◎閣活的保證(林前十五12-20) 

    閣活對基督教信仰是非常要緊的，使徒保羅講：「基督若無閣活，恁的信就無路用。」(17)這句話互咱看見閣活的重要性，它呣甘單是歷史的事件，更加是有關咱靈魂得救的關鍵。佇復活節咱呣只是回顧耶穌對死閣活的記事，也要思考閣活對咱的信仰及生活的影響是甚麼？如果咱無正確來看閣活這件代誌，就會互所信的歸佇空空。

●閣活是咱信仰的根基

    保羅佇遮表達真清楚，基督若無閣活，咱所傳的福音就無有意義，因為咱的信仰呣是建立佇一位偉大的宗教領袖身上，乃是建立佇那位贏過死亡來閣活的救主身上。如果耶穌無對死閣活，按呢整個基督教信仰就失去根基，聖經就只是一套道德教育或人生道理的冊，無有任何盼望，一切猶原是空虛。

    如果耶穌死了無閣活，按呢祂及世間其他的聖人有什麼不同，祂所講的拯救就無有甚麼意義。如果耶穌死了無閣活，咱的信仰就變做空談，咱只是相信一個過去曾存在，但是現在已經消失的偉人，這款的信仰不能帶互咱氣力。如果耶穌死了無閣活，咱就猶原踮佇罪中，耶穌的救贖就無完全，只有閣活才會證明祂贏過罪及死亡。如果耶穌死了無閣活，按呢咱就無永活的應許，死亡就成作咱的終點，呣是進入永遠的開始。

●閣活是超越今生的信仰

    如果耶穌無有閣活，按呢基督教信仰就失去了真正的意義，因為咱的生命未因為信仰得到改變。聖經給咱講：「因為罪的代價是死，毋拘上帝通過咱的主基督耶穌白白賜互咱的恩典是永遠的活命。」（羅六23）耶穌的死是替咱承擔罪的代價，互咱得著永遠的活命，耶穌要有閣活才會證明祂真正贏過罪及死亡，如果耶穌無有閣活，按表示死亡仍然掌管一切，耶穌救贖無有意義。

    閣活是超越今生的信仰，如果耶穌無有閣活，按呢祂的應許就只是空話，這個信仰就變得毫無價值。咱可以學習祂的教示，但是咱的生命無有超越的盼望，這只可以帶互咱安慰，但無法度解決死亡及永遠的問題，這不過是提供心理上的支持，卻不能真正改變人的心，帶互咱新的生命。

    基督教信仰呣只是幫助咱度過今生的難關，閣卡重要的互咱知道死亡呣是終點，是通往閣卡榮光的一扇門。耶穌的閣活就是進入這扇門，互咱及耶穌同款進入永活的內面。閣活是超越今生的信仰，只有主耶穌永遠活佇，咱的生命才有真正的改變，信仰才未只是道理，乃是充滿氣力、改變及盼望的救恩！

●基督的閣活成做咱閣活的保證

佇林前十五20：「毋拘，現在上帝已經有互基督對死人中閣活，通做已經死去的人閣活的保證。」這句話的意思是講，耶穌的閣活不只是祂個人的勝利，更加是佇預告，欲保證所有相信祂的人死後也欲閣活。佇中文的聖經將耶穌的閣活比喻做「初熟的果子」，意思是講基督的閣活是頭一個，接續就是所有信徒也欲閣活，親像咱走入一遍果子園，看見第一批成熟的果子，就表示整個收成就欲來臨。同款的，耶穌的閣活親像「初熟的果子」，代表信祂的人佇未來也欲經歷閣活，進入永活的生命。

    基督徒呣是因為信仰帶互咱有盼望，而是因為耶穌真正閣活閣保證咱也欲閣活互咱有盼望，這互咱確信，咱也會跟隨祂來進入閣活的生命！這個閣活所帶來的保證，呣只是佇的面上就領受，佇未來就欲經歷，這是咱生命的終極的未來。

    對佇每一位基督徒來講，耶穌的閣活是咱信仰的根基，更加是咱生命的盼望。願咱藉著耶穌的閣活有閣卡寬闊的眼光，因為閣活互咱看見信仰呣只是地上的事，是通往永遠的道路；因為閣活互咱的生命無受死亡綑綁，是佇基督內面得著新的活命；因為閣活互咱佇生活中彰顯新的生命力，活出基督的疼及盼望。