◎互主行佇咱的頭前(申一19-33)            賴信頌牧師

    白沙岬燈塔是惦佇桃園市觀音區的海邊，佇1898年開始興建，1901年1月開始發光。這座燈塔最特殊的所在，就是它是台灣唯一使用紅磚及石頭起造完成的燈塔，及台灣其他使用水泥起的燈塔無同款，塔身為雙層磚造圓塔，是日本人佇臺灣所起的第三座燈塔。那時的燈高約37公尺，但是佇二次世界大戰期間曾受戰鬥機撞壞，戰後修復燈塔，將燈高減到27.7公尺，是目前保存最完整的日據時代的燈塔。

    摩西帶領以色列百姓出埃及後，經過四十年的曠野流浪，最後到佇迦南地邊界。此時摩西回憶過去，心中有多多感慨，就向以色列百姓講話。回想過去佇埃及作奴隸的時，生活非常痛苦，離開埃及的時是非常緊張，前無路後有追兵，好加在有上帝大能的帶領，互𪜶平安渡過紅海，來到加低斯‧巴尼亞。照理來講，𪜶現在的心境應該要真歡喜，因為𪜶佇欲進入上帝所應允的地。若是𪜶佇這時卻起了疑心，懷疑上帝的話及應允，對上帝失去了信心。

    𪜶埋怨講：「因為上主怨恨咱，所以導咱出埃及地，欲將咱交互亞摩利人，給咱剿滅。今咱是欲去什麼款所在？咱的兄弟互咱失志；𪜶給咱講：『遐的人民比咱較勇較樂，城闊大閣堅固，高到抵天；阮閣佇遐看著亞衲族的人。』」(27-28) 𪜶之所以會按呢失志，就是過去𪜶派出十二個人去探查迦南地，只有迦勒及約書亞講那是極媠的所在，呣免驚𪜶。若是遮的百姓所選擇的是另外十個人所報的壞消息，所以𪜶就驚，毋肯入去彼個地。𪜶未記得當時是按怎樣出埃及的，摩西勉勵𪜶講：「毋免驚，嘛毋免懍𪜶。行佇恁頭前的上主 — 恁的上帝會為恁交戰，親像伊佇埃及為著恁所做的仝款。(29-30)摩西提起一個真重要的信仰觀念，就是上主佇咱的頭前行為咱交戰，咱就毋免驚，嘛毋免懍𪜶，但是𪜶卻聽未落。

    對這個事件中，互咱再次來反省咱對上帝的信心及順服到怎樣。當以色列人佇迦南邊界的時，𪜶看見欲進入迦南地並無親像𪜶想像的那麼容易，所以𪜶呣肯入去，𪜶因為外在的挑戰而失去對上帝的信心。這互咱看見，信主的人同款會遇著困難，重要的是咱要有信心互主行佇咱的頭前，咱只要盡咱該盡的本份，上帝就欲佇咱的頭前親自引導，替咱備辦咱所需要的。上帝要咱參與佇祂的旨意中，呣是坐佇等候上帝的應允；上帝欲成作咱的幫助來得勝，但是呣是要咱什麼攏呣免做。

    上帝過去是怎樣帶領𪜶出埃及，𪜶攏親身經驗過，如今就欲進入迦南地，遮的百姓既然懷疑上帝的應許，這互咱看見以色列百姓信心的軟弱，無有信心就生未出盼望。十二個偵探去同一個所在，看見同一件代誌，但是卻有完全不同的領受，最大的原因就是信，有人看見的是困難，但是有人看見的是上帝的應允。既然上帝佇咱的頭前行，咱就通對所向望的事有把握。

    佇咱的日常生活中，咱的行事作人若親像以色列百姓同款，只注重佇目周所看會見的，卻未記得佇咱頭前的上帝，咱就會一步一步偏離正道，失去上帝互咱的應許。佇咱每一擺佇決定的時，咱若相信上帝佇咱頭前佇行，咱就通充滿氣力來面對，因為有上帝擋佇咱的頭前，咱就無甚麼通好驚的。

    咱的人生親像行佇曠野，好親像無有地圖，但是卻有上帝佇這中間佇帶領，親像摩西所講：「伊一路行佇恁的頭前，給恁尋安營的所在；暝時用火，日時用雲，指示恁著行的路。」（33）求主互咱憑著信心專心倚靠祂，呣是倚靠自己的聰明，知道作咱當作的本份，盡咱該盡的責任，然後將所有的結果攏交託互祂。咱要相信無一件事是偶然的，一切攏佇上帝的計畫中，因為上帝行佇咱的頭前。