互耶穌作咱人生的導師(馬太五3-12)

    人生的導師就是指佇咱人生的過程中，能夠提供咱的需要，而且及咱同行閣指導的導師。咱的生命若有一位人生的導師，那

是一件真幸福的代誌，按呢佇人生的道路中，就有人可以提醒你、幫助你，互所行的道路安穩自在。人生的導師就親像生命中的光，可以佇咱失志的時給咱鼓勵，佇咱跌倒的時牽咱起來，佇咱需要的時成作咱的幫助，這是一種支持、陪伴及引導，互咱的人生行向正確的方向。

    佇咱相信耶穌那時開始，耶穌就成作咱人生的導師，祂將上帝對咱的心意向咱顯明，祂教示咱甚麼是正確的路，祂也陪佇咱的身邊來提醒咱、幫助咱，這是咱一生的福氣。佇人生的路上有大大小小的困難需要咱去面對、經歷，有時咱的信心會受到考驗，感到饒疑、孤單、失望，甚至想欲放棄，咱若願意互人生的導師耶穌來引導咱，祂就欲幫助咱贏過遮的處境，互咱得著氣力，這就咱生命中需要的導師。願佇新的一年的開始，互耶穌作咱人生的導師來導咱行頭前的路，勇敢無驚來向前行。

    佇約翰一29-51中記載，主耶穌及門徒初次的相遇，主耶穌邀請門徒看祂住在所在，向𪜶講：「恁來看！」（約一39），耶穌呣甘單要門徒看祂住的所在，是要祂們認真來看祂，互祂成作𪜶人生的導師。，𪜶共同生活三年久，這中間的互動呣只是講道及教示，閣卡多是佇生活中實踐天父的使命，佇言行中見證天父佇祂身上的作為，是用生命佇作門徒的導師。

    今仔日這段經文咱攏稱它作「八福」，這個八福是上帝恩典的應許，也是耶穌的第一個教導，耶穌用八個結構同款的字句成作開始，八福的頭、尾(3、10)兩句攏有「天國是此款人的」，表示耶穌的教導互咱一個前所未有的國度觀，這個國度並呣是建立佇有形的地上，而是佇人內在的生命中。佇這段經文中真明顯講著，佇每一個福的後面用「因為」來連接相關的賞賜，意思就是講，遮的福是因為上帝所賞賜的，所以八福呣只是一種道德的勸世文，更加是一種生命的表現，遮的表現互咱通進入天國。

    佇遮一連串有八個「真有福氣」，一方面是指一種態度，另外一方面是耶穌特別的宣告，給咱講出上帝的心意，互咱可以承受天國的福氣。過去摩西的律法只能夠互人知罪，律法是欲顯明上帝的審判，若是現在耶穌帶來恩典及真理，只要咱願意對內心承認自己是心靈散赤的，就可以到主面前來領受福氣，這是咱的導師耶穌為咱指出的道路，互咱佇這中間行佇福氣的路。

    信仰就是一種生活方式的選擇，咱人生的導師耶穌已經為咱打開這個奧妙。遮的福分及咱所有的物質無關，是及咱生命的品德有關，耶穌指導咱蒙福的條件就是：心靈散赤、憂傷、溫柔、枵嘴焦欣慕義、𠢕憐憫、心清氣、促進和平、為義受侮辱迫害等，這攏是指人內在的品格。這八個品格並呣是人自然的本性，是當咱選擇上帝所歡喜的態度生活時，就是生命開始更新變化的時。

    八福是一種蒙福的宣告，是進入天國的結果，呣是條件，進入「天國」的條件只有一個，就是：「真心悔改倚靠耶穌」。 「八福」及財富無關，也及世俗的名利地位無關，是及耶穌所宣講的「天國」相關。「天國」是耶穌最意愛互人的，所以祂不斷强調要門徒明白人生的目標，就是要追求天上的國，

       我相信每一位基督徒攏會期待生命有更新變化的時，這也是咱期待信仰互咱的幫助，所以耶穌常常鼓勵人著改變，但是並呣是只靠自己，咱有耶穌作咱人生的導師，就欲互咱重新有生命的色彩。有耶穌作咱人生的導師，有耶穌同在的生命，咱就會經歷著對無到有的歡喜。主耶穌講：「我是世間的光；隨我的人𣍐佇烏暗中生活，反轉有活命的光。」 (約八12) 八福就是咱人生的路標，親像光照光咱的路，求主耶穌基督繼續帶領咱新的路。