，這表示咱的疼呣只是表面的行為，是全人的投入。既然疼上帝就要順服祂的旨意、渴慕祂的話語，並且佇生活中行出來。所以疼上帝不能只停留佇個人及上帝的關係，也要延續到佇人及人之間。當咱真正疼上帝，就會掠祂的疼來疼人，互咱的信仰成作活活的見證。上帝要咱的生命成作上帝疼的管道，藉著疼上帝及疼人來行出上帝的話。

◎用公義、慈悲及謙卑來行上帝的話

    彌迦書六8講：「人啊，上主已經有指示你什麼是好。伊要求你的是什麼？就是實行公義，心存慈悲，謙卑及你的上帝做夥行。」對遮咱可以清楚看見，上帝所歡喜的呣是遐的宗教儀式，而是咱的內心態度及行為，所以要用公義、慈悲及謙卑來行上帝的話。咱呣是欲靠自己來做任何的事，是要互上帝佇咱的生命中出手，互咱及上帝建立親密的關係，來行出祂看做好的事。

    行上帝的話就是將信仰落實佇生活中，透過咱的行為及遵趁上帝的教示來成作別人的福氣，互咱的生命有美好的見證。這款的見證不只是佇言語上的分享，更加是行動上的實踐，兼採咱所做的只是小小的事，卻能夠彰顯上帝的疼，影響周圍的人。當人看見咱行出上帝的話，就能感受到信仰的氣力，而被吸引來認識上帝。信仰呣是用講的是用行的，這是咱對上帝所領受的使命。