◎超越人性的疼(路加六27-31) 

    高知縣是踮佇日本的四國，因為有一條被稱作「日本最後一條清流」的河川----「四萬十川」而出名，另外日本的偉人「坂本龍馬」及出名的動畫「麵包超人」的作者「柳瀨嵩」，他們的故鄉也攏佇遮，就成作一個觀光勝地，高知縣是一個有歷史、自然及生態的美麗城市。有一位及台灣原住民宣教真要緊的人也出世佇遮，就是「井上伊之助」。

    井上伊之助（1882.9.2-1966.6.20），漢名高天命，出世佇日本的高知縣，除了是神職人員，也從事醫療宣教。井上伊之助的老父佇台灣日治時期初，前往臺灣花蓮從事樟腦採收，後來佇威里事件中被太魯閣族人殺害。

    井上伊之助佇1905年進入聖書學院就學，當他的老父受害的消息傳轉來日本本地的時，他猶佇聖書學院讀冊，他除了真艱苦心以外，也有報仇的念頭，但是他閣用基督教信仰的角度去想，他認為太魯閣族之所以會按呢作，就是因為無接觸到基督教的信仰。他就開始有前往臺灣傳教的念頭，他常常提醒自己：「從今開始，我逐日欲為台灣原住民祈禱，祈求早日有人傳福音互他們，而成作善良的人民。」他的報仇就是將福音傳互遐的原住民。

    1911年全家搭乘「信濃號」大船，來到老父互人殺死的島嶼臺灣。剛到臺灣的井上伊之助就被派前往新竹竹東山區的原住民部落服務，因為醫療服離部落山區猶有一段距離，他需要一段時間才能到部落進行醫治。幾年的時間，他常常利用這種方式來傳道，也醫治遮的患者。1917年他因為身染瘧疾不得不轉去日本治療，雖莽身體真軟芷，但是他一直思念台灣，佇1922年他再度前來台灣，並且開始全臺灣原住民區域的醫療服務。他所服務的區域除了原本的新竹山區以外，猶包誇台中、南投等的原住民地區，後來被稱作「原住民醫療服務之父」。

    今仔日這段經文，對佇多多人來講，是無法度達到目標，咱怎樣會疼咱的對敵、怎樣好款待怨恨咱的人、怎樣祝福詈罵咱的人、怎樣為著侮辱咱的人祈禱。甚至有人搧咱的嘴䩃，另外一旁嘛互伊搧。有人剝咱的外衫，內衫嘛續互伊。有人給咱求什麼，著互伊。有人搶咱的物件，毋通給伊討……甚麼人有法度達到這款的目標呢？今仔日藉著井上伊之助的故事，互咱看見這個無可能的可能，他用疼來疼對敵，用行動來實踐疼的教示，這款疼的生命實在超越人性的疼。

    疼是一種普世的價值，無論甚麼宗教信仰攏會提到疼，若是耶穌佇今仔日這段經文中所教示的疼，是超越了人類的本能及習慣，是一種挑戰的疼，挑戰咱去疼遐的不可愛的人，甚至是咱的對敵。這種疼並呣是單純的情感，而是一種選擇，一種行動，一種氣力。這種超越人性的疼，並呣是出佇對方的行為，而是咱內心的選擇，咱的信仰影響咱所選擇的。

    佇29節講：「有人搧你的嘴䩃，另外一旁嘛互伊搧。有人剝你的外衫，內衫嘛續互伊。」這是一段奧得了解的一段話，挑戰咱對正義及報復的想法。耶穌呣是要咱真軟芷無有反抗的能力，耶穌主要是佇向咱指出另外一款解決方法，當咱若用疼及赦免來化解衝突，這欲顯出閣卡高層次的氣力，可以幫助咱控制自己的情緒，無互仇恨綑綁咱，甚至可以改變對方。

    佇30節也講：「有人給你求什麼，著互伊。有人搶你的物件，毋通給伊討。」這段話並呣是鼓勵咱就要互人剝削，是佇提醒咱，物質財富並呣是人生的終極目標，真正的價值是在佇咱怎樣帶互人福氣，用疼及慷慨互需要的人，這也顯出咱的富足。耶穌教示咱用疼來回應仇恨，這種疼呣是軟弱，是出佇上帝的氣力。今仔日井上伊之助的故事就是佇見證這段教示，他用疼報復的心志，帶互台灣福氣，他的行動攏是佇實踐耶穌的教示;用疼贏過仇恨，用赦免贏過報復，咱兼願意也用疼來面對咱所面對的事。