◎及基督合一的新生命(約翰六53-58)           賴信頌牧師

    耶穌講：「恁若無食人子的肉，無飲伊的血，恁內面就無活命。」(53)對佇無信主的人來講無法度體會這句話，甚至認為這是邪教的儀式，兼講咱欲真正吃人的肉、飲人的血嗎？耶穌佇遮是藉著這個比喻給咱講，獨獨領受祂的生命、信靠祂，咱才能真正得著永活。

    佇約翰福音第六章的開始，耶穌就先行五餅二魚的神蹟，互上萬人的肉體得著飽足，來預表自己就是那位能夠滿足人靈魂飢餓的主。後來耶穌閣講：「若無食人子的肉，無飲伊的血，恁內面就無活命」的時，就是佇向眾人提出一個閣卡高閣卡奧秘的邀請，要他們及耶穌建立閣卡親密的關係。

    「吃」、「飲」呣只是肉體的需要若定，也是屬靈領受的象徵。吃基督的肉，呣是照字面的意思來解釋來吃耶穌的肉，而是指咱要領受祂的話語，互祂的話語來供應咱生活的需要，將祂的行作囥佇咱的內心，互祂的真理潤澤咱的靈魂。若是飲基督的血，是呼召咱領受基督為咱所流的寶血，這個血彰顯基督佇十字架頂的犧牲，也代表基督的救贖及新約的開始。所以食人子的肉、飲伊的血就是互咱及基督有寶貴的結連，通過祂互咱罪得赦免及得永活的保證。

●認識基督就是領受真正的生命

    這段經文一開始耶穌就講：「我實實在在給恁講，恁若無食人子的肉，無飲伊的血，恁內面就無活命。」(53)就是欲互咱知道認識基督就是領受真正的生命。真多時候咱追求世間的滿足超越咱的信仰，咱會努力追求財富、名利或是快樂，但是遐的東西閣卡豐富，也無法度填補咱靈內面的空虛，獨獨靠著基督，咱才能真正感受著心靈的充實及平安。耶穌知道人有這款的無奈，所以祂用「祂的肉及祂的血」向咱指出一條新的路，這條新的路無法度靠著自己來得著，只有靠著基督來得著這個永活的生命，祂才能真正滿足咱內心的么餓。

●藉著領受基督的肉及血，轉變作實際的供應

    信仰的道路並呣是靠著自己的氣力能夠行穩固，是要常常依靠咱生命源頭的基督，所以耶穌要咱藉著祂的身軀及寶血來得著生命的供應，咱應該怎樣作呢？其實當咱佇讀經或是祈禱的時，咱就是佇得著基督的供應，這是上帝互咱的機會，咱若願意親近祂，咱就欲經驗基督的供應而改變生命，有時黑暗互咱看無希望，請咱會記得只有基督才能填滿咱心靈所欠需的所在。

    咱每擺領受餅及杯的時，就是佇紀念耶穌的救贖，互咱的心靈經歷及祂合一的氣力。聖餐呣只是儀式，更加是一個機會，互咱可以及基督更加親近，這是咱及基督合一的新生命，求主互咱靠著這個聖餐更加認識祂、得著祂，來成作咱的氣力及引導。

●活出及基督合一的新生命

    認識主並且領受祂的供應，呣若可以互咱自己得著改變，也會互咱成作別人眼中的見證。當咱在生活中真正經驗主耶穌的肉及血，心底就會充滿感恩及平安，自然就會互咱活出及基督合一的新生命。活出及基督合一的新生命，呣只是指生命中間的大見證，是指佇日常生活中互人看見主的存在，透過咱的工作、學習及家庭生活活出這個新生命。無論踮佇甚麼境遇，主的疼攏陪伴佇咱身邊，咱若願意用心來體會，就欲看見生命中到處攏有上帝奇妙的作為。

    這段經文的最後耶穌講：「這就是對天降落來的餅；毋是親像恁的祖先所食的餅，in食了嘛死去；食此個餅的人會永遠活啲。」(58)這句話互咱看見這個餅是對天降落來的，毋是親像咱佇所食的餅，上帝互咱的餅是指向一個閣卡豐盛、閣卡確定的應許，就是永遠活啲。當咱每一擺真心近倚基督，每一擺互祂的話感動咱的生命，就是佇為永遠的將來下根基，就有永遠的活命。