◎經歷上帝的大衛(詩篇廿三1-6) 

    詩篇廿三篇是大衛王的傑作，多多基督徒攏將它暗唸佇心，它呣若是描寫了上帝佇人的生命中所扮演的角色，也互咱看見人及上帝之間的關係。這除了是一首詩，更加是描寫大衛個人所經歷的上帝，佇他所經歷的過程中，他體驗著上帝及他的關係就親像牧者及羊，是一款真親密的結連。大衛的上帝也是咱的上帝，咱的生命若可以經歷這款的上帝，咱的人生就安穩自在。

●大衛經歷上帝會引導咱人生的路

    「伊互我倒佇青翠的草埔，導我到清靜的水邊。」（2）上帝是咱生命中的導航，祂欲導咱走過迷茫及不安，進入平安及希望的境界，祂的引導呣甘單是外在環境的引導，更加是內心的安歇。所以呣管咱的人生所面對的是甚麼挑戰，上帝的引導欲互咱平安靠岸。咱欲怎樣來經歷呢？

1.佇祈禱中來經歷。

2.佇上帝的話中來經歷。

3.佇生活中來經歷。

●大衛經歷上帝欲及咱踮佇黑暗中

    「我雖然經過死蔭的山谷，嘛毋驚災害，因為你及我同在；你的棍，你的柺互我安穩自在。」（4）人生中難免會面對黑暗的時刻，這個黑暗兼採是病痛、失落、艱難，甚至是面對死亡的陰影。若是大衛深深經驗著有上帝及咱同在，雖莽踮佇黑暗也無孤單。祂的棍及柺象徵著祂的保護及氣力，所以咱雖莽佇艱難中祂也及咱踮佇遐，欲成作咱的保護及氣力。

    「死蔭的山谷」是一段旅程，呣是目的地，有上帝踮佇遐，這個黑暗是短暫的，若是光明欲臨到，因為上帝已經應允咱講：「我確實知，我為著恁定的計劃是欲互恁平安繁榮，毋是欲互恁受災禍，通互恁有光明的將來。」(耶利米書廿九11)佇逆境中咱若可以堅信上帝一直佇咱身邊，咱就可以有支持及氣力。

●大衛經歷上帝的恩典慈愛欲導咱進入永遠

    「你的恩典慈愛一定一世人及我做伴；我欲永遠住佇上主你的厝。」（6）上帝的恩典慈愛呣若遮蓋咱的現在，更加是延續到未來的永遠。這句話親像一幅充滿盼望的情景，互咱看見短暫的生命旅程中，有一條通往及上帝永遠同住的路，這是上帝的恩典慈愛最媠的顯現，欲互咱佇地上活出有意義的生命。

    上帝的恩典慈愛是無條件的禮物，並無因為咱的行為而改變，這是大衛表達了他對上帝的信心，他相信無論他遇著什麼困難及挑戰，上帝攏會佇他的生活中及咱同在。所以當咱感到孤單或是失落的時，這句話是咱真大的氣力，因為上帝的恩典慈愛欲佇咱的內面，親像隱形的翅膀帶領咱飛過生命中的困境，因為大衛有這款的經歷，所以他也渴望永遠住佇上帝的厝，及上帝保持親密的關係。

    經歷上帝的大衛，互他知道呣是依靠自己的氣力，乃是完全倚靠上帝的能力及引導。大衛的一生中充滿了及上帝同行的經歷，無論是佇高山亦是河谷，他對上帝堅固的信心，互他經驗上帝的作為。大衛的生命故事有成功也有失敗，但是他對上帝的信心並無搖拙，因為信心並呣是佇順境中展現，而是佇挑戰及困境中彰顯。願咱可以因為大衛的經歷來激勵自己，互依靠上帝呣只是一個理念，更加是咱生命的態度。盼望咱每一個人攏能夠佇信仰的旅程中經歷上帝的奇妙作為，學習佇逐樣環境中攏倚靠祂，願咱攏親像大衛同款來經歷上帝。

    大衛的一生及咱同款無完美，但是堅定的信仰改變他的生命，互他留落寶貴的詩篇來激勵信靠上帝的人。詩篇廿三篇這首充滿疼及盼望的詩，呣只是大衛的見證，也是咱每一個人可以經歷的生命故事，咱相信這位疼咱的牧者欲引導咱來行過人生的每一個階段，互咱帶著盼望來行向永遠的應許中。