◎有信才有信仰(林後四13-18)               賴信頌牧師

    大約三十年前有一個咖啡的廣告，廣告中有一句台詞講：「好東西及好朋友分享。」這句話互多多人攏有同感，佇那時就變作一句流行的話，也互拍這個廣告的孫越閣紅起來。孫越信主了後，改變他對世間的看法，就佇1989年離開演藝界，全心投入傳福音及公益活動，真正用行動來證明「好東西及好朋友分享」的信仰。

    信仰是對「信」開始，有信才有信仰，有信了後才有其他的事接續完成。保羅佇遮引用詩篇一一六10講：「我有信，所以我才講」這句話來勉勵咱，意思就是要先有信，信仰才會繼續落去。保羅常常提醒自己：「我有信，所以我才講」，他的「信」就是14節所講：「阮知，互主耶穌閣活的上帝嘛會互阮及耶穌同閣活，閣導阮及恁做夥到伊的面前。」保羅的信就是起造佇這段話，他深信互主耶穌對死裡復活的能力，同款會互他復活，也深信有一日他會及眾聖徒同齊站佇主的面前，朝見祂，敬拜祂。

    「我有信，所以我才講」這是真重要的一句話，咱兼知咱的「信」什麼？咱欲怎樣見證自己的所「信」？其實了解信仰是一回事，實踐信仰是另外一件事，咱欲怎樣將所「信」的信仰佇生活中實踐出來？這是多多基督徒所面對的困境！保羅除了告白信仰，也親身經歷信仰，親像雅一22-24所講：「著實行道理，毋通騙家己講干焦聽道理就好。若有人聽道理無實行，伊親像人照鏡看家己的面相，詳細看了後，一下離開，隨時𣍐記得家己生做啥款。」

    對佇每一位基督徒來講，清楚自己的「信」是真重要的，這個「信」可以提升咱的自我價值，因為「信」就是掠上帝的眼光來看自己。信呣是互咱看見「我能」乃是看見「上帝能」，換一句話講，上帝能夠藉著「信」互咱做原本做未到的事。基督教的平安呣是平安無事，而是因為咱「信」上帝佇咱的生命中掌權，祂會透過咱的「信」來施行祂的作為，而互咱無驚，所以保羅勉勵咱要用「信」來經營咱的生命，用「信」的眼光來仰望天頂永遠的榮耀，認真活出每一日，將堅定的信仰留給後代，比留下有形的物質閣卡重要。

    18節保羅講：「阮所重視的毋是看會著的，是看𣍐著的；因為看會著的是暫時，看𣍐著的是永遠。」這可以講是保羅信仰的中心，也是他能夠佇苦難中無感覺苦的原因。保羅將所有的事分作兩類，一個是看會著的，一個是看𣍐著的，一般人當然是追求看會著的，因為看會著麻摸會到，若是看𣍐著的好親像真遙遠，無法度解決現實的需要，所以未特別去想。

    無有樹根，就無有樹；無有穩固的地基，就不能繼續往頂面起起來，這個「根」及「地基」攏佇咱看未著的所在，所以往往真容易互人忽略去，其實看未見的根及地基是比看會見的樹及建築物閣卡重要，莫怪保羅勉勵咱講：「阮所重視的毋是看會著的，是看𣍐著的。」所以欲起造咱的生命，看未見的部分就是咱人生的根基，欲互根基穩固，就要有堅定的「信」。人所致意的是什麼，就影響到他的心志及行動。

    耶穌講：「我有將諸個代誌給恁講，是欲互恁佇我內面有平安。佇世間恁有苦難，毋拘著勇敢，我已經較贏世間。」(約十六33)，咱攏是平凡的人，咱的人生攏有不同的經驗，但是有「信」就會互咱走過死蔭的山谷，卻依然平安自在，因為咱已經「信」耶穌較贏世間。耶穌講死亡親像一粒麥仔落佇土裡死呣是死，是欲生出多多的麥仔，咱若有這款的信心及盼望，咱內在的生命就會日日換新，來看見咱生命的價值。今仔日咱要有「信」才有信仰，因為有「信」，才有盼望，才有活佇的勇氣及氣力，願咱的「信」互咱的人生攏更加的精彩！