◎領受聖餐，堅固信仰(馬太廿六26-29) 

    每兩個月咱攏會領受一擺聖餐，領受聖餐呣甘單是一個宗教的儀式，更加是充滿恩典及更新生命的時刻，藉著聖餐咱再次回想主耶穌的疼，並且重新被祂的救恩感動，所以每一擺領受聖餐就是欲幫助咱堅固信仰，這款領受聖餐的態度才有意義。

●藉著聖餐互咱注神佇基督

    聖餐是一個非常重要的信仰實踐，幫助咱注神佇基督，並且佇祂的疼及恩典中得著安慰及幫助。親像咱佇生活中常常會被各種事物影響，致到咱會分心甚至冷心倒退，所以當咱來到主的聖餐桌前，藉著餅及杯的記號，互咱的心再次被提醒----基督為咱犧牲，祂疼咱，祂及咱立永遠的約，咱著注神佇祂來得著幫助，互咱的生命焦點再次轉向祂。

    領受聖餐是一個神聖的時刻，咱著暫時放落世間的掛慮，注神仰望基督，將咱的眼光調整佇基督的救贖恩典，互咱佇厭倦中轉來祂所應許的恩典中。所以咱呣若紀念基督的犧牲，也互咱轉來這個信仰的根基，得著更新及氣力，無論咱的生活怎樣變化，咱的盼望永遠佇耶穌基督內面。

●藉著聖餐互咱及上帝有親密的關係

    聖餐是一個及主親密相通的時刻，幫助咱更加親近上帝，互咱的心靈及祂相連。透過領受聖餐，咱再次確信上帝對咱的疼、恩典及應許，也互咱的信心更加堅定。咱要用安靜的心來領受聖餐，佇安靜中向上帝表達感恩，感謝上帝的救恩看顧；也向上帝承認自己的軟弱來認罪悔改，求上帝幫助咱更加忠心來跟隨祂；更加要向上帝尋求氣力，互咱依靠祂來重新站在來得著盼望。

    聖餐中的個餅及杯攏是佇提醒咱，基督的身軀及寶血已經洗清咱的罪，互咱可以坦然無驚來到上帝的面前，這呣只是一個回顧的時刻，也互咱的心靈更加親近上帝，來建立親密的關係。咱呣若佇今生要倚靠祂，佇未來也欲及祂佇天頂永遠站起。

●藉著聖餐幫助咱合一來建立教會

    教會是信仰的大家庭，所有信徒攏屬佇基督的身體，只是佇現實生活中，逐個人攏有不同的個性、思想及作法，有時也因為遮的不同產生誤解或是衝突，甚至造成肢體的分裂。但是聖餐是一個特別的時刻，幫助咱重新將眼光囥佇基督身上，既然基督為咱每一個人犧牲自己，咱也應當彼此包容赦免，互十字架頂的疼互咱合一來建立教會，互教會有美好的見證來榮光上帝。

    保羅佇林前十一17-22中曾責備遐的領受聖餐時猶結黨分派、無有疼心、只顧自己的行為。保羅提醒咱，聖餐呣只是個人及上帝之間的領受，更加是整個基督身體，藉著教會合一共同來領受聖餐。所以咱每一擺領受聖餐，也是要咱學習彼此赦免、共同合一的機會，互教會真正活出基督的模樣。 

    上帝將咱遮的新創造的人聚集作伙，互咱領受相詳的餅及杯，來屬佇同一個身軀來結連佇基督。咱可以聚集作伙呣是因為咱個人的能力或是智慧，是基督的疼及恩典互咱合一來成作一家人，所以咱佇領受聖餐的時，需要省察自己的內心，求上帝幫助咱放落驕傲及傷害，親像基督赦免咱同款，互教會成作有疼有赦免的所在。願聖餐幫助咱放落不同的堅持，用疼來彼此連結，互教會成作充滿恩典、見證上帝的所在。

    所疼的兄弟姊妹，每擺領受聖餐的時，就是欲互咱再次得著信仰的堅固，藉著回想基督的疼，互咱學習佇教會中彼此相疼、互相合一，來享受上帝為咱備辦的恩典。每一擺領受聖餐，攏是佇重新宣告自己屬佇基督，並且願意順服祂的帶領，按呢才可以幫助咱的信仰不斷成長，持續經歷上帝的疼及恩典。當咱真正互聖餐進入咱的生命，咱的生活方式就會改變，咱就會渴望上帝，願意來親近祂，這是一個能夠影響咱生命的屬靈操練，也是真實活出基督的樣式。