真實面對自己(羅七18-25)

    欲活出基督徒生命的歷程中，有一個真大的對敵，這個對敵時常攏及咱佇爭戰。咱要知道對敵是誰，同時也要認識這個對敵，按呢才會「知己知彼，百戰百勝」。佇今仔日這經文中，保羅互咱看見及咱爭戰的對象呣是別人是咱自己，這是保羅真實面對自己了後，所得著的一個醒悟。

    真實面對自己的優勢這無甚麼問題，困難的是咱欲怎樣坦然接受自己的缺點，佇咱真實面對自己的缺點的時，常常就會有無同款的聲佇咱的內面出現，有正面及負面的想法相衝擊，遮的想法可能幫助咱也可能會阻礙咱，咱若願意真實面對自己的缺點，釐清阻礙咱向前的原因，這才是真正勇敢面對人生。

    今仔日這段經文是保羅真實面對自己軟弱的時所講的話，他看見自己心中常常是善及惡佇爭戰，這款的衝突互他真鬱卒講：「我此個人有夠悽慘！什麼人會當救我脫離此個致到死的身軀？」(24)當咱越認識自己，就越會發現咱並呣是親像自己所想的那款。咱兼採會講，我雖莽無完美，但是猶有好的方面，猶有良善，猶比別人卡好，但是當聖靈的光照佇咱內面的時，一切攏無法度隱瞞。保羅講：「我知，佇我本性內面無良善；我有做好的意願，毋拘無做好的氣力。」(18)

    一個人的最大鬱卒，也是最大的痛苦，就是去做他並無想欲做的事，若是應該去做的事，反轉無去做。這款的觀念親像人就是罪的奴僕，必須要聽趁罪的差遣，罪叫咱去做無想欲做的代誌，當咱做了才來後悔自己為甚麼欲按呢做，就已經來不及了。真多時候咱想欲好好做有意義、有見證的事，卻總是停留佇想的階段，連實際的動作攏無，按呢遮的好的想法就無甚麼意義。

    保羅真實面對自己了後，看見自己的本性，互他體驗生命的苦，他所提起的苦，就是不能脫離互罪所轄制的身軀。他知道罪住佇人的內面，及人的軟弱混作伙，互人不能脫離罪的綑綁，親像「所意愛的好，我無去做，無意愛的歹，我顛倒去做。」(19)踮佇這款真無奈的處境中，保羅知道有一個方法可以幫助他脫離這款的苦，他呼叫上帝講：「感謝上帝，通過咱的主耶穌基督伊有救我！」(25)

    為什麼保羅欲講：「感謝上帝」呢？因為他知遮的事攏是對上帝作成的，做工的是上帝，成全的也是上帝，一切攏是來自上帝。今仔日他深深看見自己的徹底無能，敗壞不堪，他相信這也是出佇上帝的感動，是上帝的作為，所以欲對這款的苦境中行出來，也是需要通過咱的主耶穌基督，將咱所需要的賜互咱來成作拯救的氣力。

    佇聖經中咱有讀過，佇保羅身上有一支刺，他曾三次求上帝除去這支刺，但上帝並無應允，反轉引導他用另外一種態度去對待這支刺。刺雖莽互人無爽快，互人艱苦，是人所無愛的東西，但是上帝卻引導保羅用恩典的態度去看這支刺，他就發掘這支刺對他的正面意義，以及這支刺的存在帶互他對人生的體會。當保羅接納這支刺後，他就清楚看見自己的軟弱，上帝就對他講：「我的恩典有夠通滿足你的需要；因為你軟弱的時，我的氣力才會當完全發揮。」(林後十二9)當咱真實面對自己的軟弱，就是欲經歷上帝恩典的開始。

    上帝講：「我的恩典有夠通滿足你的需要」，上帝的恩典欲佇人軟弱的所在完全發揮，所以當咱願意真實面對自己的時，就會幫助咱看見自己的軟弱，佇軟弱的時也欲經歷上帝的恩典是何等的大，這是真正的恩典。上帝差遣祂的子耶穌基督來到世間，呣若為咱的罪釘死佇十字架頂，更加贏過罪惡及死亡的權勢，互信靠祂的人呣若罪得赦免，也互咱有氣力贏過多多的軟弱，有基督的氣力佇咱的內面，咱的軟弱攏欲見證上帝奇妙的作為。