◎常常謳咾伊(詩篇三四1-3)   

    謳咾是甚麼？咱真容易就想著禮拜中吟詩的時，若是佇聖經中互咱看見，謳咾是一種敬拜的表現，也是一種信仰的精神，是人通過謳咾來表達對上帝的疼、尊崇及感恩。但是謳咾呣只是佇言語上的頌讚，更加是一種心態及生活方式，也就是咱面對困境時的信念，咱若願意常常謳咾伊，就會帶來生命的改變。

    其實謳咾就是一款態度的選擇，當咱遇著困境的時，第一的反應通常是煩惱、憂悶、埋怨，甚至是饒疑上帝，致到咱的生命互黑暗充滿。但是當咱遇著困境的時選擇謳咾，就會親像打開窗戶，互日頭的光照進來同款，咱的生命就無閣是黑暗，所以藉著謳咾將咱的眼光轉向上帝，互咱的心重新得著氣力。

●謳咾是信心的回應

    一般人的謳咾常常是及情緒有關係，心情好的時才謳咾，若是遇到困難就埋怨，但是當一個人願意佇困境中猶原謳咾上帝，這就已經超越環境，是表達出他對上帝的信心。親像約伯佇他失去一切的時猶原講：「我褪裼出母胎，嘛會褪裼倒去；上主賞賜，上主提去。願上主的名受稱讚！」（伯一21）這款的謳咾呣是因為環境，是因為他對上帝的信心。

    大衛知道謳咾的重要性，所以第一節講：「我欲不時稱讚上主；我的嘴欲常常謳咾伊。」咱若願意常常謳咾上帝，就會改變咱的心思意念，無論順境或逆境攏可以謳咾祂。謳咾展現出咱對上帝的完全信靠，雖莽環境艱難，仍然相信祂掌管一切，這就是信心的表現。

●謳咾帶互人平安及歡喜

    謳咾上帝可以帶互人歡喜，因為咱心思意念轉向祂的美善，就無閣踮佇困境及掛慮，當咱願意注神佇上帝，就欲經歷祂的慈愛及信實，內心自然會充滿平安及歡喜。這個歡喜呣若互咱自己得著，也欲帶互別人也得著，所以佇第二節講：「我的心神欲誇口上主；困苦的人聽見嘛會歡喜。」咱可以藉著謳咾來鼓勵別人，當咱有謳咾的生活，困苦的人聽見也欲得著安慰來歡喜，所以謳咾是可以帶互人歡喜的。

    當咱謳咾上帝的時，呣若自己歡喜，也能影響周圍的人，所以謳咾成作一種見證，能夠鼓勵別人也來信靠上帝，相及來經歷祂的美善。謳咾上帝就會互咱心中的掛慮減少，因為咱知一切攏佇祂的掌管中，咱的心自然就會歡喜。

●謳咾會影響其他的人

    當咱願意有謳咾的生活，就會影響其他的人，親像第三節所講：「著及我稱讚上主做大，做夥尊崇伊的名。」當咱謳咾上帝的時，祂的信實及大權能就欲臨到，互周圍的人也能夠感受著上帝這款的恩典，而被吸引來信靠祂。這款的態度呣若改變自己也影響其他的人，互他們也願意做夥尊崇上帝的名。

    使徒行傳十六25-26記載，保羅及西拉佇監獄中謳咾上帝，結果發生地震，監獄的門被打開，這呣若互他們得著自由，也互顧監的人得著這個福音，這顯示謳咾會帶來上帝的介入，改變絕望的處境。當保羅及西拉佇謳咾的時，也影響周圍的人，佇經文中提到：「差不多半暝，保羅及西拉啲祈禱，吟詩謳咾上帝，其他的犯人攏注意啲聽」(25)，這表示謳咾會吸引人，互他們注意到上帝的作為，互其他的人也願意謳咾祂。

    謳咾是一種的選擇，也是一種的生活方式，藉著謳咾顯出咱對上帝的信心、藉著謳咾帶互咱平安及歡喜、藉著謳咾來影響別人的生命。當咱選擇謳咾上帝，咱呣只是改變自己的態度，也互上帝佇咱的生命中作工，互上帝的恩典充滿咱的生命！願咱常常謳咾伊，互謳咾成作咱的呼吸，因為這是咱信仰生命不能欠缺的，呼吸是那麼自然，咱的謳咾就可以那麼自然，願上帝的榮光攏可以佇咱的生命中彰顯！